ថ្នាល «បណ្តុះកូនឈើ» ខ្នាតធំបំផុតនៅកម្ពុជា គ្រោងចេញជារូបរាងនៅខេត្តត្បូងឃ្មុំ

ថ្នាល​បណ្តុះកូនឈើ​ថ្នាក់​តំបន់​ដំបូង​ខ្នាត​បំផុត​នៅ​កម្ពុជា មាន​សមត្ថភាព​ផលិតកូនឈើ​បានជាង ១ លានដើម ក្នុង​មួយឆ្នាំ ​គ្រោង​នឹងលេចចេញ​ជារូបរាង​នៅក្នុងខេត្តត្បូងឃ្មុំ។

បើ​តាម​ក្រសួង​បរិស្ថាន ថ្នាល«បណ្តុះ​កូនឈើ»ខ្នាត​ធំដំបូងបំផុត​នៅក្នុងប្រទេសកម្ពុជា​នេះ អាច​មាន​សមត្ថភាព​ផលិតកូនឈើបានចំនួន ១លាន ២សែន​កូន​ក្នុង ១ឆ្នាំ និងជា​ថ្នាល​ដែល​បាន​បំពាក់​ប្រព័ន្ធ​ស្រោចស្រព​ស្វ័យប្រវត្ត ដើរ​ដោយ​ថាមពលព្រះអាទិត្យ។

ថ្នាល​បណ្តុះកូន​ឈើខ្នាត​តំបន់នេះ នឹងជួយពង្រីកវិសាល​ភាពព្រៃ​ឈើ​កម្ពុជា តាមរយៈ​ការរួមចំណែកដាំ​ពីប្រជាជនកម្ពុជា ឈាន​ឆ្ពោះ​ទៅជា​ប្រទេសអព្យាក្រឹតកាបូន និង​ពង្រីកវិសាលភាពព្រៃឈើជាង ៦០% នៅឆ្នាំ២០៥០ ស្រប​តាមយុទ្ធសាស្ត្រចក្រាវិស័យបរិស្ថានឆ្នាំ ២០២៣-២០២៨ របស់រាជរដ្ឋាភិបាលកម្ពុជា ដើម្បី​ធានាដល់កិច្ចការពារ ថែរក្សា និងអភិរក្សធនធានធម្មជាតិ ដែល​មាន​នៅក្នុងតំបន់​ការពារ​ធម្មជាតិទូទាំងប្រទេសចំនួន ៧៣ តំបន់ និង​គ្របដណ្តប់លើផ្ទៃដីជាង ៧លានហិកតាស្មើនឹង៤០% នៃ​ផ្ទៃដី​ប្រទេស​៕