ក្រុមហ៊ុន ២ ទទួលបានសិទ្ធិសាងសង់ផ្លូវបេតុង ២ ខ្សែក្នុងក្រុងសួង

រដ្ឋបាលក្រុងសួងនៅព្រឹកថ្ងៃទី ២៥ ខែមេសា ឆ្នាំ ២០២៤ បានជ្រើសរើសដាក់ឲ្យមានការប្រកួតប្រជែង ផ្តល់សិទ្ធិដល់ក្រុមហ៊ុនទាំងអស់ ប្រកប​ដោយតម្លាភាព និងមានលក្ខណៈទីផ្សារសេរីច្បាស់លាស់ ក្នុងការដេញថ្លៃគម្រោងផ្លូវបេតុងអាមេចំនួន២ខ្សែ ខណៈមានក្រុមហ៊ុនចំនួន២ ត្រូវបានជ្រើសរើសក្នុងចំណោមក្រុមហ៊ុនចូលរួមដេញថ្លៃចំនួន ៩។

លោក សឹន គិរីវ៉ាន់ឌី នាយកទីចាត់ការផែនការ វិនិយោគខេត្តបានថ្លែងថា អ្នកទទួលការសុទ្ធតែជាមនុស្សមានធនធាន និងមានបទពិសោធន៍រាប់ឆ្នាំមកហើយ ការដេញថ្លៃគម្រោងគឺតម្រូវឲ្យអ្នកទទួលការណាដែលបានដាក់តម្លៃទាបជាងគេ នឹងទទួលបានសិទ្ធិក្នុងការសាងសង់ តែតម្លៃមិនមែនទាបរហូតដល់ផ្លូវគ្មានគុណភាពនោះទេ គឺធ្វើយ៉ាងណាឲ្យបានលទ្ធផល​ទាំងអស់គ្នា អ្នកទទួលការក៏ចំណេញ ផ្លូវក៏មានគុណភាព ដើម្បីផ្តល់ភាពងាយស្រួលដល់បងប្អូនប្រជាពលរដ្ឋក្នុងការអាស្រ័យផលលើផ្លូវនេះ។

លោក ជា ណារ៉ុន អភិបាលក្រុងសួង បានថ្លែងបញ្ជាក់ពីការប្រកួតប្រជែងថ្ងៃនេះ លទ្ធផលក្នុងសង្កាត់សួង/ក្រុងសួង ផ្លូវបេតុង១ខ្សែប្រវែង ២៤០ ម៉ែត្រ ទទឹង៦ម៉ែត្រ បានទៅក្រុមហ៊ុន ថេង រីតា ដែលមានតម្លៃប៉ាន់ស្មានជិត១៩៥លានរៀល ហើយតម្លៃដេញបាន ជិត១៩០លានរៀល។

រីឯនៅក្នុងសង្កាត់វិហារលង់ ផ្លូវប្រវែង២២០ម៉ែត្រ ទទឹង៦ម៉ែត្រ តម្លៃប៉ាន់ស្មានជិត១៧៩លានរៀល តម្លៃដេញ​១៧៣ លានរៀល បានទៅក្រុមហ៊ុន ហួត ឆៃលីម។

ចំពោះក្រុមហ៊ុនទាំងពីរបន្ទាប់ពីបានសិទិ្ធក្នុងការសាងសង់ហើយ ត្រូវរួសរាន់ប្រញាប់ដាក់គ្រឿងចក្រធ្វើទៅតាមកិច្ចសន្យា កុំអូសក្រឡានាំឲ្យខាតពេលវេលា គ្មានការលួចបច្ចេកទេស ធ្វើឲ្យទាន់សភាពការណ៍ ដើម្បីប្រគល់ផ្លូវជូនប្រជាពលរដ្ឋឲ្យពួកគាត់មានលទ្ធភាពអាស្រ័យផលលើផ្លូវនេះ។

ផ្លូវល្អអាចទទួលយកបាន ដោយមានការឯកភាពពីក្រុង គណៈកម្មការលទ្ធកម្មសង្កាត់ទាំងពីរ ទាំងខាងបច្ចេកទេស និងប្រជាពលរដ្ឋ នោះទើបជាភាពជោគជ័យរបស់យើងទាំងអស់គ្នា៕

សាន វិឡែម ២៥.៤.២០២៤