ទូតតួកគី សង្ឃឹមថា សម្ដេចតេជោ នឹងបង្កើនទំនាក់ទំនងជាមួយសភាតួកគីឱ្យដល់កម្រិតខ្ពស់

ឯកអគ្គរដ្ឋទូតតួកគីប្រចាំកម្ពុជា សង្ឃឹមថា ក្នុងតំណែងជាប្រធានព្រឹទ្ធសភានៃកម្ពុជា សម្ដេចតេជោ ហ៊ុន សែន នឹងបង្កើនទំនាក់ទំនងរវាងសភានៃប្រទេសទាំងពីរ កម្ពុជា និងតួកគី ឱ្យកាន់តែដល់កម្រិតខ្ពស់ថែមទៀត។

លោកស្រី ÜLKÜ KOCAEFE ឯកអគ្គរដ្ឋទូតតួកគីប្រចាំកម្ពុជា បានបង្ហាញក្តីសង្ឃឹមទុកថា «សម្ដេចប្រធានព្រឹទ្ធសភា នឹងបង្កើននូវទំនាក់ទំនងជាមួយសភានៃប្រទេសតួកគី ឱ្យដល់កម្រិតខ្ពស់នាពេលខាងមុខ»។ ការលើកឡើងរបស់លោកស្រីឯកអគ្គរដ្ឋទូតតួកគី បានធ្វើឡើងក្នុងឱកាសចូលជួបសម្ដែងការគួរសម និងពិភាក្សាការងារជាមួយសម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា នាព្រឹកថ្ងៃទី២៩​ ខែមេសា ឆ្នាំ២០២៤នេះ។

ក្នុងជំនួបនេះ សម្ដេចតេជោ បានសម្តែងក្តីរីករាយដែលបានជួបលោកស្រីឯកអគ្គរដ្ឋទូត សាជាថ្មីម្ដងទៀត បន្ទាប់ពីជំនួ​បកាលពីអំឡុងខែសីហា ឆ្នាំ២០២២ ក្រោយពេលដែលលោកស្រី បានក្លាយជាឯកអគ្គរដ្ឋទូតតួកគីប្រចាំនៅកម្ពុជា ហើយនៅពេលនោះ បានពិភាក្សាគ្នាអំពីការពង្រឹងកិច្ចសហប្រតិបត្តិការរវាងកម្ពុជា និងតួកគី និងបញ្ហាមួយចំនួនទៀត។ តែនៅ ពេលនេះ ជាជំនួប ដែលសម្ដេចបានទទួលតំណែងជាប្រធានព្រឹទ្ធសភា ដែលសម្ដេច នឹងពង្រឹងទំនាក់ទំនងបន្ថែមទៀតរវាងព្រឹទ្ធសភាកម្ពុជា និងសភាតួកគី។

លោកស្រីឯកគ្គរដ្ឋទូតតួកគី បានសម្ដែងក្តីរីករាយ និងចាត់ទុកថា នេះជាកិត្តិយសណាស់ដែលសម្ដេចតេជោបានផ្តល់ការអនុញ្ញាតឱ្យលោកស្រី បានជួបសម្ដែងការគួរសមនៅពេលនេះ ហើយលោកស្រី ក៏បានអបអរសាទរចំពោះសម្ដេចតេជោ ដែលត្រូវបានជាប់ឆ្នោតជាប្រធានព្រឹទ្ធសភានៃកម្ពុជា។

នៅចំពោះមុខសម្ដេចតេជោ លោកស្រីឯកអគ្គរដ្ឋទូត បានរៀបរាប់ពីទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ដោយលោកស្រី មានមោទនភាពចំពោះទំនាក់ទំនងរវាងកម្ពុជា និងតួកគី ដែលមានការរីកចម្រើនជាលំដាប់ បើទោះបីជាទំហំពាណិជ្ជកម្មនៅមានទំហំតូចក៏ដោយ។​ លោកស្រី ក៏បានរំលឹកពីកិច្ចសហប្រតិបត្តិការរវាងកម្ពុជា និងតួកគី ពិសេសកិច្ចសហប្រតិបត្តិការជាមួយក្រសួងអប់រំ លើការពង្រីកសាលា និងការបង្កើនការផ្ដល់អាហារូបករណ៍​ដល់និស្សិតកម្ពុជា។ លោកស្រី បញ្ជាក់ថា តួកគី នឹងបន្តពង្រឹង ពង្រីកកិច្ចសហប្រតិបត្តិការទ្វេភាគីនេះ ក៏ដូចជានៅក្នុងតំបន់ ដោយលោកស្រី ក៏បានស្នើសុំឱ្យភាគីកម្ពុជាជួយគាំទ្រតួកគីក្នុងទំនាក់ទំនងជាមួយអាស៊ានផងដែរ។

ឆ្លើយតបនឹងការលើកឡើងរបស់ឯកអគ្គរដ្ឋទូតតួកគី សម្ដេចតេជោ បានអរគុណលោកស្រី ដែលបានអបអរសាទរចំពោះសម្ដេចដែលបានក្លាយជាប្រធានព្រឹទ្ធសភានាពេលនេះ ហើយសម្ដេច ក៏បានអរគុណផងដែរដល់លោកប្រធានសភាតួកគី ដែលបានផ្ញើសារអបអរសាទរ។ សម្ដេចតេជោ បានប្រាប់លោកស្រីទូត ថា នៅក្នុងអាណត្តិទី៥ នៃព្រឹទ្ធសភានេះ សម្តេច នឹងផ្ដោតអាទិភាពសំខាន់ទៅលើកិច្ចការបរទេស ពោល គឺការទូតសភា។

តាមរយៈលោកស្រីឯកអគ្គរដ្ឋទូត សម្ដេចតេជោ ហ៊ុន សែន ក៏បានស្នើអញ្ជើញប្រធានសភាតួកគី មកចូលរួមវេទិកាអន្តរសភាដើម្បីការអត់ឱន និងសន្តិភាព ​និងមហាសន្និបាតលើកទី១២ នៃសន្និសីទអន្តរជាតិគណបក្សនយោបាយអាស៊ី (ICAPP) ដែលកម្ពុជា នឹងត្រូវធ្វើជាម្ចាស់ផ្ទះនៅក្នុងអំឡុងខែវិច្ឆិកា ឆ្នាំ២០២៤ ខាងមុខ ដោយសម្ដេច នឹងអញ្ជើញធ្វើជាប្រធានកិត្តិយសនៅក្នុងកិច្ចប្រជុំនោះផងដែរ៕