អ្នកនាំពាក្យ ថា ការផ្លាស់ប្ដូរស្នងការខេត្ត គ្មានអ្វីចម្លែកទេ ជារបៀបរបបការងាររបស់សមត្ថកិច្ច

បើគ្មានការប្រែប្រួល ស្នងការនគរបាលខេត្តចំនួន៣រូប នឹងត្រូវផ្លាស់ប្ដូរ និងផ្ទេរដែនសមត្ថកិច្ចគ្រប់គ្រងថ្មី។ បើតាមអ្នកនាំពាក្យរងក្រសួងមហាផ្ទៃ ការផ្លាស់ប្ដូរតំណែងស្នងការខេត្តនេះ គ្មានអ្វីចម្លែកទេ ជារបៀបរបបការងាររបស់សមត្ថកិច្ច។

លោក ទូច សុខៈ អ្នកនាំពាក្យរងក្រសួងមហាផ្ទៃ បានបញ្ជាក់ដូច្នេះថា៖ «ការផ្លាស់ប្ដូរនេះអត់មានអីចម្លែកទេ គឺជារបៀបរបបការងាររបស់សមត្ថកិច្ចជំនាញ ហើយនិងការងាររដ្ឋបាលដឹកនាំគ្រប់គ្រងកម្លាំង ដើម្បីគ្រប់គ្រងសន្តិសុខ សណ្ដាប់ធ្នាប់សង្គមឱ្យមានប្រសិទ្ធភាពល្អ»។

ស្នងការនគរបាលខេត្ត ដែលនឹងត្រូវផ្លាស់ប្ដូរ នាពេលខាងមុខនេះ រួមមាន លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ ត្រូវផ្ទេរទៅកាន់ជាស្នងការនគរបាលខេត្តសៀមរាប ហើយលោកឧត្តមសេនីយ៍ទោ តេង ច័ន្ទណាត ពីស្នងការនគរបាលខេត្តសៀមរាប ត្រូវផ្ទេរទៅកាន់ជាស្នងការនគរបាលខេត្តកំពង់ឆ្នាំង និងលោកឧត្តមសេនីយ៍ទោ ខូវ លី ពីស្នងកានគរបាលខេត្តកំពង់ឆ្នាំង ត្រូវផ្ទេរទៅកាន់ជាស្នងការនគរបាលខេត្តឧត្តរមានជ័យវិញ៕