ព័ត៌មានជាតិ

ឯកឧត្ដម ហ៊ុន ម៉ានី ៖ មរណភាពរបស់ សាស្ត្រាចារ្យ សំបូរ មាណ្ណារ៉ា ជាការបាត់បង់ធនធានមនុស្សដ៏មានតម្លៃបំផុតសម្រាប់សង្គមជាតិកម្ពុជា

បានផុស

៩ ខែ មុន

នៅ

ថ្ងៃចន្ទ ២២ មេសា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ លើកឡើងថា មរណភាពរបស់ ឯកឧត្ដមសាស្ត្រាចារ្យ សំបូរ មាណ្ណារ៉ា គឺជាការបាត់បង់នូវធនធានមនុស្សដ៏មានតម្លៃបំផុតសម្រាប់សង្គមជាតិកម្ពុជាទាំងមូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ បន្ទាប់ពី ឯកឧត្ដម ហ៊ុន ម៉ានី បានដឹកនាំប្រតិភូ អញ្ជើញគោរពវិញ្ញាណក្ខន្ធ ឯកឧត្ដមសាស្ត្រាចារ្យ សំបូរ មាណ្ណារ៉ា ទីប្រឹក្សាផ្ទាល់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា សមាជិករាជបណ្ឌិតសភាកម្ពុជា ព្រឹទ្ធសកលវិទ្យាធិការរង នៃសាកលវិទ្យាល័យបញ្ញាសាស្ត្រកម្ពុជា ប្រធានមជ្ឈមណ្ឌលសិក្សាអំពីខ្មែរ និងជាសាស្ត្រាចារ្យថ្នាក់ខេមរវិទ្យា និងប្រវត្តិសាស្ត្រខ្មែរ ដែលបានទទួលមរណភាព កាលពីថ្ងៃទី ២០ ខែមេសា ឆ្នាំ ២០២៤ វេលាម៉ោង ០៥ និង ៤០ នាទីព្រឹក ក្នុងជន្មាយុ ៦៧ ឆ្នាំ ដោយរោគាពាធ កាលពីព្រឹកថ្ងៃទី ២២ ខែមេសា ឆ្នាំ ២០២៤។

ឯកឧត្ដម ហ៊ុន ម៉ានី បានឲ្យដឹងថា នៅព្រឹកថ្ងៃទី ២២ ខែមេសា ឆ្នាំ ២០២៤ ឯកឧត្ដម និងក្រុមការងារ បានចូលរួមគោរពវិញ្ញាណក្ខន្ធ ឯកឧត្ដមសាស្ត្រាចារ្យ សំបូរ មាណ្ណារ៉ា ទីប្រឹក្សាផ្ទាល់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាសាស្ត្រាចារ្យខេមរវិទ្យា និងប្រវត្តិសាស្ត្រ ដែលបានទទួលមរណភាព កាលពីថ្ងៃទី ២០ ខែមេសា ឆ្នាំ ២០២៤ វេលាម៉ោង ៥ និង ៤០ នាទី ព្រឹក នៅគេហដ្ឋាន នៃសព។

ឯកឧត្ដម ហ៊ុន ម៉ានី បានឲ្យដឹងបន្តថា នាឱកាសប្រកបដោយសមានទុក្ខដ៏ក្រៀមក្រំនេះ ក្នុងនាមសហការី និង ឯកឧត្ដមផ្ទាល់ ឯកឧត្ដម សូមចូលរួមចែករំលែកនូវមរណទុក្ខ ជាមួយ លោកជំទាវ បុត្រា បុត្រី និង ចៅៗ ព្រមទាំងបងប្អូន កូនក្មួយ និងក្រុមគ្រួសារទាំងអស់ នៃសព ប្រកបដោយក្តីក្ដុកក្ដួលជាទីបំផុត និងសូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្ដមសាស្ត្រាចារ្យ សំបូរ មាណ្ណារ៉ា ទៅកាន់សុគតិភព កុំបីឃ្លៀងឃ្លាតឡើយ។

ជាមួយនោះ ឯកឧត្ដមឧបនាយករដ្ឋមន្ត្រី លើកឡើងថា «មរណភាពរបស់ ឯកឧត្ដមសាស្ត្រាចារ្យ សំបូរ មាណ្ណារ៉ា គឺជាការបាត់បង់នូវ ស្វាមី បិតា ដែលប្រកបដោយព្រហ្មវិហារធម៌មួយរូប ដែលបានចិញ្ចឹមបីបាច់ថែរក្សា និងអប់រំទូន្មានកូនចៅប្រកបដោយគន្លងធម៌ ក៏ជាការបាត់បង់នូវធនធានមនុស្សដ៏មានតម្លៃបំផុតសម្រាប់សង្គមជាតិកម្ពុជាទាំងមូល»។

ឯកឧត្ដមឧបនាយករដ្ឋមន្ត្រី លើកឡើងបន្តថា បើទោះបីជា ឯកឧត្ដមសាស្ត្រាចារ្យ សំបូរ មាណ្ណារ៉ា បានឃ្លាតកាយឆ្ងាយហើយក្ដី ប៉ុន្តែពាក្យអប់រំ ទូន្មាន ប្រៀនប្រដៅ ពុទ្ធិ គំរូវីរភាព និងពលិកម្មដ៏ធំធេងពេញមួយជីវិតរបស់លោកសាស្ត្រាចារ្យ ក្នុងបុព្វហេតុជាតិមាតុភូមិ គឺនៅតែដក់ជាប់ក្នុងបេះដូង និងការចងចាំរបស់យុវជនខ្មែរគ្រប់រូបជាដរាប។

គួរជម្រាបថា សាស្ត្រាចារ្យផ្នែកប្រវត្តិសាស្ត្រ ឯកឧត្ដម សំបូរ មាណ្ណារ៉ា បានទទួលមរណភាព កាលពីព្រឹកថ្ងៃសៅរ៍ ទី ២០ ខែមេសា ឆ្នាំ ២០២៤ ក្នុងជន្មាយុ ៦៧ ឆ្នាំ ដោយរោគាពាធ។ មរណភាព ឯកឧត្ដមសាស្ត្រាចារ្យ សំបូរ មាណ្ណារ៉ា ជាការបាត់បង់ធនធានមនុស្សផ្នែកប្រវត្តិសាស្ត្រដ៏ខ្លាំងពូកែមួយរូប។ ក្នុងនាម សាស្ត្រាចារ្យ ឯកឧត្ដម ក៏បានបន្សល់ស្នាដៃ ផ្តល់ពុទ្ធិដល់កុលបុត្រខ្មែរជាច្រើនរូប ផងដែរ។

សូមបញ្ជាក់ដែរថា សពរបស់ ឯកឧត្ដមសាស្ត្រាចារ្យ សំបូរ មាណ្ណារ៉ា ត្រូវតម្កល់ទុកធ្វើបុណ្យតាមប្រពៃណីព្រះពុទ្ធសាសនា នៅផ្ទះលេខA០១ ផ្លូវ ៥A សង្កាត់សំបួរ ខណ្ឌដង្កោ រាជធានីភ្នំពេញ៕

អត្ថបទ ៖ ពិសី