សម្ដេចធិបតី ថា គោលនយោបាយលើក្រដាសល្អហើយ តែត្រូវឱ្យភាពជាក់ស្ដែងលើដីកាន់តែប្រសើរថែមទៀត

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា​ គោលនយោបាយនៅលើក្រដាសល្អហើយ តែធ្វើយ៉ាងណាត្រូវតែឱ្យភាពជាក់ស្ដែងនៅលើដីកាន់តែប្រសើរឡើងថែមទៀត នៅពេលទាក់ទាញវិនិយោគិនមក។

អញ្ជើញសំណេះសំណាលជាមួយសហជីព សេដ្ឋកិច្ចក្រៅប្រព័ន្ធ និងសមាគមបុគ្គលិកសិក្សាប្រមាណជាង៥ពាន់នាក់ នាព្រឹកថ្ងៃទី២៨ ខែមេសា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានថ្លែងថា ការធានាអនុវត្តគោលការណ៍ដែលបានដាក់ចេញដោយប្រសិទ្ធភាព ​គឺជាកិច្ចការដ៏សំខាន់ ហើយកិច្ចការងារដែលរាជរដ្ឋាភិបាលខិតខំ គឺធ្វើយ៉ាងណាបង្កើតនូវប្រសិទ្ធភាព និងបង្កើតយន្តការច្រើន។

សម្ដេចធិបតី បញ្ជាក់ដូច្នេះថា «គោលនយោបាយនៅលើក្រដាសល្អហើយ ប៉ុន្តែសំខាន់ទាក់ទាញគេមកហើយ ឱ្យលើប្រដាស លើដី ដូចគ្នា យ៉ាងហោចណាស់កុំឱ្យមានគម្លាតខ្លាំងពេក។ ហេតុនេះហើយ បានទាមទារនូវយន្តការតាមដាន អនុវត្ត និងដោះស្រាយជាប្រចាំ»។ សម្ដេចធិបតី បន្តថា សួម្បីតែក្នុងវិស័យការងារ ពិតណាស់ មានច្បាប់ការងារ ដែល ចែងអំពីសិទ្ធិរបស់កម្មករ និយោជិក និងនិយោជក ប៉ុន្តែដល់អនុវត្ត ពេលខ្លះអត់បានត្រឹមត្រូវ ឬពេលខ្លះមានបញ្ហា ដែលត្រូវមានយន្តការតាមដានរបស់ក្រសួង យន្តការអាជ្ញាកណ្ដាល មុនទៅតុលាការ ដើម្បិតាមដានដោះស្រាយបញ្ហា។

ដូច្នេះថា សម្ដេចធិបតី សង្កត់ធ្ងន់ថា ការធានាការអនុវត្តគោលការណ៍ដែលមានប្រសិទ្ធភាពនេះ គឺសំខាន់ណាស់ ហើយសំខាន់បំផុត គឺបង្កើតបរិយាកាសវិនិយោគបានល្អ​ ក្រៅពីរាជរដ្ឋាភិបាលជួយ គឺត្រូវធ្វើយ៉ាងណាបង្កើតប្រតិបត្តិបរិយាកាសសុខដុមនីយកម្មក្នុងរោងចក្រ សហគ្រាស៕