ព័ត៌មានជាតិ

ដើមទុរេនមួយចំនួន ងាប់ដោយសារកង្វះទឹក

បានផុស

៨ ខែ មុន

នៅ

ថ្ងៃសុក្រ ៣ ឧសភា ២០២៤

ដោយ

ស្របពេលដែលបញ្ហាបម្រែបម្រួលអាកាសធាតុធ្វើឱ្យឡើងកំដៅខ្លាំងក្នុងរយៈពេលប៉ុន្មានខែមកនេះ ដើមទុរេននៅតាមបណ្ដាខេត្តមួយចំនួនបានកំពុងរងផលប៉ះពាល់ដោយសារដាច់ទឹក និងងាប់ជាបន្តបន្ទាប់។

កញ្ញា រ៉ុស្ស៊ី ពង្សពុទ្ធិម៉ា អាយុ ២៧ ឆ្នាំ ម្ចាស់ចម្ការទុរេន នៅក្នុងភូមិតាំកន់ ឃុំកណ្តោល ស្រុកបុទុមសាគរ ខេត្តកោះកុង ប្រាប់ថា នៅតំបន់របស់នាង ចាប់ផ្ដើមខ្វះទឹក ម្ចាស់ចម្ការមួយៗ ផ្ដើមសុំចែកទឹកគ្នាប្រើ ខណៈចម្ការខ្លះចាប់ផ្ដើមជីកប្រឡាយយកទឹកប្រើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ញាប្រាប់ថា បច្ចុប្បន្ន មិនទាន់ងាប់ដើមទេ ប៉ុន្តែបើនៅតែបន្តអត់ធ្លាក់ភ្លៀងទៀត មិនយូរទេ ត្រឹម ២ សប្ដាហ៍ទៀត ដើមទុរេននឹងចាប់ផ្ដើមងាប់បណ្ដើៗ។

តាមបណ្ដាញសង្គម នៅបណ្ដាខេត្តមួយចំនួន ដូចជាខេត្តកោះកុង ខេត្តព្រះសីហនុ ខេត្តកំពត ប្រឈមនឹងអាកាសធាតុក្ដៅហួតហែង ធ្វើឱ្យដើមទុរេនមួយចំនួនងាប់ជាបន្តបន្ទាប់ ដោយសារដាច់ទឹក។

កង្វះទឹក មិនត្រឹមតែប៉ះពាល់ ដល់ដំណាំទុរេននោះទេ គឺប៉ះពាល់ដល់ប្រភេទដំណាំផ្សេងៗទៀតដូចគ្នា។

លោក ចាន់ រិទ្ធិ ប្រធានមន្ទីរកសិកម្ម រុក្ខា ប្រមាញ់ និងនេសាទ ខេត្តកំពត ប្រាប់កម្ពុជាថ្មី នៅថ្ងៃទី ០៣ ខែឧសភា ឆ្នាំ ២០២៤ នេះថា ទុរេននៅខេត្តកំពត ៨០ ភាគរយ នៅល្អ ប៉ុន្តែទុរេនមួយចំនួន ប្រឈមនឹងការឆេះ ដោយសារតែអាកាសធាតុក្ដៅហួតហែង។

បើតាមលោក ចាន់ រិទ្ធិ ក្រៅពីទុរេន ដំណាំដូង និងសាម៉ាវ និងម្រេចក៏ប៉ះពាល់ដោយសារអាកាសធាតុរាំងស្ងួត ផងដែរ ខណៈអាជ្ញាធរខេត្ត ក៏មានវិធានការចែកទឹកដល់ប្រជាពលរដ្ឋ និងរង់ចាំទឹកភ្លៀង ខណៈភ្លៀងកក់ខែផ្ដើមធ្លាក់ចុះមកហើយ៕