ព័ត៌មានជាតិ

អ្នកនាំពាក្យ ៖ ការបណ្ដុះបណ្ដាលជំនាញវគ្គទី ២ ដល់យុវជនក្រីក្រ និងងាយរងហានិភ័យ ចាប់ផ្ដើមបើកបង្រៀនជាបណ្តើរៗ ហើយ

បានផុស

៨ ខែ មុន

នៅ

ថ្ងៃចន្ទ ២២ មេសា ២០២៤

ដោយ

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ២២ មេសា នេះថា កម្មវិធីបណ្ដុះបណ្ដាលដល់យុវជនមកពីគ្រួសារក្រីក្រ និងងាយរងហានិភ័យដំណាក់កាលទី ២ បានចាប់ផ្តើមបង្រៀនជាបណ្តើរៗ ហើយ ខណៈដំណាក់កាលទី ១ នឹងបញ្ចប់នៅខែឧសភា ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន បានបន្តថា រាជរដ្ឋាភិបាល បានប្រកាសបើកកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងងាយរងហានិភ័យ ចំនួន ១,៥ លាននាក់ ជាផ្លូវការ កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ ហើយក្រសួងការងារ និងបណ្ដុះបណ្ដាលវិជ្ជាជីវៈបានប្រកាសបើកបវេសនកាលទូទាំងប្រទេស កាលពីទី ១៥ ខែមករា ឆ្នាំ ២០២៤ ដើម្បីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងងាយរងហានិភ័យ ដោយក្នុងដំណាក់កាលទី ១ ក្រសួងបានរៀបចំឲ្យមានថ្នាក់សិក្សារហូតចំនួន ៥៤៤ ថ្នាក់ ស្មើនឹងយុវជនចំនួន ១៦ ២៦៤ នាក់ ស្រី ៥ ២២០ នាក់។ វគ្គបណ្ដុះបណ្ដាលនេះដែរ បានកំណត់យកមុខជំនាញចំនួន ៣៨ នៅក្នុងវិស័យអាទិភាពចំនួន ១០ រួមមាន ៖ សំណង់ ,អគ្គិសនី និងថាមពល ,បរិក្ខារត្រជាក់ និងកម្តៅ ទេសចរណ៍ , មេកានិកទូទៅ/មេកានិករថយន្ត , សេវាកម្ម , កសិកម្ម និង កសិ-ឧស្សាហកម្ម , កម្មន្តសាល , អេឡិចត្រូនិក និងធុរកិច្ច និងព័ត៌មានវិទ្យា។

លោក កត្តា អ៊ន បានបន្តទៀតថា តាមគម្រោងកម្មវិធីបណ្ដុះបណ្ដាលវគ្គទី ១ នឹងត្រូវបញ្ចប់នៅខែក្រោយ។ រីឯវគ្គទី ២ បានចាប់ផ្តើមរៀនជាបន្តបន្ទាប់នៅតាមសាលាបណ្ដុះបណ្ដាលនានា ប្រសិនបើមានសិស្សចន្លោះពី ២០ ទៅ ៣០ នាក់ នឹងបើកថ្នាក់រៀនហើយ។

លោក កត្តា អ៊ន បានអំពាវនាវដល់យុវជនមកពីគ្រួសារក្រីក្រ និងងាយរងហានិភ័យ បន្តចុះឈ្មោះចូលរៀនឱ្យបានច្រើនបន្ថែមទៀត ព្រោះថាការចុះឈ្មោះចូលរៀនជំនាញនេះ គឺមិនតម្រូវឱ្យបង់ប្រាក់អ្វីឡើយ ហើយថែមទទួលបានថវិកាប្រចាំខែចំនួន ២៨ ម៉ឺនរៀល សម្រាប់ដោះស្រាយជីវភាពពេលកំពុងសិក្សាទៀតផង។ ចំណែកយុវជនមកពីគ្រួសារទូទៅ ការចុះឈ្មោះចូលរៀនក៏អត់គិតថ្លៃដែរ តែមិនទទួលបានថវិកាប្រចាំខែដូចយុវជនមកពីគ្រួសារក្រីក្រ និងងាយរងហានិភ័យនោះទេ។

គួរបញ្ជាក់ថា គិតត្រឹមថ្ងៃទី ២៩ ខែមីនា ឆ្នាំ ២០២៤ មានអ្នកចុះឈ្មោះចូលរៀនជំនាញវិជ្ជាជីវៈសរុបចំនួន ២៩ ៥៧៨ នាក់ (ស្រី ១០ ៤៣២ នាក់) ក្នុងនោះ រាជធានីភ្នំពេញ ចំនួន ១០ ៩៨៥ នាក់ (ស្រី ៣ ៧៣៣ នាក់), ខេត្តបាត់ដំបង ចំនួន ៣ ៧១២ នាក់ (ស្រី ១ ៥៨០ នាក់), ខេត្តសៀមរាបចំនួន ២ ១១៤ នាក់ (ស្រី ៥៨១ នាក់), ខេត្តព្រះសីហនុចំនួន ១ ១៦៥ នាក់ (ស្រី ៤១៤ នាក់), ខេត្តកំពតចំនួន ១ ០២៨ នាក់ (ស្រី ២៨០ នាក់), និងបណ្ដាខេត្តផ្សេងៗ ចំនួន ១០ ៥៧៤ នាក់ (ស្រី ៣ ៨៤៤ នាក់)៕

អត្ថបទ ៖ សំអឿន