មេបញ្ជាការសឹករងបាត់ដំបងបានទទួលមរណភាពដោយជំងឺគាំងបេះដូង

លោកឧត្តមសេនីយ៍ត្រី ហួម ខ្វែក មេបញ្ជាការតំបន់ប្រតិបត្តិការសឹករងបាត់ដំបង បានទទួលមរណ:ភាព នៅព្រឹកថ្ងៃសុក្រ ទី១៩ ខែមេសា ឆ្នាំ២០២៤ ដោយជំងឺគាំងបេះដូង។

យោងតាមការលើកឡើងរបស់មន្ត្រីសឹករងខេត្តបានបញ្ជាក់ថា នៅម៉ោងប្រហែល១០ព្រឹក ថ្ងៃទី១៩ ខែមេសានេះ គឺលោកឧត្តមសេនីយ៍ត្រី ហួម ខ្វែក បានដើរចេញពីសាលប្រជុំនាទីក្រុងភ្នំពេញ ហើយក៏មានសភាពថប់ៗដង្ហើម។ ភ្លាមៗនោះដែរកម្លាំងដែលនៅទីនោះបានដឹកបញ្ជូនលោកទៅកាន់មន្ទីរពេទ្យដើម្បីសង្គ្រោះបន្ទាន់។ ប៉ុន្តែជាអកុសលលោកបានទទួលមរណភាពនៅក្នុងមន្ទីរពេទ្យនោះតែម្ដង។

ឧត្តមសេនីយ៍ត្រី ហួម ខ្វែក មានជន្មាយុ ៦៦ឆ្នាំ ដោយក្រុមគ្រូពេទ្យបានអះអាងថា លោកមានជំងឺគាំងបេះដូង។ ប្រភពបានបញ្ជាក់បន្ថែមថា នៅពេលនេះកម្លាំងយោធា (ង 70) កំពុងដឹកបញ្ជូនសពលោកឧត្តមសេនីយ៍ត្រី ហួម ខ្វែក ពីទីក្រុងភ្នំពេញ ទៅកាន់ខេត្តបាត់ដំបង ដោយកម្លាំងសឹករងខេត្តកំពុងរៀបចំរោងបុណ្យចាំទទួលនៅក្នុងគេហដ្ឋានរបស់លោកផ្ទាល់ ដែលស្ថិតនៅក្នុងភូមិវត្តមិម ឃុំអូរដំបូង១ ស្រុកសង្កែ ខេត្តបាត់ដំបង៕

អត្ថបទ៖ សោ និយមរ័ត្ន