ព័ត៌មានជាតិ

វត្តព្រះពោធិសត្វ លើឧទ្យានជាតិគិរីរម្យមានឆ្លាក់រូបចម្លាក់បង្កប់ស្នាដៃសិល្បៈ ទទួលការសរសើរពីរដ្ឋមន្រ្តីក្រសួងបរិស្ថាន

បានផុស

១១ ខែ មុន

នៅ

ថ្ងៃអង្គារ ២៣ មេសា ២០២៤

ដោយ

លោក អ៊ាង សុផល្លែត រដ្ឋមន្ត្រីក្រសួងទេសចរណ៍ គាំទ្រការអភិវឌ្ឍទេសចរណ៍វប្បធម៌ធម្មជាតិលើភ្នំទេវៈនៃវត្តព្រះពោធិសត្វ ក្នុងឧទ្យានជាតិព្រះសុរាម្រឹតកុសុមៈគិរីរម្យ នៅក្នុងភូមិសាស្រ្តខេត្តកំពង់ស្ពឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ាង សុផល្លែត ក្នុងដំណើរទស្សនកិច្ចកាលពីថ្ងៃទី២១ ខែមេសា ឆ្នាំ២០២៤ បានកោតសរសើរស្នាដៃសិល្បៈលើផ្ទាំងថ្ម ដែលមានរៀបរាប់រឿងទេវកថា និងប្រវត្តិសាស្រ្តដូនតារបស់ខ្មែរលើភ្នំទេវៈ ដែលមានទីតាំងស្ថិតនៅវត្តព្រះពោធិសត្វ នៅក្នុងឧទ្យានជាតិព្រះសុរាម្រិតកុសុមៈគិរីរម្យ ក្នុងភូមិសាស្រ្តខេត្តកំពង់ស្ពឺ។

ក្នុងឱកាសនោះ លោក រដ្ឋមន្ត្រីបានគាំទ្រឱ្យមន្ត្រីជំនាញសិក្សារៀបចំ ឱ្យក្លាយជាតំបន់ទេសចរណ៍វប្បធម៌ធម្មជាតិមួយ និងក្លាយជារបៀងទេសចរណ៍លំហែបៃតង នៅក្នុងតំបន់ការពារធម្មជាតិឧទ្យានជាតិ «គីរីរម្យ» ដើម្បីទាញទាញបន្ថែមអ្នកទេសចរមកទស្សនា និងបង្កើនចំណូលជីវភាពរបស់ប្រជាពលរដ្ឋមូលដ្ឋានថែមទៀត ជាពិសេសគិតគូរដល់បរិស្ថាននិងធនធានធម្មជាតិ។

កន្លងមកតំបន់ភ្នំទេវៈនៃវត្តព្រះពោធិសត្វ មានការដាប់ឆ្លាក់ជារូបចម្លាក់បែបសិល្បៈ វប្បធម៌ និងប្រវត្តិសាស្រ្ត ដ៏ល្អវិចិត្រជាប់នឹងផ្ទាំងថ្ម ដែលជាទីសម្រាប់សក្ការបូជា និងទស្សនាកម្សាន្ត របស់ភ្ញៀវទេចរជាតិ និងអន្តរជាតិ។

រូបចម្លាក់លើថ្មធម្មជាតិ មានចម្រុះដែលជាការចម្លងទៅតាមរូបចម្លាក់នៅសម័យអង្គរ ហើយក្នុងនោះក៏មានមួយផ្នែកជាសម័យមុនអង្គរ និងសម័យកណ្ដាល។ បន្ថែមពីនោះ រូបចម្លាក់បែបព្រហ្មញ្ញសាសនា មានព្រះសិវៈ ព្រះវិស្ណុ និងព្រះព្រហ្ម ហើយចម្លាក់បែបព្រះពុទ្ធសាសនា ទាំងនិកាយមហាយាន និងហីនយាន ក៏បានឆ្លាក់នៅលើផ្ទាំងថ្មនៅទីនោះដែរ៕