រដ្ឋមន្ត្រីធនធានទឹក ទស្សនកិច្ចនៅមជ្ឈមណ្ឌលគ្រប់គ្រងទិន្នន័យ និងព្យាករណ៍អាកាសធាតុបារាំង

ក្នុងឱកាសបំពេញទស្សនកិច្ចនៅប្រទេសបារាំងចាប់ពីថ្ងៃទី១៤ ដល់ថ្ងៃទី១៨ ខែមេសា ឆ្នាំ២០២៤ លោករដ្ឋមន្ត្រី ថោ ជេដ្ឋា និងគណៈប្រតិភូជាន់ខ្ពស់ក្រសួងធនធានទឹក និងឧតុនិយម បានអញ្ជើញទៅទស្សនាមជ្ឈមណ្ឌលគ្រប់គ្រងទិន្នន័យនិងព្យាករណ៍អាកាសធាតុរបស់ប្រទេសបារាំង ក្នុងទីក្រុង Toulouse ដើម្បីស្វែងយល់ពីប្រព័ន្ធគ្រប់គ្រងទិន្នន័យអាកាសធាតុនិងព្យាករណ៍អាកាសធាតុ ប្រព័ន្ធគ្រប់គ្រងទិន្នន័យធនធានទឹក និងស្វែងយល់​ពី​បច្ចេកវិទ្យា សម្ភារបរិក្ខារទំនើប និងបទដ្ឋានបច្ចេកទេសក្នុងកិច្ចដំណើរការ និងគ្រប់គ្រងមជ្ឈមណ្ឌល។  

តាមសំណេរនៅលើទំព័រហ្វេសប៊ុកផ្លូវការរបស់ក្រសួងធនធានទឹក និងឧតុនិយម  លោករដ្ឋមន្ត្រី និងគណៈប្រតិភូក៏បានទៅទស្សនកិច្ចទីតាំងផលិត និងដំឡើងរ៉ាដាអាកាសធាតុរបស់ក្រុមហ៊ុន Sterela ផងដែរ។

ទស្សនកិច្ចរបស់រដ្ឋមន្ត្រីក្រសួងធនធានទឹក និងឧតុនិយមកម្ពុជា និងគណៈប្រតិភូបានទទួលការស្វាគមន៍យ៉ាងកក់ក្តៅបំផុតពីលោក Robert Bousquet ប្រធានក្រុមហ៊ុន Sterela Doppler Radar លោក Patric Benichou ប្រធានទីភ្នាក់ងារឧតុនិយមអន្តរជាតិបារាំង និងលោក Jean-Marie ប្រធានទីភ្នាក់ងារឧតុនិយមនៃសាធារណរដ្ឋបារាំង។

ក្នុងដំណើរទស្សនកិច្ច លោក ថោ ជេដ្ឋា បានគូសបញ្ជាក់ជូនភាគីបារាំងថា រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយភាពឈ្លាសវៃ និងមានយុទ្ធសាស្ត្រច្បាស់លាស់របស់សម្តេចមហាបវរធិបតីនាយករដ្ឋមន្ត្រីនៃព្រះរាជាណាចក្រកម្ពុជា ក្រសួងធនធានទឹក និងឧតុនិយម បាននិងកំពុងដើរតួយ៉ាងសំខាន់ក្នុងការលើកកម្ពស់ព័ត៌មាន និងការគ្រប់គ្រងទិន្នន័យធនធានទឹកដែលជាឆ្អឹងខ្នងនៃការវិនិយោគដោយចីរភាព និងភាពធន់នឹងអាកាសធាតុ ប្រកបដោយប្រសិទ្ធភាព និងប្រសិទ្ធផល ឈានឆ្ពោះទៅការពារ និងកាត់បន្ថយការខូចខាតដល់ផលិតកម្មកសិកម្ម ហេដ្ឋារចនាសម្ព័ន្ធជនបទ និងអាយុជីវិតមនុស្សសត្វ ដែលអាចកើតមានឡើងពីគ្រោះមហន្តរាយធម្មជាតិ។

ទន្ទឹមនឹងនេះ លោករដ្ឋមន្ត្រីក៏បានជម្រាបភាគីបារាំងពីគម្រោងរបស់ក្រសួងធនធានទឹក និងឧតុនិយមដែលកំពុងអភិវឌ្ឍមជ្ឈមណ្ឌលជាតិគ្រប់គ្រងទិន្នន័យធនធានទឹក(NWRMDC) ក្រោមការគាំទ្រយ៉ាងខ្លាំងពីធនាគារអភិវឌ្ឍន៍អាស៊ី(ADB) និងធនាគារវិនិយោគអឺរ៉ុប(EIB) ដែលមកទល់ពេលនេះការងារសាងសង់អគារមជ្ឈមណ្ឌលកម្ពស់៥ជាន់សម្រេចបាន៦០% និងគ្រោងបញ្ចប់ជាស្ថាពរនៅដំណាច់ឆ្នាំ២០២៤នេះ។

លោករដ្ឋមន្ត្រីបញ្ជាក់ថា គណៈប្រតិភូកម្ពុជាទទួលបានបទពិសោធន៍ និងចំណេះដឹងថ្មីបន្ថែមយ៉ាងច្រើនពីដំណើរទស្សនកិច្ចទៅកាន់ប្រទេសបារាំង ដើម្បីជាទុនឈានទៅបង្កើតមជ្ឈមណ្ឌលផ្ទុកទិន្នន័យជលសាស្រ្ត-ឧតុនិយម ជាពិសេសបានដឹងច្បាស់អំពីតម្រូវការចាំបាច់ ដើម្បីឱ្យមជ្ឈមណ្ឌលផ្ទុកទិន្នន័យអាចដំណើរការដោយរលូន និងមានប្រសិទ្ធភាព។ ជាមួយគ្នានេះនឹងអាចប្រើប្រាស់ទិន្នន័យពីការព្យាករសម្រាប់អន្តរវិស័យដូចជា អាកាសចរណ៍ នាវាចរណ៍ យោធា និងការកាត់បន្ថយបាននូវគ្រោះមហន្តរាយធម្មជាតិមានគ្រោះទឹកជំនន់ គ្រោះរាំងស្ងួត និងខ្យល់ព្យុះជាដើម តាមរយៈប្រព័ន្ធប្រកាសអាសន្ន និងការជូនដំណឹងជាមុន។

គួរឱ្យដឹងថ ក្រុមហ៊ុន Sterela Doppler Radar ជាក្រុមហ៊ុនធំមួយដែលធ្វើការពាក់ព័ន្ធនឹងសេវាកម្មឧតុនិយម ក្នុងនោះរួមមានការផលិតស្ថានីយឧតុនិយមស្វ័យប្រវត្តិ ការដំឡើងស្ថានីយ និងការងារថែទាំស្ថានីយ។ ដោយឡែក ទីភ្នាក់ងារឧតុនិយមបារាំងអន្តរជាតិ និងទីភ្នាក់ងារឧតុនិយមបារាំងជាទីភ្នាក់ងារមានជំនាញឈានមុខគេបង្អស់ក្នុងពិភពលោកលើការផ្តល់សេវាកម្ម និងបណ្តុះបណ្តាលអ្នកជំនាញលើវិស័យឧតុនិយម-ជលសាស្រ្ត៕