មិនអូសបន្លាយពេលឡើយ ស្នងការខេត្តបាត់ដំបង អន្តរាគមរឿងជម្លោះទំនាស់ដី បុរស ២នាក់ ជេប្រមាថ និងគំរាមហិង្សាលើស្ត្រីភេទ

ការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តបាត់ដំបង បញ្ជាក់ថា ក្រោយទទួលបានព័ត៌មានទាក់ទងនឹងជម្លោះបញ្ហាដីធ្លី ស្ថិតក្នុងស្រុកឯកភ្នំ រវាងស្ត្រីម្នាក់ និងបុរស ២នាក់ ព្រមទាំងមានមន្ត្រីប៉ុស្តិ៍នគរបាលរដ្ឋបាល ស្ថិតនៅទីតាំងជម្លោះតែបែរមិនធ្វើអ្វីផងនោះ នៅថ្ងៃដដែល ស្នងការនៃស្នងការដ្ឋាននគរបាលខេត្ត បានចេញបញ្ជាឱ្យអន្តរាគមភ្លាមៗ។

គួរជម្រាបថា តាមរយៈគណនី Chhon Voeun កាលពីថ្ងៃពុធទី០១ ឧសភា បានធ្វើការ live សកម្មភាពជម្លោះរវាងខ្លួន និងបុរសពីររូបទាក់ទងនឹងបញ្ហាទំនាស់ដី ដោយក្នុងស្ថានភាពនោះ មានទាំងមន្រ្តីប៉ុស្តិ៍នគរបាលរដ្ឋបាល​ផងដែរ តែបែរមិនធ្វើអ្វីសោះ និងបណ្តោយឱ្យបុរស ២នាក់ ក្នុងចំណោមនោះ ជេប្រមាថនិងគំរាមហិង្សាលើស្ត្រីរូបនោះថែមទៀត ធ្វើឱ្យមហាជនសម្តែងការមិនពេញចិត្តជាខ្លាំង។

ក្រោយទទួលបានព័ត៌មាននេះ លោកឧត្តមសេនីយ៍ទោ សាត គឹមសាន បានដាក់បទបញ្ជាដល់លោកវរសេនីយ៍ឯក​ ឡុង​ យោ​ធាវីរៈ​ អធិការនគរបាលស្រុកឯកភ្នំ​ ហៅមន្រ្តីប៉ុស្តិ៍នគរបាលរដ្ឋបាល​ មកធ្វេីការសាកសួរនៅអធិ​ការដ្ឋាននគរបាលស្រុក និងអន្តរាគមឱ្យស្ត្រីដែលរងនូវការជេរប្រមាថ ពីសំណាក់បុរសខាងលេី​ មកដាក់ពាក្យបណ្តឹងដើម្បីអនុវត្តតាមនីតិវិធីច្បាប់៕