លោក គង់ សភា គឺជាអ្នកនយោបាយប្រឆាំងទី១ ទទួលបានការលើកលែងទោសពីព្រះរាជា តាមរយៈការជួយពីសម្ដេចធិបតី

នៅថ្ងៃទី២៤ ខែមេសា ឆ្នាំ២០២៤ លោក គង់ សភា បានក្លាយជាអ្នកនយោបាយប្រឆាំងទី១ដែលទទួលបានការអភ័យទោស និងលើកលែងទោសពីព្រះមហាក្សត្រ ព្រះបាទ សម្ដេចព្រះបរមនាថ នរោត្តម សីហមុនី  តាមរយៈការជួយអន្តរាគមន៍ពីសម្តេចធិបតី ហ៊ុន ម៉ាណែត ក្នុងនាមជានាយករដ្ឋមន្រ្តីនៃកម្ពុជានាអាណត្តិទី៧នេះ។

តាមព្រះរាជក្រឹត្យ ព្រះមហាក្សត្រទ្រង់ត្រាប់បង្គាប់ឱ្យលើកលែងទោសចំពោះទណ្ឌិត គង់ សភា ភេទប្រុស កើតឆ្នាំ១៩៧៥ ដែលត្រូវបានតុលាការសម្រេចផ្ដន្ទាទោសដាក់ពន្ធនាគារចំនួន៨ឆ្នាំ តាមអំណាចសាលក្រមព្រហ្មទណ្ឌស្ថាពរលេខ ៤១១ “ត” ក្រ៧ ចុះថ្ងៃទី៧ ខែមិថុនា ឆ្នាំ២០២២ របស់សាលាដំបូងរាជធានីភ្នំពេញ។

គួរជម្រាបថា កាលពីថ្ងៃទី១៨ ខែមេសា កន្លងទៅ សម្ដេចតេជោ ហ៊ុន សែន បានទម្លាយនូវលិខិតសុំទោសមួយច្បាប់ ដែលក្នុងលិខិតនោះ លោក គង់ សុភា  បានស្នើសុំកិច្ចអន្តរាគមន៍ពីសំណាក់សម្ដេចធិបតី នាយករដ្ឋមន្ត្រី ជួយទូលថ្វាយព្រះមហាក្សត្រឱ្យលើកលែងទោសទណ្ឌទាំងឡាយដល់ខ្លួន ដើម្បីអាចវិលត្រឡប់ចូលប្រទេសកម្ពុជា និងអាចត្រឡប់ជួបជុំក្រុមគ្រួសារ បានមើលថែឪពុកម្តាយចាស់ជរាឡើងវិញ។តាមរយៈលិខិតមួយច្បាប់របស់លោក គង់ សភា គឺលោកបានទទួលស្គាល់នូវទោសកំហុសកន្លងមក និងបានសុំទោសចំពោះសម្ដេចតេជោ និងសម្ដេចធិបតី។

ក្រោយទទួលបាន លិខិតពីលោក​ គង់ សភា សម្ដេចធិបតី ហ៊ុន ម៉ាណែត បានប្រកាសស្វាគមន៍លោក គង់ សុភា ក៏ដូចជា សន្យាថា នឹងចាត់ចែងតាមនីតិវិធី និងទូលថ្វាយទៅព្រះមហាក្សត្រសុំលើកលែងទោស ដើម្បីលោក គង់ សុភា អាចវិលត្រឡប់មកកាន់មាតុប្រទេសវិញ។

នៅចុងបញ្ចប់នៃសំណេរលើទំព័រហ្វេសប៊ុក ដែលបង្ហោះនៅល្ងាចថ្ងៃទី១៨ ខែមេសា នោះ សម្ដេចធិបតី ហ៊ុន ម៉ាណែត បានដាក់ក្ដីសង្ឃឹមថា សម្ដេច នឹងមានឱកាសជួបសន្ទនាជាមួយកូនប្រុសលោក គង់ គាំ រូបនេះ នៅពេលខាងមុខ៕