ប្រតិភូយូនីសេហ្វ រំភើប ឃើញកុមារីកម្ពុជា ចេះប្រើបច្ចេកវិទ្យា ដោះស្រាយបញ្ហាសហគមន៍

គណៈប្រតិភូ នៃអង្គការយូនីសេហ្វ (UNICEF) ក្រោមការដឹកនាំដោយ លោកស្រី Kitty van der Heijden នាយករងប្រតិបត្តិ អង្គការយូនីសេហ្វ បានចុះទស្សនកិច្ច នៅអនុវិទ្យាល័យ ហ៊ុន សែន រលួស ខេត្តសៀមរាប ដើម្បីពិនិត្យដំណើរការ នៃការអនុវត្តកម្មវិធី “អប់រំមុខវិជ្ជាបំណិនជីវិតតាមមូលដ្ឋាន” និងគម្រោង “Youth Solar” ដែលគាំទ្រដោយអង្គការយូនីសេហ្វ ដោយផ្ដោតលើប្រធានបទបម្រែបម្រួលអាកាសធាតុ។ នេះបើតាមការផ្ដល់ព័ត៌មាន ពី ក្រសួងអប់រំ យុវជន និងកីឡា នៅរសៀលថ្ងៃទី២ ខែឧសភា ឆ្នាំ២០២៤ នេះ

អ្វីដែលជាការចាប់អារម្មណ៍បំផុតរបស់គណៈប្រតិភូនោះ គឺការបង្កើតកម្មវិធីទូរសព្ទដៃរបស់សិស្សានុសិស្ស។ គណៈប្រតិភូបានសម្ដែងអារម្មណ៍រំភើបនៅពេលឃើញ កុមារីត្រឹមអាយុ ១២ឆ្នាំ ចេះប្រើប្រាស់បច្ចេកវិទ្យា ក្នុងការជួយដោះស្រាយបញ្ហាក្នុងសហគមន៍ ជាពិសេសបញ្ហាបរិស្ថាន។

សិស្សានុសិស្ស បាន និងកំពុងរៀនដោះស្រាយបញ្ហាប្រឈមក្នុងជីវិតពិត និងប្រើប្រាស់ថាមពល នៃថាមពលពន្លឺព្រះអាទិត្យ ដើម្បីបង្កើតអនាគតដ៏ភ្លឺស្វាង និងមាននិរន្តរភាព។ សិស្សានុសិស្សបានដាក់បង្ហាញពី ការប្រើប្រាស់បច្ចេកវិទ្យាក្នុងការជួយដោះស្រាយបញ្ហាក្នុងសហគមន៍៖

១. ការបង្ហាញពីកម្មវិធីហ្គេមដែលបង្កើតដោយក្រុមកុមារី អំពី “ការសម្អាតផ្លាស្ទិចក្នុងសហគមន៍”

២. ការបង្ហាញកម្មវិធីទូរសព្ទដៃ ដែលនិយាយអំពី បញ្ហាទេសចរណ៍ ព្រមទាំងមានការបង្ហាញអំពី សារអប់រំខ្លីៗអំពីបរិស្ថាន ជាក់ស្តែងគឺបញ្ហាផ្លាស្ទិច ដែលមានក្នុងកម្មវិធីនេះ៕