ក្រោយបាញ់បោះសេរី មន្ត្រីយោធាម្នាក់ ត្រូវបាន លុបឈ្មោះចេញពីក្របខ័ណ្ឌ

មន្ត្រីយោធាម្នាក់ មានឋានន្តរស័ក្តិវរសេនីយ៍ត្រី (ស័ក្តិបួន) ត្រូវបានរដ្ឋមន្ត្រីក្រសួងការពារជាតិ លោកនាយឧត្តមសេនីយ៍ ទៀ សីហា សម្រេចលុបឈ្មោះចេញពីក្របខ័ណ្ឌនៃកងយោធពលខេមរភូមិន្ទ។

ប្រកាសរបស់លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ ចុះថ្ងៃទី៣ ខែឧសភា ឆ្នាំ២០២៤ បានសម្រេចប្រកាសលុបឈ្មោះនាយទាហានចេញពីក្របខ័ណ្ឌនៃកងយោធពលខេមរភូមិន្ទចំពោះវរសេនីយ៍ត្រី ផាត ផានណូ អត្តលេខ ០៦៩៣០១ ជំនួយការនាយកដ្ឋានបញ្ជូនសារ ក្រសួងការពារជាតិ។

ការបណ្ដេញចេញមន្ត្រីយោធារូបនេះ ត្រូវបានក្រសួងការពារជាតិ បញ្ជាក់ថា ល្មើសនឹងច្បាប់ស្ដីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទ។ មែនទែន វរសេនីយ៍ត្រី ផាត ផានណូ បានប្រើកាំភ្លើងបាញ់បោះសេរី កាលពីយប់ថ្ងៃទី២ ខែឧសភា ឆ្នាំ២០២៤ ហើយក៏ត្រូវបានកម្លាំងនគរបាលនៃអធិការដ្ឋាននគរបាលខណ្ឌ៧មករា ឃាត់ខ្លួនបាន រួចប្រគល់ឱ្យកម្លាំងកងរាជអាវុធហត្ថខណ្ឌ ចាត់ការបន្ត៕