បញ្ជាការដ្ឋានទ័ពពិសេស រៀបចំលេងល្បែងប្រជាប្រិយខ្មែរ ដើម្បីអបអរសាទរពិធីបុណ្យចូលឆ្នាំថ្មី

ល្បែងប្រជាប្រិយខ្មែរ ត្រូវបានបញ្ជាការដ្ឋានទ័ពពិសេស នៃកងទ័ពជើងគោក ចាត់តាំងលេងកម្សាន្តសប្បាយពេញរយៈពេល៣ថ្ងៃ នៅទីបញ្ជាការដ្ឋានទ័ពពិសេសកំបូល ដើម្បីចូលរួមអបអរសាទរពិធីបុណ្យចូលឆ្នាំថ្មី។

ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៤ ត្រូវបានប្រារព្ធធ្វើពិធីចំនួន៤ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤។ ក្នុងនោះ នៅគ្រប់បណ្ដារាជធានី ខេត្ត ក្រុង ភូមិ ឃុំ សង្កាត់ ទូទាំងប្រទេសកម្ពុជា និងទីវត្តអារាម សាលារៀន កងឯកភាព ស្ថាប័នរដ្ឋ ក្រុមហ៊ុន មណ្ឌលកម្សាន្ត រមណីយដ្ឋានទេសចរណ៍នានា ត្រូវបានរៀបចំសង្ក្រាន្តតាមលក្ខណៈប្រពៃណីខ្មែរ ដោយមានតុបតែងលម្អរតាំងបង្ហាញនូវសមិទ្ធផលនានារបស់ជាតិ ក៏ដូចជាសមិទ្ធផលរបស់បណ្ដារាជធានី ខេត្ត ក្រុង ទៅតាមអ្វីដែលខ្លួនមាន ដើម្បីរំលេចអំពីអត្តសញ្ញាណជាតិខ្មែរ និងមានចាត់តាំងលេងកម្សាន្តនូវល្បែងប្រជាប្រិយផ្សេងៗចូលរួមអបអរសាទរទទួលទេវតាឆ្នាំថ្មីនេះផង។

ដោយឡែកបញ្ជាការដ្ឋានទ័ពពិសេសកងទ័ពជើងគោក ក្រោមការដឹកនាំរបស់លោកឧត្តមសេនីយ៍ទោ ស៊ុំ សំណាង មេបញ្ជាការនៃបញ្ជាការដ្ឋានទ័ពពិសេស នៃកងទ័ពជើងគោក បានដាក់ចេញនៅផែនការត្រៀមប្រយុទ្ធយ៉ាងម៉ឺងម៉ាត់តាមបទបញ្ជារបស់នាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ដោយចាត់តាំងឱ្យបណ្ដាកងឯកភាពចំណុះលេងល្បែងប្រជាប្រិយកម្សាន្ត រយ:ពេល៤ថ្ងៃ ក្នុងថ្ងៃបុណ្យចូលឆ្នាំថ្មីនេះ។

បណ្ដាកងឯកភាព ត្រូវសហការជាមួយអាជ្ញាធរ ប្រជាពលរដ្ឋនៅក្នុងតំបន់ ក៏ដូចជាគ្រួសារកងទ័ព ដើម្បីចាត់តាំងលេងល្បែងប្រជាប្រិយកម្សាន្ត សំដៅបង្ហាញអំពីការអភិរក្ស និងថែរក្សានៅល្បែងប្រជាប្រិយប្រពៃណីជាតិខ្មែរដ៏ល្អផូរផង់របស់ដូនតាខ្មែរ បានបន្សល់ទុក ដូចជា ល្បែងវាយក្អម លោតបាវ ទាញព្រាត់ ចោលឈូង ដណ្ដើមស្លឹកឈើ លាក់កន្សែង ពាំពងទា បូមទឹកដាក់ដប ចងមុខចាប់ទា ឡើងសសរខ្លាញ់ រាំលេងដណ្តើមកៅអី រត់ប្រណាំង ប្រដាល់គុនខ្មែរ និងល្បែងប្រជាប្រិយផ្សេងៗទៀត។

ចំពោះការចាត់តាំង និងការធានាថវិកា សម្ភារ:ទ្រទ្រង់លេងល្បែងប្រជាប្រិយកម្សាន្តនេះ គឺបានមកពីការឧបត្ថម្ភផ្ទាល់ទាំងស្មារតី និងសម្ភារៈថវិការបស់ឧត្តមសេនីយ៍ទោ ស៊ុំ សំណាង មេបញ្ជាការអង្គភាព និងលោកស្រី ដោយបានដោះស្រាយការធានាហូបចុក និងធ្វើជាប្រាក់រង្វាន់​ ដោយមានការផ្តល់រង្វាន់លើកទឹកចិត្តគ្រប់ប្រភេទល្បែងប្រជាប្រិយ និងកីឡាប្រដាល់គុនខ្មែរ ព្រមទាំងរង្វាន់ឆ្នោតលើកទឹកចិត្តដល់អ្នកចូលរួមផងដែរ៕