សន្តិសុខសង្គម

ស្លាប់ ៣៧ របួស ៨៨ នាក់ ដោយសារគ្រោះថ្នាក់ចរាចរណ៍ ពេលបុណ្យចូលឆ្នាំខ្មែរ ៤ ថ្ងៃ

បានផុស

១១ ខែ មុន

នៅ

ថ្ងៃពុធ ១៧ មេសា ២០២៤

ដោយ

មនុស្សចំនួន ៣៧ នាក់បានស្លាប់ និង ៨៨ នាក់ទៀតបានរងរបួសធ្ងន់ និងស្រាល ដោយគ្រោះថ្នាក់ចរាចរណ៍នៅទូទាំងប្រទេសក្នុងរយៈពេល ៤ ថ្ងៃ នៃពិធីបុណ្យចូលឆ្មាំថ្មីប្រពៃណីជាតិខ្មែ។

លោក ទូច សុខៈ អ្នកនាំពាក្យរងក្រសួងមហាផ្ទៃ បានឱ្យដឹងនៅថ្ងៃទី ១៧ ខែមេសា ឆ្នាំ ២០២៤នេះថា រយៈពេល ៤ ថ្ងៃនៃពិធីបុណ្យចូលឆ្នាំខ្មែរ (១៣-១៦) ករណីគ្រោះថ្នាក់ចរាចរណ៍ទូទាំងប្រទេស បានកើតឡើងចំនួន ៦៤ ករណី បណ្ដាលឱ្យមានមនុស្សស្លាប់ចំនួន ៣៧ នាក់ និងរងរបួសធ្ងន់-ស្រាល ៨៨ នាក់ ដែលចំនួននេះ កើនឡើងបន្ដិចបើធៀបឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទូច សុខៈ ប្រាប់ថា នៅថ្ងៃទី ១៣ ខែមេសា ឆ្នាំ ២០២៤ មានករណីគ្រោះថ្នាក់ចរាចរណ៍កើតឡើងចំនួន ១៧ លើក បណ្ដាលឱ្យមានជនរងគ្រោះ ១១ នាក់ ស្លាប់ និងរបួសធ្ងន់-ស្រាល ២២ នាក់។

ចំណែកនៅថ្ងៃទី ២ នៃពិធីបុណ្យ មានគ្រោះថ្នាក់ចរាចរណ៍កើតឡើង ១៧ លើក បណ្ដាលឱ្យស្លាប់ ៨ នាក់ និងរបួសធ្ងន់ស្រាល ២៨ នាក់ រីឯនៅថ្ងៃទី ៣ មានករណីគ្រោះថ្នាក់ចរាចរណ៍កើតឡើងចំនួន ១៨ ករណី បណ្ដាលឱ្យស្លាប់ចំនួន ១១ នាក់ របួសធ្ងន់ស្រាល ២៤ នាក់។

ដោយឡែកនៅថ្ងៃទី ១៦ ដែលជាថ្ងៃចុងក្រោយនៃពិធីបុណ្យមានករណីគ្រោះថ្នាក់ចរាចរណ៍កើតឡើងចំនួន ១២ ករណីបណ្ដាលឱ្យស្លាប់ ចំនួន ០៧ នាក់ របួសធ្ងន់ស្រាល ១៤ នាក់។

ករណីគ្រោះថ្នាក់ចរាចរណ៍ឆ្នាំ ២០២៤ អំឡុងពេលចូលឆ្នាំ បានកើនឡើងចំនួន ១៩ ករណី បើធៀបនឹងពេលចូលឆ្នាំដូចគ្នា ឆ្នាំ ២០២៣ ខណៈអ្នកស្លាប់បានកើនឡើង ១២ នាក់ ខណៈអ្នករបួសថយចុះ ៤ នាក់។

ប៉ុន្តែលោក ទូច សុខៈ បញ្ជាក់ថា បើធៀបរយៈពេល ៣ ថ្ងៃ ដូចឆ្នាំមុន ចាប់រាបពីថ្ងៃទី ១៤-១៦ ខែមេសា ឆ្នាំ ២០២៣ ករណីគ្រោះថា្នក់កើតឡើង ៤៥ ករណី ខណៈឆ្នាំ ២០២៤ កើតឡើង ៤៧ ករណីគឺកើនឡើងតែ ២ ករណី ខណៈអ្នកស្លាប់ កើនឡើងតែម្នាក់រីឯអ្នករបួសបានថយចុះគួឱ្យកត់សម្គាល់។

ទោះយ៉ាងណា លោក ទូច សុខៈ បញ្ជាក់ថា ស្ថានភាពចរណ៍អំឡុងពេលបុណ្យចូលឆ្នាំនេះ អាចគ្រប់គ្រងបាន ខណៈពលរដ្ឋក៏មានការយល់ដឹង និងយោគយល់ក្នុងការបើកបរ៕

អត្ថបទ៖ ឡេង ដេត