​ភ្លៀងធ្លាក់ដំបូងមួយមេធំ ​នៅរាជធានីភ្នំពេញ​ ក្រោយរាំងស្ងួត ៥ ខែ

នៅវេលាម៉ោង ៤ ទៀបភ្លឺ ថ្ងៃទី ០៤ ខែឧសភា ​ឆ្នាំ ២០២៤ នេះ មានភ្លៀងធ្លាក់មួយមេធំដំបូង នៅរាជធានីភ្នំពេញ បន្ទាប់​ពីមានភាពរាំងស្ងួតជាច្រើនខែកន្លងមក នារដូវប្រាំង ដែលបានធ្វើឱ្យតំបន់មួយចំនួននៅក្នុងរាជធានីភ្នំពេញមានការដក់ទឹកតិចតួច។

​ក្រសួងធនធានទឹក ​និងឧតុនិយម ​បានប្រកាសនៅថ្ងៃទី ០៤ ខែឧសភានេះថា សម្ពាធទាបគ្របដណ្ដប់មកលើឈូងសមុទ្រថៃ ព្រះរាជាណាចក្រកម្ពុជា ភាគកណ្តាលនៃអាងទន្លេមេគង្គ និងសមុទ្រចិនខាងត្បូង។

​ស្ថានភាព​បែបនេះនឹងធ្វើឱ្យតំបន់ទាំង ៣ របស់កម្ពុជា ​ដែលមានតំបន់វាលទំនាប ​តំបន់ខ្ពង់រាប តំបន់មាត់សមុទ្រ មានភ្លៀងធ្លាក់ ផ្គរ រន្ទះ និងខ្យល់កន្ត្រាក់ចាប់ពីថ្ងៃទី ០៤ រហូតដល់ថ្ងៃទី ០៦ ខែឧសភា ឆ្នាំ ២០២៤៕