ព័ត៌មានជាតិ

ក្រសួងការងារ អំពាវនាវ កម្មករ-និយោជិត និងពលរដ្ឋ ប្រុងប្រយ័ត្នពិនិត្យបណ្ដាញអគ្គិសនី ភ្លើងចង្ក្រានធូបទៀន មុនចេញពីលំនៅឋាន អំឡុងចូលឆ្នាំថ្មី

បានផុស

១១ ខែ មុន

នៅ

ថ្ងៃសុក្រ ១២ មេសា ២០២៤

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ អំពាវនាវដល់ កម្មករ-និយោជិត ម្ចាស់អាជីវកម្ម និងប្រជាពលរដ្ឋ សូមមេត្តាពិនិត្យបណ្ដាញអគ្គិសនី ភ្លើងចង្ក្រាន ធូប និងទៀន ឲ្យបានល្អ មុនពេលចាកចេញពីលំនៅឋាន ទៅដើរកម្សាន្ត ត្រឡប់ទៅស្រុកកំណើត ឬ បិទទ្វារទីតាំងអាជីវកម្មរបស់ខ្លួន អំឡុងពិធីបុណ្យចូលឆ្នាំថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី ១២ ខែមេសា ឆ្នាំ ២០២៤ នេះ តាមរយៈ «សេចក្ដីអំពាវនាវ និងជូនព័ត៌មានដល់បងប្អូន កម្មករ-និយោជិត ម្ចាស់អាជីវកម្ម និងប្រជាពលរដ្ឋ ក្នុងអំឡុងពិធីបុណ្យចូលឆ្នាំថ្មី» របស់ ក្រសួងការងារ និងបណ្ដុះបណ្ដាលវិជ្ជាជីវៈ បានសរសេរឲ្យដឹងថា ខណៈពេលបុណ្យចូលឆ្នាំថ្មីប្រពៃណីជាតិ បានខិតជិតមកដល់ កម្មករ-និយោជិត ម្ចាស់អាជីវកម្ម និងប្រជាពលរដ្ឋ នៅទូទាំងប្រទេសភាគច្រើន បាននិងកំពុងធ្វើដំណើរទៅស្រុកកំណើត ដើម្បីជួបជុំក្រុមគ្រួសារ និងប្រារព្ធពិធីផ្សេងៗ តាមទំនៀមទម្លាប់ ប្រពៃណី សាសនា និងមានការធ្វើដំណើរកម្សាន្តទៅកាន់រមណីយដ្ឋាន មណ្ឌលកម្សាន្ត ភោជនីយដ្ឋាន សណ្ឋាគារ និងផ្ទះសំណាក់នានា ប្រកបដោយភាពសប្បាយរីករាយ ក្រោមម្លប់ដ៏ត្រជាក់ នៃសុខសន្តិភាព។ ជាមួយគ្នានេះ កម្មករ-និយោជិត មួយចំនួន ដែលបម្រើការងារនៅតាមរមណីយដ្ឋាន មណ្ឌលកម្សាន្ត ភោជនីយដ្ឋាន សណ្ឋាគារ និងផ្ទះសំណាក់នានា នឹងមានភាពមមាញឹកទ្វេដងក្នុងការផ្ដល់សេវាជូនអតិថិជន និងភ្ញៀវទេសចរជាតិ និងអន្តរជាតិ។

សេចក្ដីអំពាវនាវ សរសេរឲ្យដឹងទៀតថា ក្នុងន័យនេះ ក្រសួងការងារ និងបណ្ដុះបណ្ដាលវិជ្ជាជីវៈ សូមអំពាវនាវដល់ ប្រជាពលរដ្ឋ កម្មករ-និយោជិត និង សាធារណជន ដែលបានឈប់សម្រាក និងធ្វើដំណើរកម្សាន្ត ឬ ទៅទទួលសេវានៅតាមរមណីយដ្ឋាន មណ្ឌលកម្សាន្ត ភោជនីយដ្ឋាន សណ្ឋាគារ និងផ្ទះសំណាក់នានា សូមមានការយោគយល់អធ្យាស្រ័យដល់ កម្មករ-និយោជិត អ្នកផ្តល់សេវា និងម្ចាស់អាជីវកម្ម ប្រសិនមានករណីយឺតយ៉ាវ ឬ ខ្វះខាតដោយប្រការណាមួយ ក្នុងអំឡុងពេលនេះ។

សេចក្ដីអំពាវនាវ ដដែល សរសេរបន្តថា ក្រសួងការងារ និងបណ្ដុះបណ្ដាលវិជ្ជាជីវៈ សូមថ្លែងអំណរគុណ និងសម្ដែងនូវការកោតសរសើរយ៉ាងស្មោះស្ម័គ្រ ចំពោះស្មារតីមនសិការវិជ្ជាជីវៈរបស់ កម្មករ-និយោជិតផ្នែកសេវាសារវន្តទាំងអស់ ដែលបានលះបង់ពេលវេលាផ្ទាល់ខ្លួន បំពេញនូវភារកិច្ចជាសារវន្ត និងមានចរិតជាសកលរបស់ខ្លួនបានយ៉ាងខ្ជាប់ខ្ជួននាឱកាសនេះ។

ទន្ទឹមនេះ ក្នុងនាម កម្មករ-និយោជិត ម្ចាស់អាជីវកម្ម និងប្រជាពលរដ្ឋ ក្រសួងការងារ និងបណ្ដុះបណ្ដាលវិជ្ជាជីវៈ ក៏សូមថ្លែងអំណរគុណចំពោះអាជ្ញាធរគ្រប់ជាន់ថ្នាក់ កងកម្លាំងប្រដាប់អាវុធគ្រប់ប្រភេទ និងបុគ្គលិកសន្តិសុខឯកជន ដែលបានលះបង់ពេលវេលាផ្ទាល់ខ្លួនបំពេញភារកិច្ចរក្សាសណ្ដាប់ធ្នាប់ សន្តិសុខសង្គម នៅក្នុងអំឡុងពេលឈប់សម្រាកនេះ ដើម្បីផ្តល់ឱកាសដល់ កម្មករ-និយោជិត ម្ចាស់អាជីវកម្ម និងប្រជាពលរដ្ឋ អាចមានពេលវេលាជួបជុំគ្រួសារដោយសប្បាយរីករាយ និងធ្វើដំណើរកម្សាន្តប្រកបដោយសុវត្ថិភាព។

ជាមួយនោះ ក្រសួងការងារ និងបណ្ដុះបណ្ដាលវិជ្ជាជីវៈ ក៏បានអំពាវនាវដល់ កម្មករ-និយោជិត ម្ចាស់អាជីវកម្ម និងប្រជាពលរដ្ឋ សូមមេត្តាពិនិត្យ បណ្ដាញអគ្គិសនី ភ្លើងចង្ក្រាន ធូប និងទៀន ឲ្យបានល្អ មុនពេលចាកចេញពីលំនៅឋាន ទៅដើរកម្សាន្ត ឬ ត្រឡប់ទៅស្រុកកំណើត ឬ បិទទ្វារទីតាំងអាជីវកម្មរបស់ខ្លួន។ បន្ថែមនោះ ក្រសួង បានជូនពរប្រជាពលរដ្ឋទាំងអស់ ធ្វើដំណើរទៅគ្រប់ទីកន្លែងប្រកបដោយសុខ សុវត្ថិភាព និងសូមបង្កើនការប្រុងប្រយ័ត្នក្នុងការបើកបរ ដោយគោរពច្បាប់ចរាចរណ៍ និងចេះអធ្យាស្រ័យគ្នាទៅវិញទៅមក៕

អត្ថបទ ៖ ពិសី