កម្ពុជា ជំរុញឱ្យ តុងហ្គា ចូលរួមជារដ្ឋភាគីនៃអនុសញ្ញាអូតាវ៉ា ស្តីពីការហាមប្រើប្រាស់មីនប្រឆាំងម​នុស្សជាតិ

ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នៅថ្ងៃទី ២៣ ខែ មេសានេះ បានជួបប្រជុំទ្វេភាគីជាមួយ លោកស្រី Fekitamoeloa Katoa ‘Utoikamanu រដ្ឋមន្រ្តីនៃព្រះរាជាណាចក្រតុងហ្គា នៅឯទីក្រុងបាងកក ប្រទេសថៃ ដើម្បីស្នើសុំឱ្យ តុងហ្គា ពិចារណាចូលរួមជារដ្ឋភាគីនៃអនុសញ្ញាហាមការប្រើប្រាស់មីនប្រឆាំងមនុស្ស(អនុសញ្ញាអូតាវ៉ា)។

ការកៀរគរសមាជិកពីប្រទេសនានាឱ្យចូលរួមជារដ្ឋភាគីនៃអនុសញ្ញានេះ ក្នុងខណៈពេលដែលកម្ពុជាកំពុងធ្វើប្រធាន និងម្ចាស់ផ្ទះរៀបចំកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន ប្រព្រឹត្តិទៅចាប់ពីថ្ងៃទី២៥-២៩ ខែវិច្ឆិកា ឆ្នាំ២០២៤ ខាងមុខនេះ។

ព្រះរាជាណាចក្រតុងហ្គា គឺជាប្រទេសមួយក្នុងចំណោមប្រទេសដីកោះចំនួន ៣ ស្ថិតក្នុងតំបន់ប៉ាស៊ីហ្វិក ដែលពុំទាន់បានក្លាយជារដ្ឋភាគីនៃអនុសញ្ញាអូតាវ៉ា រួមមានតុងហ្គា កោះម៉ាសាល់ និងមីក្រូនេស៊ី ដែលកម្ពុជាបានចាត់ទុកជារដ្ឋអាទិភាព និងមានលទ្ធភាពគ្រប់គ្រាន់ ចូលជារដ្ឋភាគីនៃអនុសញ្ញាអូតាវ៉ា។
ក្នុងនាមកម្ពុជាជាប្រធានអនុសញ្ញាអូតាវ៉ាឆ្នាំ២០២៤ និងតាងនាមរាជរដ្ឋាភិបាលកម្ពុជាលោក លី ធុជ បានស្នើសុំឱ្យប្រទេសតុងហ្គាពិនិត្យលទ្ធភាព និងពិចារណាក្នុងការចូលរួមជារដ្ឋភាគីនៃអនុសញ្ញាអូតាវ៉ា។

ជាការឆ្លើយតប លោកស្រី Fekitamoeloa Katoa ‘Utoikamanu នឹងលើកយកសំណើរបស់កម្ពុជា ដាក់ជូនរាជរដ្ឋាភិបាលតុងហ្គា ដើម្បីពិនិត្យ និងពិចារណាលើការចូលរួមជារដ្ឋភាគីនៃអនុសញ្ញាអូតាវ៉ាឆ្នាំ២០២៤ នេះ៕