ផ្លូវក្រាលកៅស៊ូមួយខ្សែ ក្លាយទៅជាផ្លូវដីហុយជង្ហុកធំៗ ពលរដ្ឋស្នើ​អាជ្ញាធរជួយជុសជុល​ឡើងវិញ

អាជ្ញាធរបានត្រឹមតែឆ្លើយថា ជាផ្លូវគម្រោងរបស់មន្ទីរអភិវឌ្ឍន៍ជនបទ ខណះផ្លូវមួយខ្សែដែលតភ្ជាប់ពីផ្លូវជាតិលេខ ៥៦ ត្រង់ចំណុច​ខ្លោងទ្វារវត្តរលំជ្រៃដល់ភូមិគោកឋិន ស្រុកថ្មពួក ខេត្តបន្ទាយមានជ័យមានប្រវែងជាង ៥ ពាន់ម៉ែត្រដែលជាប្រភេទ​ផ្លូវក្រាលកៅស៊ូកំពុងរងការខូចខាតក្លាយទៅជាផ្លូវដីហុយជង្ហុកធំ ធ្វើឲ្យ​ប្រជាពលរដ្ឋជួបការលំបាកក្នុងការធ្វើដំណើរ​​ទៅមកនិងដឹកកសិផល។

លោក ហួន ហាំង ពលរដ្ឋ​មាន​ទីលំនៅតាមផ្លូវខាងលើបាន​ឲ្យ​ដឹងថា ផ្លូវមួយខ្សែនេះមានប្រវែង​ជាង ៥ ពាន់ម៉ែត្ររងការ​ខូចធ្ងន់​ធ្ងរ​ជាង ២ ឆ្នាំមកហេីយ មិនឃើញខាងណាមកធ្វើឡើងវិញទេ ធ្វើ​ឲ្យ​ពលរដ្ឋជួបការលំបាកធ្វើដំណើរជាពិសេសអ្នកនៅ​សង​​ខាងផ្លូវរងនៅដីហុយជាប្រចាំនៅខែប្រាំ។ តែបើខែវស្សាវិញកាន់តែពិបាកធ្វើដំណើរដោយជង្ហុកធំៗទឹកដក់ពេញផ្លូវ។

ដោយសារតែមិនមានការអេីពេីយកចិត្តទុកដាក់ពីអាជ្ញាធរ ពលរដ្ឋបានរៃគ្នាប្រមូលថវិកាជួសជុលតែធ្វេីមិនបាន​ប៉ុន្មាន​ ក៏​ខូចទៅវិញព្រោះនៅទីនេះសំបូរឡានស្រូវ និងឡានដឹងដំឡូបើក​ឆ្លងកាត់ បេីជួសជុលមិនតាមលក្ខណះបច្ចេកទេសទេគឺមិន​ជាប់​ឡេីង។

លោកក៏​បាន​អំពាវនាវដល់អាជ្ញាធរពាក់ពាន្ធ័មេត្តាជួយជួសជុលផ្លូវនេះឡេីងវិញ ដេីម្បីឲ្យពលរដ្ឋមាណជា ៥ ភូមិមានដូចជា ភូមិកាប់ចោរ.ភូមិគោកស្វាយ .ភូមិរលំជ្រៃ .ភូមិថ្មី .និងភូមិគោកឋិន បានធ្វេីដំណេីរស្រួលជាពិសេសសិស្សានុសិស្ស​បានធ្វេី​ដំណេីរទៅសាលា មានភាពងាយស្រួល និងការទៅរកសេវាព្យាបាលសុខភាពឲ្យបានទាន់ពេលវេលាផងដែរ។

ជាមួយបញ្ហាផ្លូវនេះ លោក អែម សុខា អភិបាលស្រុកថ្មពួកទទួលស្គាល់ ផ្លូវ​មួយ​ខ្សែ​ដែលពលរដ្ឋ​លើកឡើង​ពិតជារងការ​ខូចខាត​ពិតមែន។

លោកអភិបាលស្រុក​បានបញ្ជាក់ថា ផ្លូវ​ប្រវែងជាង ​៥ ពាន់ម៉ែត្រពីចំណុចខ្លោងទ្វាវត្តរលំជ្រៃទៅដល់ភូមិគោកកឋិននោះ ជា​គម្រោងរបស់មន្ទីអភិវឌ្ឍន៍ និងជនបទខេត្តបន្ទាយមានជ័យ ហើយលោកក៍បានទៅជួបពិភាក្សាជាមួយខាងមន្ទីរជំនាញ​តើ​ជួសជុលឬកសាង​នៅពេលណា ព្រោះឃើញជាក់ស្តែងហើយផ្លូវបានរងការខូចខាត។

លោកបន្ត​ថា ជុំវិញផ្លូវជាគម្រោងរបស់មន្ទីរអភិវឌ្ឍន៍ជនបទក្នុងខេត្តបន្ទាយមានជ័យ ស្ទើរតែខូចគ្រប់ខ្សែដោយខាងមន្ទីរអភិវឌ្ឍន៍ក៍បានធ្វើរបាយការណ៍ស្នើទៅក្រសួងអភិវឌ្ឍន៍ជនបទដែរ តែខាងក្រសួងមិនធ្លាក់គម្រោងមកឡើយ។

អត្ថបទ៖ អពៅ