សម្ដេចតេជោ ថា ធ្វើជាប្រធានកិត្តិយសសមាគមឧកញ៉ា មិនមែនជារឿងចៃដន្យទេ តែជាទំនុកចិត្ត

ក្នុងនាមជាប្រធានកិត្តិយស សម្ដេចតេជោ ហ៊ុន សែន បានអញ្ជើញជាអធិបតីក្នុងពិធីពិសាអាហារសាមគ្គីរបស់សមាគមឧកញ៉ាកម្ពុជា នៅល្ងាចថ្ងៃទី២៦ ខែមេសា ឆ្នាំ២០២៤នេះ។ ក្នុងពិធីនេះ សម្ដេចតេជោ បានបញ្ជាក់ថា ការធ្វើជាប្រធានកិត្តិយសមាគមឧកញ៉ាកម្ពុជាពេលនេះ មិនមែនជារឿងចៃដន្យនោះទេ ប៉ុន្តែជាការជឿទុកចិត្តលើការដឹកនាំរបស់សម្ដេច។

សម្ដេចតេជោ ហ៊ុន សែន ប្រធានព្រឹទ្ធសភា បានថ្លែងក្ដីរីករាយយ៉ាងដូច្នេះថា «ខ្ញុំពិតជារីករាយ ដែលទទួលបានជាមួយនឹងការអញ្ជើញឱ្យធ្វើជាប្រធានកិត្តិយស ហើយនេះ គួរតែបញ្ជាក់ថា​ ហេតុអ្វីបានជាខ្ញុំទទួលយកនូវតួនាទីជាប្រធានកិត្តិយសនៃសមាគមឧកញ៉ា»។

ក្នុងន័យនេះ សម្ដេចតេជោ បានបញ្ជាក់ថា នេះជាការផ្ដល់កិត្តិយសដល់សម្ដេច ជាមួយនឹងការជឿជាក់ទៅលើសមត្ថភាព និងការដឹកនាំរបស់សម្ដេច ក្នុងរយៈពេលប្រមាណជាង ៤៥ឆ្នាំមកនេះ ដែលវាមិនមែនជាការចៃដន្យទេ។ សម្ដេចតេជោ បញ្ជាក់យ៉ាងដូច្នេះថា៖ «ច្បាស់ណាស់ថា អ្នកទាំងអស់គ្នាបានផ្ដល់កិត្តិយសឱ្យខ្ញុំ ជាមួយនឹងការជឿជាក់លើសមត្ថភាព និងការដឹកនាំរបស់ខ្ញុំ ហើយដែលយើងរស់នៅជាមួយគ្នាអស់រយៈពេលជាង៤៥ឆ្នាំ វាមិនមែនជាការចៃដន្យទេ ប៉ុន្តែគំនិតផ្ដួចផ្ដើមរបស់អ្នកទាំងអស់គ្នា ដើម្បីអញ្ជើញខ្ញុំឱ្យធ្វើជាប្រធានកិត្តិយស ហើយខ្ញុំក៏មិនមែនជាការទទួលដោយដៃចន្យដែរ នោះ គឺជាការគិតគូរទុកដោយមានទស្សនទានយ៉ាងច្បាស់លាស់ តាំងពីដើម រហូតមកដល់ពេលដែលអស់លោក អញ្ជើញខ្ញុំឱ្យធ្វើជាប្រធានកិត្តិយស»។

សម្ដេចតេជោ ហ៊ុន សែន បញ្ជាក់បន្ថែមថា​ សម្ដេចតែងចាត់ទុកវិស័យឯកជន គឺជាក្បាលរថភ្លើងនៃកំណើនសេដ្ឋកិច្ច ឯចំពោះរាជរដ្ឋាភិបាល គ្រាន់តែជាសេដ្ឋវិទូនៃផ្នែកដឹកនាំយុទ្ធសាស្ត្រ ក៏ប៉ុន្តែតួនាទីជំរុញសេដ្ឋកិច្ច គឺវាស្ថិតនៅលើអ្នកដែលមានទុន ហើយភាគច្រើន គឺបានក្លាយខ្លួនទៅជាឧកញ៉ានេះឯងតែម្ដង។ ហេតុនេះ សម្ដេចតេជោ ត្រូវតែកាន់តួនាទីនេះ ដែលសមាគមឧកញ៉ាកម្ពុជា បានផ្ដល់ការជឿទុកចិត្តច្រើនឆ្នាំមកហើយនោះ ដើម្បីឱ្យសមាគមនេះមានការស្ងប់ចិត្ត និងជឿជាក់បន្តទៀត ជាពិសេសការធ្វើឱ្យកាន់តែជឿជាក់ទុកចិត្តលើការវិនិយោគនៅក្នុងទឹកដីកំណើតរបស់ខ្លួន៕