សម្ដេច ហ៊ុន សែន​ ថា រាជរដ្ឋាភិបាលបន្តវេន ដែលដឹកនាំ៨ខែមកនេះ ធានាបានកំណើនសេដ្ឋកិច្ចល្អប្រសើរ

សម្ដេចតេជោ ហ៊ុន សែន បានលើកឡើងថា រាជរដ្ឋាភិបាលបន្តវេន ក្រោមការដឹកនាំដោយសម្ដេចធិបតី ហ៊ុន ម៉ាណែត ក្នុងរយៈពេលប្រមាណ៨ខែមកនេះ បានធានានូវកំណើនសេដ្ឋកិច្ចកម្ពុជាយ៉ាងល្អប្រសើរ។

ប្រាប់ទៅកាន់ឯកអគ្គរដ្ឋទូតតួកគី នាថ្ងៃទី២៩ ខែមេសា ឆ្នាំ២០២៤នេះ សម្ដេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃកម្ពុជា បានអះអាងដូច្នេះថា៖ «ការផ្លាស់ប្ដូរថ្នាក់ដឹកនាំបន្តវេន ក្នុងរយៈពេល៨ខែកន្លងមកនេះ រាជរដ្ឋាភិបាលកម្ពុជា ក្រោមការដឹកនាំរបស់សម្ដេចធិបតីនាយករដ្ឋមន្ត្រី បានដំណើរការល្អប្រសើរ មានស្ថិររភាព កំណើនសេដ្ឋកិច្ចល្អប្រសើរ និងអតិផរណាស្ថិតនៅក្នុងស្ថានភាពដែលអាចគ្រប់គ្រងបាន»។

លើកឡើងក្នុងឱកាសទទួលជួបពិភាក្សាការងារជាមួយលោកស្រី អ៊ុលគុល កូចាអែហ្វែ​ ឯកអគ្គរដ្ឋទូតតួកគីប្រចាំកម្ពុជា នៅវិមានព្រឹទ្ធសភា សម្ដេចតេជោ ហ៊ុន សែន ក៏បានរៀបរាប់ និងគូសរំលេចពីគោលបំណងដែលសម្ដេចសម្រេចធ្វើការផ្លាស់ប្ដូរ និងផ្ទេរអំណាចទៅដល់ថ្នាក់ដឹកនាំជំនាន់ក្រោយនេះ ដែលជាការសម្រេចចិត្តដ៏ត្រឹមត្រូវ ហើយជាការសម្រេចចិត្តរបស់ប្រជាជនកម្ពុជា ដែលទុកចិត្តលើការដឹកនាំរបស់គណបក្សប្រជាជនកម្ពុជា។

គួរជម្រាបថា រាជរដ្ឋាភិបាល នីតិកាលទី៧​ ដែលមានសម្ដេចធិបតី ហ៊ុន ម៉ាណែត ជានាយករដ្ឋមន្ត្រីកម្ពុជា បានប្រកាសចូលកាន់តំណែងជាផ្លូវការនៅថ្ងៃទី២២ ខែសីហា ឆ្នាំ២០២៣ បន្ទាប់ពីការបោះឆ្នោតជ្រើសរើសតំណាងរាស្ត្រ កាលពីខែកក្កដា ដោយគណបក្សប្រជាជនកម្ពុជា បានបន្តទទួលជោគជ័យឈ្នះការបោះឆ្នោតនេះភ្លូកទឹកភ្លូកដី។ រាជរដ្ឋាភិបាលបន្តវេនរបស់សម្ដេចធិបតី ហ៊ុន ម៉ាណែត បានប្រកាសដាក់ចេញនូវ «យុទ្ធសាស្ត្របញ្ចកោណ-ដំណាក់កាលទី១» ដើម្បី​កំណើន ការងារ សមធម៌ ប្រសិទ្ធភាព និងចីរភាព ដោយសំដៅកសាងមូលដ្ឋានគ្រឹះឆ្ពោះទៅ​សម្រេច​បាន​ចក្ខុវិស័យកម្ពុជា ឆ្នាំ២០៥០។

យុទ្ធសាស្ត្របញ្ចកោណ ត្រូវបានផ្តោតយកចិត្តទុកដាក់ទៅលើការអភិវឌ្ឍមូល​ធន​មនុស្ស ការធ្វើពិពិធកម្មសេដ្ឋកិច្ច ការបង្កើនភាពប្រកួតប្រជែង ការអភិវឌ្ឍវិស័យឯក​ជន និងការងារ ការអភិវឌ្ឍប្រកបដោយភាពធន់ ចីរភាព និងបរិយាប័ន្ន និងការអភិវឌ្ឍសេដ្ឋកិច្ច និងសង្គមឌីជីថល ជាដើម៕