រយៈពេល៤ថ្ងៃ បុណ្យចូលឆ្នាំថ្មីប្រពៃណីជាតិខ្មែរ ខេត្តស្វាយរៀងទទួលបានទទួលភ្ញៀវជាតិ និងអន្តរជាតិជាង ៥៤ម៉ឺននាក់ 

ត្រឹមតែរយៈពេល ៤ថ្ងៃ នៅក្នុងពិធីសង្ក្រាន្តស្វាយរៀង មានភ្ញៀវទេសចរជាតិ និងអន្តរជាតិមកចូលរួមកម្សាន្តសប្បាយរីករាយទទួលអំណរឆ្នាំថ្មី ដែលមានចំនួនរហូតដល់ ៥៤៣ ៦៩៥នាក់។

យោងតាមរបាយការណ៍របស់មន្ទីរទេសចរណ៍ខេត្តដែលរៀបចំ បានឱ្យដឹងថា នៅក្នុងរយៈពេល ៤ថ្ងៃ គិតចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ នៅគ្រប់តំបន់រមណីយដ្ឋាន និងទីកម្សាន្ដនៅខេត្តស្វាយរៀង បានទទួលភ្ញៀវជាតិ និងអន្តរជាតិ ប្រមាណជាង ៥៤ម៉ឺននាក់។ នេះសបញ្ជាក់ឱ្យឃើញថា ខេត្តស្វាយរៀង មានសក្តានុពលខ្លាំង លើវិស័យទេសចរណ៍ ម្យ៉ាងវិញទៀត នៅឆ្នាំនេះខេត្តស្វាយរៀង បានរៀបចំទីតាំងកម្សាន្ត ជាច្រើនកន្លែងនៅតាមក្រុង-ស្រុក។

បើតាមរបាយការណ៍សរុបរួមរបស់មន្ទីរទេសចរណ៍ខេត្តស្វាយរៀង បានបញ្ជាក់ថា ចាប់តាំងពីថ្ងៃទី១៣ ដល់ថ្ងៃទី១៦ ខែមេសា មានភ្ញៀវទេសចរណ៍ជាតិ និងអន្តរជាតិចូលរួមកម្សាន្តសប្បាយយ៉ាងអធិកអធម នាឱកាសបុណ្យចូលឆ្នាំថ្មីប្រពៃណីជាតិខ្មែរ ក្នុងនោះមានភ្ញៀវទេសចរជាតិ ៥២៧ ២០១នាក់ និងទេសចរបរទេស ១៦ ៤៩៤នាក់ សរុបចំនួន ៥៤៣ ៦៩៥នាក់ ស្រី ២៣៨ ២៩២នាក់៕ 

ដោយ៖ភក្ដី