មិនខុសពីឳពុកឡើយ សម្ដេចធិបតីអះអាងថា ដាច់ខាតត្រូវតែជីកព្រែកហ្វូណនតេជោ ដើម្បីខ្មែរ

មិនខុសពីសម្ដេចតេជោ ហ៊ុន សែន​​ ឡើយ នាព្រឹកថ្ងៃអាទិត្យនេះ សម្ដេចធិបតី ហ៊ុន ម៉ាណែត បានចេញមកអះអាងថា ព្រែកជីកហ្វូណនតេជោ គឺដាច់ខាតត្រូវតែជីក ដើម្បីប្រយោជន៍សេដ្ឋកិច្ចសង្គមកម្ពុជាទាំងមូល។សម្ដេចបានអះអាងដូច្នេះ ក្នុងឱកាសសំណេះសំណាលជាមួយសមាគម សហជីព កម្មករសេដ្ឋកិច្ចក្រៅប្រពន្ធ័ និង សមាគមន៍បុគ្គលិកសិក្សា អបអរសាទរខួបលើកទី១៣៨ទិវាពលកម្មអន្តរជាតិនៅជ្រោយចង្វា នាព្រឹកថ្ងៃទី២៨ ខែមេសា ឆ្នាំ២០២៤។

កាលពីថ្ងៃទី២៦ ខែមេសា សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានចេញមកអះអាងក្នុងឋានៈជាប្រធានគណបក្សកាន់អំណាចថា ដាច់ខាតកម្ពុជាត្រូវតែជីកព្រែកហ្វូណនតេជោ ទាល់តែបាន ដើម្បីឱ្យសេដ្ឋកិច្ចកម្ពុជាអាចដកដោយខ្លួនឯងបាន មិនចាំពឹងអ្នកដទៃ ជាពិសេសគឺពឹងវៀតណាម។ ក្នុងពេលជាមួយគ្នានោះ សម្ដេចតេជោ ក៏បានប្រកាសអំពាវឱ្យពលរដ្ឋកម្ពុជា យល់ពីគម្រោងព្រែកជីកកំណប់ទ្រព្យជាតិមួយនេះ និងត្រូវចូលរួមជាចលនាជាតិដ៏សំខាន់គាំទ្រគម្រោងព្រែកជីកប្រវត្តិសាស្ត្រមួយនេះ។

បន្ទាប់ពីការអំពាវនាវរបស់សម្ដេចតេជោ ទាំងស្ថាប័នកំពូលរបស់ជាតិ សមាជិករដ្ឋាភិបាល ក្រុមដែលធ្លាប់តែមាននិន្នាការប្រឆាំងគម្រោងរបស់រាជរដ្ឋាភិបាល អ្នកជំនួញ និស្សិត យុវជន និងពលរដ្ឋខ្មែរ នៅទូទាំងនគរបានចេញមកគាំទ្រចំពោះគម្រោងព្រែកជីកហ្វូណនតេជោ ប្រៀបបាននឹងគ្រាប់ទឹកភ្លៀងធ្លាក់រាប់សិបគ្រាប់ក្នុងពេលតែមួយ។

នេះមិនមែនជាលើកទីមួយ ឬទើបតែជាលើកទីពីរឡើយ ពោលគឺរាប់ភ្លេចទៅហើយដែលសម្ដេចតេជោ ហ៊ុន សែន រួមទាំងសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា តែងតែចេញមុខការពារគម្រោងព្រែកជីកហ្វូណនតេជោនេះ។

គួរជម្រាបជូនថា គម្រោងព្រែកជីកហ្វូណនតេជោ គឺជាគម្រោងប្រវត្តិសាស្ត្រថ្មីមួយទៀត ដែលព្រែកជីកនេះមានប្រវែងសរុបប្រមាណជាង១៨០គីឡូម៉ែត្រ។ គម្រោងព្រែកជីក តម្លៃជាង១ ៧០០ លានដុល្លារនេះ គឺជីកចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯក នៃទន្លេបាសាក់ ចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រ ខេត្តកែប ដោយឆ្លងកាត់ខេត្ត ៤ គឺខេត្តកណ្តាល តាកែវ កំពត និងខេត្តកែប ដែលមានប្រជាជនសរុបប្រមាណ ១,៦លាននាក់ រស់នៅអមសងខាងផ្លូវទឹកនេះ។

នៅពេលគម្រោងនេះ រួចរាល់ជាស្ថាពរ ការដឹកជញ្ជូនទំនិញតាមផ្លូវទឹកនៅកម្ពុជាឆ្ពោះទៅកាន់សមុទ្រ នឹងកាន់តែមានភាពមមាញឹក ដែលជាសញ្ញាណវិជ្ជមានមួយអំណោយផលដល់វិនិយោគិនបរទេសដែលមករកស៊ីនៅកម្ពុជា ព្រោះគម្រោងនេះ នឹងជួយកាត់បន្ថយចម្ងាយ តម្លៃ នីតិវិធីបែបបទក្នុងការឆ្លងកាត់ទំនិញពីកម្ពុជាទៅសមុទ្រ។ មិនតែប៉ុណ្ណោះ គម្រោងនេះ នឹងផ្ដល់ប្រយោជន៍ដ៏មហាសាលដល់ពលរដ្ឋជាង ១លាន ៦សែននាក់ ដែលរស់នៅជាប់តាមដងព្រែកជីកហ្វូណនតេជោ តាមរយៈការធ្វើកសិកម្ម។ គម្រោងនេះ ក៏នឹងនាំឱ្យកម្ពុជាបង្កើតបានតំបន់ពាណិជ្ជកម្ម និងមជ្ឈមណ្ឌលភស្តភារកម្ម ការអភិវឌ្ឍផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ និងចិញ្ចឹម សត្វ ជាដើម។ ជាពិសេសគម្រោងនេះ នឹងនាំឱ្យកម្ពុជាមានភាពឯករាជ្យក្នុងវិស័យសេដ្ឋកិច្ច ការលក់ទំនិញចេញទៅក្រៅប្រទេស ហើយកម្ពុជាក៏មិនត្រូវខ្ចីដង្ហើមវៀតណាមដកតទៅទៀត៕