សម្ដេច ហ៊ុន ម៉ាណែត ស្នើឱ្យសិល្បករចងក្រងជាសមាគម ដើម្បីជួយគ្នាទៅវិញទៅមក

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើឱ្យសិល្បករ សិល្បការិនីចងក្រងជាសមាគម ឬចូលរួមជាសមាជិកនៅក្នុងសមាគមន៍គ្រប់ទម្រង់  ដើម្បីជួយគ្នាទៅវិញទៅមក ដូចដូនតាខ្មែរជួយគ្នាទៅវិញទៅមក។ សម្ដេចបានថ្លែងបែបនេះ នៅក្នុងពិធីសំណេះសំណាល ពិសាអាហារសាមគ្គី និងបំពាក់គ្រឿងឥស្សរិយយសជូនលោកគ្រូ អ្នកគ្រូ សិល្បករ សិល្បការិនី នាថ្ងៃទី២៥ ខែមេសា ឆ្នាំ២០២៤។

សម្ដេចធិបតី សង្កត់ធ្ងន់ដូច្នេះថា «ខ្ញុំសូមលើកទឹកចិត្តដល់សិល្បករ សិល្បការិនី គ្រប់ទម្រង់​ ចូលរួមចងក្រងជាសមាគម ឬចូលរួមជាមួយសមាជិកសមាគមន៍សិល្បគ្រប់ទម្រង់ ដើម្បីប្រសិទ្ធិភាពនៃការធ្វើការរួមគ្នា ក្នុងភាពជាបងប្អូន ដោយចេះជួយគ្នាទៅវិញទៅមក  ស្របតាមប្រពៃណីទំនៀមទម្លាប់ដូនតាយើង»។

ជាការកត់សម្គាល់នៅកម្ពុជា មានសមាគមសិល្បជាច្រើន ដែលបានបង្កើតឡើង ដោយសមាគមខ្លះក៏មានសកម្មភាព និងមានកេរ្ត៍ឈ្មោះខ្លាំង ឯសមាគមខ្លះក៏មិនមានកេរ្ត៍ឈ្មោះ ឬសកម្មភាពឡើយ។

ជាក់ស្ដែងសមាគមដែលមានកេរ្ត៍ឈ្មោះ និងមានសកម្មភាពជាងគេ ល្បីតាមបណ្ដាញសង្គមជាងគេ គឺមានតែសមាគមសិល្បករខ្មែរប៉ុណ្ណោះ នៅមួយរយចុងក្រោយនេះ។ សមាគមនេះ បង្កើតឡើងជាដំបូងនៅក្នុងឆ្នាំ២០០៦ សព្វថ្ងៃកំពុងត្រៀមបោះឆ្នោតជ្រើសរើសប្រធានថ្មី បន្ទាប់ពីអ្នកនាងចន ច័ន្ទលក្ខិណា ចប់អាណត្តិ។

កន្លងមក សមាគមសិល្បករខ្មែរ បានជួយរួបរួមសិល្បករខ្មែរ ដើម្បីជួយលើកស្ទួយទៅដល់វិស័យសិល្បៈខ្មែរ តាមរយៈការជួយទ្រទ្រង់ ជ្រោមជ្រែងគ្នាទៅវិញទៅមក ជួយជាថវិកាដល់សិល្បករ សិល្បការិនីចាស់ជរាជាដើម៕