ព័ត៌មានជាតិ

សាស្រ្តាចារ្យសាកលវិទ្យាល័យភូមិន្ទភ្នំពេញ បំប៉នសមត្ថភាព សិស្សថ្នាក់ទី១២

បានផុស

១០ ខែ មុន

នៅ

ថ្ងៃចន្ទ ៦ ឧសភា ២០២៤

ដោយ

ជារៀងរាល់ឆ្នាំ សាកលវិទ្យាល័យភូមិន្ទភ្នំពេញ បានរៀបចំវគ្គសិក្សាបំប៉នសមត្ថភាព ជូនដល់សិស្សានុសិស្ស ថ្នាក់ទី១២ នៃវិទ្យាល័យ ហ៊ុន សែន កងតាណឹង ស្រុកកងមាស ខេត្តកំពង់ចាម។ នៅថ្ងៃទី០៥ ខែឧសភា ឆ្នាំ២០២៤ នេះ បណ្ឌិត សាន វឌ្ឍនា អនុរដ្ឋលេខាធិការ ក្រសួងអប់រំ យុវជន និងកីឡា និងជាប្រធានក្រុមប្រឹក្សាភិបាល នៃសាកលវិទ្យាល័យភូមិន្ទភ្នំពេញ បានជួបសំណេះសំណាលជាមួយសិស្សានុសិស្ស និងសម្តែងការគោរពដឹងគុណដោយផ្ទាល់ ជូនចំពោះសាស្រ្តាចារ្យទាំងអស់ ដែលបានចូលរួមក្នុងវគ្គសិក្សានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាសប្តាហ៍ទី៣ ដែលសាស្រ្តាចារ្យ ៦រូប រួមមាន សាស្រ្តាចារ្យ ឈឹម ម៉េង (គណិតវិទ្យា) សាស្រ្តាចារ្យ ឈុន គឹមលាង (រូបវិទ្យា) សាស្រ្តាចារ្យ ជ័យ ថាវី (គីមីវិទ្យា) សាស្រ្តាចារ្យ លី ស្រួច (គណិតវិទ្យា) សាស្រ្តាចារ្យ ធូ ភន (ជីវវិទ្យា) និងសាស្រ្តាចារ្យ នៅ សម្បត្តិ (អក្សរសាស្រ្តខ្មែរ) បានចុះទៅបង្រៀនដោយផ្ទាល់ ដោយសង្កត់ធ្ងន់លើគន្លឹះ នៃការសិក្សា ការដោះស្រាយសំណួរ និងលំហាត់ និងការហ្វឹកហាត់ជាមួយវិញ្ញាសា។

សម្រាប់ឆ្នាំ២០២៤ នេះ ក្រសួងអប់រំ គ្រោងនឹងរៀបចំដំណើរការប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប នៅថ្ងៃទី៨ ខែតុលា ខាងមុខ ខណៈឆ្នាំមុន ក្រសួងរៀបចំប្រឡងនៅ ថ្ងៃទី៦ វិច្ឆិកា ២០២៣។

កាលពីឆ្នាំ២០២៣ កន្លងទៅនេះ មានបេក្ខជនចុះឈ្មោះប្រឡងសរុបចំនួន ១៣៧ ៤១២ នាក់ ស្រី ៧៣ ២៧៨ នាក់ ចែកជា ២២៧ មណ្ឌលប្រឡង ត្រូវជា ៥ ៥៤៣ បន្ទប់។ ក្នុងនោះ មានបេក្ខជនមកប្រឡងចំនួន ១៣៥ ០៨៤ នាក់ ស្រី ៧២ ៣៤៤ នាក់។ ក្នុងចំណោមបេក្ខជនមកប្រឡង មានបេក្ខជនប្រឡងជាប់សរុប ៩៨ ៤៦០ នាក់ ត្រូវជា ៧២,៨៩ ភាគរយ នៃចំនួនបេក្ខជនមកប្រឡង។ ក្នុងនោះ បេក្ខជនជាប់និទ្ទេស A ចំនួន ១ ៦៧៣ នាក់ និទ្ទេស B ចំនួន ៦ ៩៦៤ នាក់ និទ្ទេស C ចំនួន ១៨ ៣០៨ នាក់ និទ្ទេស D ចំនួន ៣៤ ២៤៦ នាក់ និង និទ្ទេស E ចំនួន ៣៧ ២៦៩ នាក់៕