ព័ត៌មានជាតិ

ក្រសួងការងារ នឹងចាប់ផ្ដើមប្រជុំប្រាក់ឈ្នួលកម្មករ-និយោជិត សម្រាប់ឆ្នាំ ២០២៥ នៅត្រីមាសទី ៣ ខាងមុខ

បានផុស

១១ ខែ មុន

នៅ

ថ្ងៃព្រហស្បតិ៍ ១៨ មេសា ២០២៤

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ នឹងចាប់ផ្ដើមប្រជុំប្រាក់ឈ្នួលកម្មករ-និយោជិត ផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ ២០២៥ នៅត្រីមាសទី ៣ ខាងមុខ ខណៈឆ្នាំ ២០២៤ នេះ កម្មករ-និយោជិត ទទួលបានប្រាក់ឈ្នួលអប្បបរមាចំនួន ២០៤ ដុល្លារ ក្នុង ១ ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ១៨ មេសា នេះថា ជារៀងរាល់ឆ្នាំ ក្រសួង បានកំណត់យកខែកក្កដាសម្រាប់ចាប់ផ្ដើមកិច្ចប្រជុំផ្ទៃក្នុងរបស់ខ្លួនរួមមានភាគី រាជរដ្ឋាភិបាល ភាគីនិយោជក និងភាគីសហជីពតំណាងឱ្យកម្មករ-និយោជិត។

លោកបានបន្តថា នៅខែសីហា ប្រជុំទ្វេភាគីរវាងភាគីនិយោជក និងភាគីរាជរដ្ឋាភិបាល ភាគីសហជីពជាមួយរាជរដ្ឋាភិបាល និងភាគីសហជីពជាមួយភាគីនិយោជក និងខែកញ្ញា ភាគីទាំងបីចាប់ផ្ដើមបើកកិច្ចប្រជុំត្រីភាគី។

លោកបានបន្តទៀតថា សម្រាប់ត្រីមាសទី ៤ នៅខែតុលា ហើយក្នុងករណីមានការកុងសង់ស៊ីគ្នានឹងប្រកាសប្រាក់ឈ្នួលថ្មីដែលនឹងចាប់ផ្ដើមអនុវត្តនៅថ្ងៃទី ១ ខែមករា ឆ្នាំ ២០២៥។ ក្នុងករណីមិនកុងសង់ស៊ីសទេ ត្រីភាគីត្រូវប្រជុំជាលើកទី ២ ដើម្បីស្វែងរកកុងសង់ស៊ីស ឬការបោះឆ្នោតដោយសម្ងាត់។

លោកបានបន្ថែមថា លក្ខណវិនិច្ឆ័យក្នុងការកំណត់ប្រាក់ឈ្នួលអប្បបរមានៅកម្ពុជា សំដៅទៅលើលក្ខណវិនិច្ឆ័យបែបសង្គមរួមមានស្ថានភាពគ្រួសារ អត្រាអតិផរណា និងការចំណាយក្នុងការរស់នៅ និងលក្ខណវិនិច្ឆ័យបែបសេដ្ឋកិច្ចរួមមានផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ។

គួរបញ្ជាក់ថា ឆ្នាំ ២០២៤ នេះ រាជរដ្ឋាភិបាលបានដំឡើងប្រាក់ឈ្នួលអប្បបរមាជូនដល់កម្មករ-និយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ចំនួន ៤ ដុល្លារ ក្នុងនោះ ២ ដុល្លារ អនុម័តដោយត្រីភាគី និង ២ ដុល្លារទៀត ផ្តល់ជូនបន្ថែមដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ធ្វើឱ្យប្រាក់ឈ្នួលអប្បបរមាកម្មករ-និយោជិត មានចំនួន ២០៤ ដុល្លារ៕

អត្ថបទ ៖ សំអឿន