ព័ត៌មានជាតិ

រដ្ឋមន្ត្រីអប់រំ ៖ ភ្លេងកាយរឹទ្ធិ ជាវិធីសាស្ត្រអប់រំបែបកាយរឹទ្ធិកម្ម រួមចំណែកអភិវឌ្ឍន៍កុមារ និងយុវជន ឱ្យមានសក្ដានុពលពេញលេញ

បានផុស

៩ ខែ មុន

នៅ

ថ្ងៃសៅរ៍ ៤ ឧសភា ២០២៤

ដោយ

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានកាយរឹទ្ធិជាតិកម្ពុជា បានលើកឡើងថា ភ្លេងកាយរឹទ្ធិ គឺជាវិធីសាស្ត្រអប់រំបែបកាយរឹទ្ធិកម្ម ដែលរួមចំណែកអភិវឌ្ឍន៍កុមារ និងយុវជន ឱ្យមានសក្ដានុពលពេញលេញខាងផ្លូវកាយ ផ្លូវបញ្ញា ផ្លូវសង្គម ផ្លូវចិត្ត និងផ្លូវអារម្មណ៍ ដើម្បីក្លាយទៅជាពលរដ្ឋមានទំនួលខុសត្រូវ និងទៅជាសមាជិកសកម្មតាមមូលដ្ឋានរស់នៅក្នុងសហគមន៍ជាតិ និងអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងការបើកការប្រកួតក្រុមភ្លេងកាយរឹទ្ធិថ្នាក់ជាតិលើកទី ១ ក្រោមប្រធានបទ“ភ្លេងក្នុងសន្តិភាព” កាលពីថ្ងៃទី ០៣ ឧសភា នៅកីឡដ្ឋានអូឡាំពិក លោកឧបនាយករដ្ឋមន្ត្រី បានបន្តថា ក្រុមភ្លេងកាយរឹទ្ធិ គឺជាវិធីសាស្ត្រហ្វឹកហ្វឺនលំហាត់របៀបកាយរឹទ្ធិកម្ម បញ្ជាសណ្ដាប់ធ្នាប់ប្រព័ន្ធកងល្បាត និងដំណើរព្យុហយាត្រាប្រកបដោយភាពទាក់ទាញដល់កុមារ យុវជន និងមានចំណាប់អារម្មណ៍ក្នុងស្រទាប់មហាជន ដើម្បីគាំទ្រចលនាកាយរឹទ្ធិ ហើយតាមរយៈកម្មវិធីនេះ ក្រសួងអប់រំ យុវជន និងកីឡា នឹងផលិតបាននូវធនធានក្រុមភ្លេងកាយរឹទ្ធិឱ្យមានសក្ដានុពលពេញលេញលើបំណិនសម្បទាខាងផ្នែកកាយសម្បទា មានសុខភាពល្អ វិជ្ជាសម្បទា ចរិយាសម្បទា ជំនាញទន់ បំណិនជីវិត បំណិនច្នៃប្រឌិត មានសមត្ថភាពរស់នៅ និងធ្វើការជាក្រុមមានបំណិនផ្នែកតន្ត្រី និងសិល្បៈ និងមានឆន្ទៈពិតប្រាកដ ដើម្បីចូលរួមសកម្មភាពក្នុងសហគមន៍របស់ខ្លួន។

លោកបណ្ឌិតសភាចារ្យ ហង់ជួន ណារ៉ុន បានបន្តថា ចំពោះការជ្រើសរើសប្រធានបទ នៃការរៀបចំការប្រកួតក្រុមភ្លេងកាយរឹទ្ធិថ្នាក់ជាតិលើកទី ១ ក្រោមប្រធានបទ “ភ្លេងក្នុងសន្តិភាព” នាពេលនេះ គឺដើម្បីឧទ្ទិសដល់សន្តិភាព ឧទ្ទិសដល់ការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា ដែល សម្តេច បានខិតខំប្រឹងប្រែងក្នុងការបង្រួបបង្រួមជាតិនាំមកនូវសុខសន្តិភាពដល់កម្ពុជា។

លោកបណ្ឌិតសភាចារ្យ ឧបនាយករដ្ឋមន្ត្រី ក៏បានយកឱកាសនេះឧទ្ទិសនូវសមិទ្ធផលដ៏ត្រចះត្រចង់នាពេលនេះជូនចំពោះ សម្តេចវិបុលបញ្ញា សុខ អាន អតីតប្រធានកាយរឹទ្ធិជាតិកម្ពុជា ព្រមទាំងកាយរឹទ្ធាចារ្យទាំងអស់ ដែលបានលះបង់នូវកម្លាំងកាយចិត្ត ប្រាជ្ញា ស្មារតី និង ពលីកម្មគ្រប់បែបយ៉ាង ក្នុងបុព្វហេតុចលនាកាយរឹទ្ធិជាតិកម្ពុជា និងបានបង្កើតឡើងនូវក្រុមភ្លេងកាយរឹទ្ធិគ្រប់ទម្រង់ និងដ៏សម្បូរបែប នាពេលកន្លងមកនេះ។

ជាមួយគ្នានេះ លោកឧបនាយករដ្ឋមន្ត្រី បានគូសបញ្ជាក់បន្ថែមថា ការរៀបចំការប្រកួតក្រុមភ្លេងកាយរឹទ្ធិថ្នាក់ជាតិនាពេលនេះ ធ្វើឡើងក្នុងគោលបំណងលើកទឹកចិត្តឱ្យក្មួយៗ និងប្អូនៗ កាយរឹទ្ធិទាំងអស់ ឱ្យចូលរួមក្នុងការអនុវត្តនូវគំនិតផ្ដួចផ្ដើមរបស់ សម្តេចធិបតី នៅក្នុងវិស័យអប់រំ ជាពិសេសគឺការបន្តពង្រឹងអភិបាលកិច្ចសាលារៀន ការបង្កើនកម្មវិធីក្រៅម៉ោងសិក្សា ការលើកកម្ពស់សុខភាពសិក្សា និងការលើកកម្ពស់ភាពជាដៃគូរបស់សហគមន៍ដើម្បីការអប់រំ ដែលក្នុងន័យនេះ ក្មួយៗ កាយរឹទ្ធិទាំងអស់ ត្រូវចូលរួមអនុវត្តនូវកម្មវិធីកាយរឹទ្ធិ ក៏ដូចជាកម្មវិធីក្រៅម៉ោងសិក្សា រៀនសូត្រ ហ្វឹកហាត់ភ្លេង ដែលជាសកម្មភាពក្រៅម៉ោងសិក្សា ជាពិសេសកាយរឹទ្ធិមានតួនាទីនៅក្នុងការចូលរួមក្នុងការអប់រំមិត្តភ័ក្ដិ ក៏ដូចជានៅក្នុងការចូលរួមលើកកម្ពស់ការងារសង្គមថែមទៀតផង។

គួរបញ្ជាក់ថា ការប្រកួតក្រុមភ្លេងកាយរឹទ្ធិថ្នាក់ជាតិលើកទី ១ ក្រោមប្រធានបទ “ភ្លេងក្នុងសន្តិភាព” ដោយមានក្រុមភ្លេងកាយរឹទ្ធិចំនួន ៨ ក្រុមមកពី ៦ រាជធានី/ខេត្ត ចូលរួមប្រកួតរួមមាន ៖ ១.រាជធានីភ្នំពេញ ចំនួន ៣ ក្រុម គឺក្រុម នៃកងឯកភាពវិទ្យាល័យវត្តកោះ វិទ្យាល័យបាក់ទូក និងក្រុមវិទ្យាល័យហ៊ុន សែន ប៊ុន រ៉ានី វត្តភ្នំ, ២.ខេត្តកណ្តាល មាន ១ ក្រុម, ៣.ខេត្តសៀមរាប មាន ១ ក្រុម, ៤.ខេត្តឧត្តរមានជ័យមាន ១ ក្រុម, ៥.ខេត្តកោះកុង មាន ១ ក្រុម និង៦.ខេត្តរតនគិរី មាន ១ ក្រុម៕

អត្ថបទ ៖ សំអឿន