បង្ក្រាបរថយន្តសាំយ៉ុងកែច្នៃ១គ្រឿងផ្ទុកឈើផ្ចឹកជិត៣ម៉ែត្រគូប ប្រគល់ឲ្យមន្ត្រីបរិស្ថានព្រៃឡង់

សមត្ថកិច្ចស្រុកឆែប ខេត្តព្រះវិហារ បានបង្ក្រាបរថយន្តសាំយ៉ុងកែច្នៃ១គ្រឿងផ្ទុកឈើលេខ១(ផ្ចឹក) ២,៨០ម៉ែត្រគូបប្រគល់ឲ្យមន្ត្រីដែនបរិស្ថានការពារព្រៃឡង់ថែរក្សាបន្ត។

ការបង្ក្រាបនេះធ្វើឡើងនៅវេលាម៉ោង២១និង៣០នាទីថ្ងៃទី៣០ ខែមេសា ឆ្នាំ២០២៤ស្ថិតក្នុងភូមិម្លូព្រៃ ឃុំម្លូព្រៃ ស្រុកឆែប ខេត្តព្រះវិហារ ក្រោមការសម្របសម្រួលនីតិវិធីដោយតំណាងអយ្យការអមសាលាដំបូងខេត្ត និងដឹកនាំបង្ក្រាបដោយ លោក ឡង សុបិន អភិបាលស្រុកឆែប ព្រមទាំងមានការសហការជាមួយកម្លាំងបរិស្ថានស្រុកឆែប ផងដែរ។

     ប្រភពបានឲ្យដឹងថា មេឈ្មួញដុះស្លែ ឈ្មោះអ៊ួន អូន រូបនេះជាឈ្មួញជើងខ្លាំង អាងខ្សែអ្នកធំនៅពីក្រោយ រស់នៅភូមិពោធិ៍ឃុំពោធិ៍ ស្រុកត្បែងមានជ័យ ខេត្តព្រះវិហារ ដែលតែងតែធ្វើសកម្មភាពដឹកជញ្ជូនឈើប្រភេទលេខ១ ចេញពីព្រៃឡង់ ជារៀងរាល់ថ្ងៃ។ ប្រភពបន្តថា ការកាប់បំផ្លាញ និងដឹកជញ្ជូនឈើដោយខុសច្បាប់ចេញពីតំបន់ព្រៃឡង់ ក្នុងព្រំប្រទល់ស្រុកឆែប,ស្រុករវៀង និងស្រុកជ័យសែន ហាក់ផ្ទុះឡើងវិញបណ្ដើរៗហើយ ខណៈគេសង្ស័យថាសមត្ថកិច្ចជំនាញមួយចំនួនត្រូវថ្នាំសណ្ដំ។

 លោក ផិត វណ្ណៈ មន្ត្រីដែនការពារព្រៃឡង់ បានឲ្យដឹងនៅរសៀលថ្ងៃទី០១ខែឧសភាឆ្នាំ២០២៤នេះថា បទល្មើសខាងលើ គឺខាងលោកឡង់ សុបិន អភិបាលស្រុកឆែប និងលោកប្រធានកសិកម្មស្រុក ជាអ្នកបង្ក្រាបរួចយកមកប្រគល់ឲ្យខាងលោកចាត់ការបន្ត។ លោកបន្តថា រថយន្តសាំយ៉ុងកែច្នៃ១គ្រឿងផ្ទុកឈើលេខ១(ផ្ចឹក)ចំនួន៧០សន្លឹក ស្មើនិង២,៨០ម៉ែត្រគូប។  បច្ចុប្បន្នលោកកំពុងតែរៀបចំសំណុំរឿងបញ្ជូនទៅតុលាការ ដើម្បីចាត់ការបន្តតាមផ្លូវច្បាប់៕

ដោយ៖ជុន កុសល