ព័ត៌មានជាតិ

ឯកឧត្ដម ហ៊ុន ម៉ានី បន្តតាមដានគ្រប់ជំហាន ទោះគ្មានវត្តមានក្នុងដំណើរការកែសន្លឹកកិច្ចការបេក្ខជនប្រឡងចូលគ្រូអនុវិទ្យាល័យ នៅមណ្ឌលកំណែ

បានផុស

៩ ខែ មុន

នៅ

ថ្ងៃចន្ទ ៦ ឧសភា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង បានបញ្ជាក់ថា ទោះមិនមានវត្តមានផ្ទាល់ក្នុងដំណើរការកែសន្លឹកកិច្ចការបេក្ខជនប្រឡងចូលគ្រូអនុវិទ្យាល័យ នៅមណ្ឌលកំណែក៏ពិតមែន តែ ឯកឧត្ដម នៅបន្តតាមដានគ្រប់ជំហានពីខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី ០៦ ខែឧសភា ឆ្នាំ ២០២៤ នេះ តាមរយៈទំព័រហ្វេសប៊ុក ឯកឧត្ដម ហ៊ុន ម៉ានី បានបញ្ជាក់ថា «ទោះមិនមានវត្តមានផ្ទាល់ក្នុងដំណើរការកែសន្លឹកកិច្ចការនៅមណ្ឌលកំណែក៏ពិតមែន ខ្ញុំ នៅបន្តតាមដានគ្រប់ជំហានពីខេត្តសៀមរាប»។

ឯកឧត្ដម ហ៊ុន ម៉ានី បញ្ជាក់ទៀតថា នាវេលាម៉ោង ៧ និង ១៥ នាទី ព្រឹកនេះ គណៈកម្មការរៀបចំការប្រឡងប្រជែងចាប់ផ្ដើមដំណើរការកែសន្លឹកកិច្ចការរបស់បេក្ខជន ដែលបានចូលរួមប្រឡងប្រជែងជ្រើសរើសគ្រូអនុវិទ្យាល័យ ប្រព្រឹត្តទៅរយៈពេល ៤ ថ្ងៃ កន្លងមក។

ឯកឧត្ដម ហ៊ុន ម៉ានី បញ្ជាក់បន្ថែមថា ដោយសារមានភារកិច្ចជាអធិបតី នៃសិក្ខាសាលាថ្នាក់តំបន់ និងបេសកកម្មក្នុងក្របខណ្ឌគណៈកម្មការវាយតម្លៃអង្គភាពផ្ដល់សេវាសាធារណៈគំរូ នៅខេត្តសៀមរាប ព្រឹកនេះ ឯកឧត្ដម មិនមានវត្តមានបើកសន្លឹកកិច្ចការសម្រាប់ដំណើរការកំណែដូចសព្វមួយដងនោះទេ។

ឯកឧត្ដមឧបនាយករដ្ឋមន្ត្រី បន្ថែមទៀតថា ទោះបីជាយ៉ាងនេះក្តី ឯកឧត្ដម និងក្រុមការងារ នៅបន្តតាមដានយ៉ាងយកចិត្តទុកដាក់គ្រប់ដំណាក់កាលទាំងអស់ នៃដំណើរការកែសន្លឹកកិច្ចការរបស់បេក្ខជនពីចម្ងាយ។

គួរជម្រាបថា ឯកឧត្ដមឧបនាយករដ្ឋមន្ត្រី ហ៊ុន ម៉ានី បានអញ្ជើញមានវត្តមាន ៤ ថ្ងៃពេញ ដើម្បីដឹកនាំ តាមដាន និងត្រួតពិនិត្យការប្រឡងប្រជែងជ្រើសរើសគ្រូអនុវិទ្យាល័យ ចាប់តាំងពីថ្ងៃទី ២ រហូតមកដល់ថ្ងៃទី ៥ ខែឧសភា ឆ្នាំ ២០២៤។ ទន្ទឹមនោះ ឯកឧត្ដម ក៏បានអញ្ជើញមានវត្តមាន តាំងពីព្រឹក រហូតដល់ពេលរសៀល រយៈពេល ៤ ថ្ងៃពេញ ដើម្បីជ្រើសរើសវិញ្ញាសាសម្រាប់ការប្រឡងប្រជែង ក៏ដូចជា ដឹកនាំ តាមដាន ត្រួតពិនិត្យ វឌ្ឍនភាព នៃដំណើរការប្រឡង។

បន្ថែមលើវត្តមាន នៃការអញ្ជើញជ្រើសរើសវិញ្ញាសានេះ ឯកឧត្ដមឧបនាយករដ្ឋមន្ត្រី ក៏បានអញ្ជើញចុះត្រួតពិនិត្យតាមបណ្ដាមណ្ឌលនីមួយៗ រួមមាន តាមបន្ទប់ប្រឡង និងចំណុចពាក់ព័ន្ធផ្សេងៗ ទៀត ដើម្បីធានាទៅដល់ដំណើរការ នៃការប្រព្រឹត្តទៅ ស្របតាមនិយាមនីតិវិធីប្រតិបត្តិ នៃការប្រឡងប្រជែងជ្រើសរើសមន្ត្រីរាជការស៊ីវិល ដែលចេញដោយរាជរដ្ឋាភិបាលកម្ពុជា។