ព័ត៌មានជាតិ

ផ្លូវណាចាក់កៅស៊ូក្រាស់ជាងគេ ផ្លូវជាតិ ១៣ ខ្សែ បើកការដ្ឋានសាងសង់បន្តបន្ទាប់?

បានផុស

៧ ខែ មុន

នៅ

ថ្ងៃចន្ទ ៦ ឧសភា ២០២៤

ដោយ

បណ្តាញផ្លូវជាតិសំខាន់ៗចំនួន ១៣ ខ្សែ បានកំពុងដំណើរការស្ថាបនាដោយយកចិត្តទុកដាក់ពង្រឹងគុណភាពដើម្បីធានាការប្រើប្រាស់យូរអង្វែង។

បើកការដ្ឋានសាងសង់ជាបន្តបន្ទាប់គ្នា ផ្លូវជាតិទាំង ១៣ ខ្សែ សាងសង់ក្រាលដោយបេតុងកៅស៊ូ Alpha Concrete (AC) ដែលបើតាមបច្ចេកទេសអាចធានាការប្រើប្រាស់លើសពី ១០ ឆ្នាំ បើមានថែទាំនិងដឹកជញ្ជូនតាមស្តង់ដាបច្ចេកទេសត្រឹមត្រូវ។

ផ្លូវជាតិលេខ ៤ ពីភ្នំពេញទៅខេត្តព្រះសីហនុ

ផ្លូវជាតិលេខ ៤ ចាប់ពីបែកចាន ស្រុកអង្គស្នូល ខេត្តកណ្តាល ទៅឃុំបិតត្រាំង ស្រុកព្រៃនប់ ខេត្តព្រះសីហនុ បានបើកការដ្ឋានកែលម្អនិងពង្រីកពី ៧ ម៉ែត្រទៅ ១១ ម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវជាតិមួយខ្សែនេះពីមុនសាងសង់ដោយជំនួយរបស់អាមេរិក បច្ចុប្បន្នកំពុងស្ថាបនាពង្រីកឱ្យធំជាងមុន ដោយចំណាយថវិកាជាង ១០០ លានដុល្លារអាមេរិក ជាកម្ចីហិរញ្ញប្បទានពីធនាគារពិភពលោក។

ជាខ្សែផ្លូវជាតិដ៏សំខាន់តភ្ជាប់ទៅកំពង់ផែទឹកជ្រៅខេត្តព្រះសីហនុ អតីតផ្លូវសាងសង់ស្តង់ដារបស់អាមេរិកនេះចាក់ក្រាលកៅស៊ូប្រភេទ AC ពីលើកម្រាស់ ៧ ហ៊ុន ដែលគ្រោងចំណាយពេល ៥ ឆ្នាំគិតចាប់ពីឆ្នាំ ២០២២ ដល់ឆ្នាំ ២០២៦។

ផ្លូវជាតិលេខ ៧

កំណាត់ផ្លូវជាតិលេខ ៧ បានបើកការដ្ឋានសាងសង់ពង្រីកចាប់ពីរង្វល់មូលស្គន់ទីរួមស្រុកជើងព្រៃ រហូតដល់ទីរួមខេត្តកំពង់ចាមមានប្រវែងសរុបជាង ៤៥ គីឡូម៉ែត្រ។

កំណាត់ផ្លូវនេះស្ថាបនាដោយក្រាលបេតុងកៅស៊ូ (AC) កម្រាស់ ៩ សង់ទីម៉ែត្រ និងពង្រីកទទឹងតួផ្លូវពី ២ គន្លង ទៅ ៤ គន្លង ដោយគន្លងនីមួយៗមានប្រវែង ៣.៧៥ ម៉ែត្រ និងសួនពុះទ្រូងផ្លូវ ១.៥ ម៉ែត្រ។

គម្រោងរួមបញ្ចូលការបំពាក់កាមេរ៉ាត្រួតពិនិត្យល្បឿនរថយន្ត ២ កន្លែង បំពាក់ស្ថានីយជញ្ជីងថ្លឹងរថយន្តដឹកជញ្ជូនលើសទម្ងន់កម្រិតកំណត់វៃឆ្លាត និងត្រួតពិនិត្យដោយស្វ័យប្រវត្តិ (AI and Weigh-in-Motion) ចំនួន ២ កន្លែង ដោយប្រើប្រាស់រយៈពេលសាងសង់ចំនួន ៤០ ខែ នឹងបញ្ចប់នៅក្នុងឆ្នាំ២០២៦ ចំណាយថវិកាសរុបជាង ១១៧ លានដុល្លារអាមេរិក។

ផ្លូវជាតិលេខ ៤១

ផ្លូវជាតិលេខ ៤១ អតីតផ្លូវព្រះបាទអង្គឌួង ចេញចាប់ពីចំណុចថ្នល់ទទឹង (ចំណុចប្រសព្វផ្លូវជាតិលេខ៤) ខេត្តកណ្ដាល រហូតដល់ស្រុកជុំគិរី (ចំណុចប្រសព្វផ្លូវជាតិលេខ៣) ខេត្តកំពត បានបើកការដ្ឋានស្ដារនិងលើកកម្រិតគុណភាពកាលពីថ្ងៃទី២៦ ខែធ្នូ ឆ្នាំ២០២២ ដោយគ្រោងចំណាយថវិកាសរុបជាង ៦៧ លានដុល្លារ។

នៅក្នុងពិធីបើកការដ្ឋានស្ដារនិងលើកកម្រិតគុណភាពផ្លូវជាតិលេខ ៤១ ដែលឆ្លងកាត់ខេត្តចំនួន ៤ រួមមានគឺ ខេត្តកណ្តាល ខេត្តកំពង់ស្ពឺ ខេត្តតាកែវ និងខេត្តកំពត លោក ស៊ុន ចាន់ថុល អតីតរដ្ឋមន្ដ្រីក្រសួងសាធារណការ និងដឹកជញ្ជូន បានបញ្ជាក់ថា ផ្លូវជាតិលេខ ៤១ ដែលមានប្រវែងសរុបជាង ៩៥ គីឡូម៉ែត្រ សាងសង់ជាប្រភេទផ្លូវក្រាលបេតុងកៅស៊ូ AC កម្រាស់ ៥ សង់ទីម៉ែត្រ និងពង្រីកទទឹងតួផ្លូវរហូតដល់ ១២ ម៉ែត្រ។

គម្រោងស្ដារនិងលើកកម្រិតគុណភាពផ្លូវនេះ ក៏នឹងសាងសង់បន្ថែមសំណង់សិល្បការ្យផ្សេងៗរួមមាន៖ ពង្រីកស្ពានចាស់ចំនួន ១ កន្លែង ប្រវែងសរុប ២០០ ម៉ែត្រ ដាក់លូគ្រប់ប្រភេទចំនួន ៣១៥ កន្លែង បំពាក់កាមេរ៉ាត្រួតពិនិត្យល្បឿនចំនួន ៨ កន្លែង រួមទាំងបំពាក់ផ្លាកសញ្ញាចរាចរណ៍ គំនូសសញ្ញាចរាចរណ៍ បង្គោលគីឡូម៉ែត្រ និងបង្គោលសុវត្ថិភាពផងដែរ។

ផ្លូវជាតិលេខ ៤៨

ផ្លូវជាតិលេខ ៤៨ ពីចំណុចប្រសព្វផ្លូវជាតិលេខ ៤ ត្រង់គីឡូម៉ែត្រលេខ ១៤១+៧៥០ ស្ថិតក្នុងភូមិអូរជ្រៅ ឃុំបឹងព្រាវ ស្រុកស្រែអំបិល រហូតដល់ក្រុងខេមរភូមិន្ទ ខេត្តកោះកុង បានបើកការដ្ឋានសាងសង់កាលពីថ្ងៃ ០៣ មករា ឆ្នាំ ២០២២។

មានប្រវែងសរុប ១៤៨ គីឡូម៉ែត្រ ផ្លូវជាតិទៅខេត្តជាប់សមុទ្រនៃខេត្តកោះកុង ស្ថាបនាដោយក្រាលបេតុងកៅស៊ូ (AC) កម្រាស់ ៧ សង់ទីម៉ែត្រ និងក្រាលបេតុងសរសៃដែកកម្រាស់ ២៥ សង់ទីម៉ែត្រនៅត្រង់ចំណុចផ្លូវប្រសព្វចំនួន ៥ កន្លែង រួមមាន៖ ចំណុចប្រសព្វចំការហ្លួង ចំណុចប្រសព្វស្រែអំបិល ចំណុចប្រសព្វផ្លូវបំបែកចូលទៅគិរីសាគរ ចំណុចប្រសព្វផ្លូវបំបែកចូលទៅទំនប់វារីអគ្គិសនី និងចំណុចប្រសព្វផ្លូវបំបែកចូលទៅព្រលានយន្តហោះខេត្តកោះកុង។

ផ្លូវជាតិលេខ ៣១ និង ៣៣

ការដ្ឋានលើកកម្រិតគុណភាពផ្លូវជាតិលេខ ៣១ និង ៣៣ ស្ថិតក្នុងភូមិសាស្ត្រខេត្តកំពត និងខេត្តកែប បានធ្វើឡើងកាលពីនៅព្រឹកថ្ងៃទី៣០ ខែធ្នូ ឆ្នាំ២០២២នេះ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា និងលោក វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា។

ផ្លូវជាតិលេខ ៣១ កំពុងឈានទៅចាក់ក្រាលកៅស៊ូ

ផ្លូវជាតិលេខ ៣១ ដែលសាងសង់មានប្រវែងសរុបជិត ៥៤ គីឡូម៉ែត្រ ចាប់ពីបែកគុស (ចំណុចប្រសព្វផ្លូវ ជាតិលេខ៣) ទៅដល់ទីរួមស្រុកកំពង់ ត្រាច (ចំណុចតភ្ជាប់ផ្លូវជាតិលេខ ៣៣)។ ផ្លូវនេះត្រូវស្ដារនិងលើកកម្រិតគុណភាពជាប្រភេទផ្លូវក្រាលបេតុងកៅស៊ូ (AC) មានកម្រាស់ ៧ សង់ទីម៉ែត្រ ដោយពង្រីកទទឹងតួផ្លូវរហូតដល់ ១២ម៉ែត្រ។

ចំណែកផ្លូវជាតិលេខ ៣៣ ដែលមានប្រវែងសរុបជិត ៥៣ គីឡូម៉ែត្រ ចាប់ពីក្រុងកំពត (ចំណុចប្រសព្វផ្លូវជាតិលេខ ៣) ដល់ច្រកលក (ព្រំដែនកម្ពុជា-វៀតណាម) រួមទាំងផ្លូវតភ្ជាប់ក្នុងក្រុងកំពត (ផ្លូវក្រុងលេខ៧០៩) ត្រូវស្ដារនិងលើកកម្រិតគុណភាពជាប្រភេទផ្លូវ ក្រាលបេតុងកៅស៊ូ (AC) មានកម្រាស់ ៥ សង់ទីម៉ែត្រ និងកម្រាស់ ៧ សង់ទីម៉ែត្រ ព្រមទាំងពង្រីកទទឹងតួផ្លូវរហូតដល់ ១២ ម៉ែត្រ។ មានកំណាត់ផ្លូវចំនួន ៤ ទីតាំង នឹងត្រូវពង្រីកជា ៤ គន្លង (២ គន្លងទៅ ២ គន្លងមក) ប្រវែងសរុប ១,៤៣១ ម៉ែត្រ និង ១ ទីតាំងទៀតនឹងត្រូវពង្រីកជា ៦ គន្លង (៣ គន្លងទៅ ៣ គន្លងមក) ប្រវែង ៤៨០ម៉ែត្រ។

គម្រោងស្ថាបនាផ្លូវជាតិទាំងពីរខ្សែនេះ ក៏មានបំពាក់កាំមេរ៉ាត្រួតពិនិត្យល្បឿនចំនួន ៥ កន្លែង នៅលើខ្សែផ្លូវនីមួយៗ ដែលគ្រោងប្រើពេលវេលាសាងសង់ចំនួន ៤០ ខែ បញ្ចប់នៅក្នុងឆ្នាំ២០២៦។

ផ្លូវជាតិលេខ ៥

គម្រោងធ្វើឱ្យប្រសើរឡើងផ្លូវជាតិលេខ ៥ បានបើកការដ្ឋានសាងសង់កាលពីឆ្នាំ២០១៨ ចែកចេញជា ៣ ផ្នែកធំៗរួមមាន កំណាត់ភាគខាងជើង (បាត់ដំបង-សិរីសោភ័ណ) កំណាត់ទី២ ភាគខាងត្បូង (ព្រែកក្តាម-ធ្លាម្អម) និងកំណាត់ទី៣ ភាគកណ្តាល (ធ្លាម្អម-បាត់ដំបង និងសិរីសោភ័ណ-ប៉ោយប៉ែត) មានប្រវែងសរុប ៣០៤ គីឡូម៉ែត្រ។

ការធ្វើឲ្យប្រសើរឡើងវិញនៃផ្លូវជាតិលេខ៥ គឺជាគម្រោងស្ដារហេដ្ឋារចនាសម្ព័ន្ធដ៏ធំមួយនៅក្នុងប្រទេសកម្ពុជា ដោយសារផ្លូវមួយខ្សែនេះមានប្រវែងវែងតភ្ជាប់ពីរាជធានីភ្នំពេញ រហូតទៅដល់ច្រកព្រំដែនកម្ពុជា-ថៃ ភាគពាយព្យ ឆ្លងកាត់ខេត្តចំនួន ៥ រួមមាន៖ កណ្ដាល, កំពង់ឆ្នាំង, ពោធិ៍សាត់, បាត់ដំបង, និងបន្ទាយមានជ័យ ហើយក៏ជាផ្លូវសសៃឈាមសេដ្ឋកិច្ចដ៏សំខាន់របស់កម្ពុជាផងដែរ។

ការសាងសង់ផ្លូវជាតិលេខ៥ ដែលជាផ្លូវអាស៊ានហាយវ៉េលេខ ១ ត្រូវផ្ដោតសំខាន់លើគុណភាព និងអាចប្រើប្រាស់បានយូរអង្វែងដោយក្រាលបេតុងកៅស៊ូ (AC) កម្រាស់ ១៥ សង់ទីម៉ែត្រ មានសួនពុះកណ្តាល ដោយបានចំណាយថវិកាសាងសង់ប្រមាណ ៥០០ លានដុល្លារសហរដ្ឋអាមេរិក ក្រោមកម្ចីឥណទានសម្បទានពីរាជរដ្ឋាភិបាលជប៉ុន។

ផ្លូវជាតិលេខ ៧៣ ផ្លូវខេត្ត ៣៧៧ និងផ្លូវខេត្តលេខ ៣៧៧ A

គម្រោងលើកកម្រិតគុណភាព និងជួសជុលថែទាំកំណាត់ផ្លូវទាំង ៣ ខ្សែ ក្នុងខេត្តក្រចេះប្រវែងជាង ៩៨គ.ម បានចាប់ផ្តើមបើកការដ្ឋានសាងសង់កាលពីឆ្នាំ ២០២៣ ដោយគ្រោងចំណាយពេល ១៨ ខែ និង ថវិកាប្រមាណ ៤០ លានដុល្លារ។

ក្នុងនោះកំណាត់ផ្លូវជាតិលេខ ៧៣ មានប្រវែង ៤៩,៨១គីឡូម៉ែត្រ ចាប់ពីផ្លូវបំបែកប្រធាតុ ភូមិប្រធាតុ ឃុំស្រឡប់ ស្រុកត្បូងឃ្មុំ ទៅដល់ស្ពានកំពង់រាំង ឃុំសេដា ស្រុកតំបែរ (ព្រំប្រទល់ខេត្តក្រចេះ) ត្រូវស្តារពង្រីក និងលើកកម្រិតគុណភាពជាប្រភេទផ្លូវក្រាលកៅស៊ូ AC កម្រាស់ ៥ សង់ទីម៉ែត្រ និងក្រាលបេតុងសរសៃដែកកម្រាស់ ២០ សង់ទីម៉ែត្រ ទទឹង ១០-១៣ ម៉ែត្រ (សម្រាប់ផ្លូវ ២ គន្លង) និងទទឹង១៥,៧-១៦ម៉ែត្រ (សម្រាប់ផ្លូវ ៤គន្លង ក្នុងទីប្រជុំជន)។

ចំណែកឯផ្លូវខេត្តលេខ ៣៧៧ និង ៣៧៧A មានប្រវែងសរុប ៤៨,៦ គីឡូម៉ែត្រ ក្នុងនោះ ផ្លូវខេត្តលេខ ៣៧៧ មានប្រវែង ៣៥ គីឡូម៉ែត្រ ចាប់ពីរង្វង់មូលព្រាប ស (ក្រុងក្រចេះ) ដល់ស្រុកសំបូរ និងផ្លូវខេត្តលេខ ៣៧៧A មានប្រវែង ១៣,៦ គីឡូម៉ែត្រ ចាប់ពីផ្សារសណ្តាន់ ឃុំសណ្តាន់ ដល់ភូមិសង្គម ឃុំសណ្តាន់ នៃស្រុកសំបូរ។

ផ្លូវខេត្តទាំង ២ ខ្សែនេះ នឹងត្រូវស្តារពង្រីកនិងលើកកម្រិតគុណភាពជាប្រភេទផ្លូវក្រាលបេតុងកៅស៊ូ (AC) កម្រាស់ ៥ សង់ទីម៉ែត្រ និងក្រាលបេតុងសរសៃដែកកម្រាស់ ២០ សង់ទីម៉ែត្រ មានទទឹងចាប់ពី ៧-១១ម៉ែត្រ មាន ២ គន្លងទៅមក ព្រមទាំងការសាងសង់ស្ពានថ្មីចំនួន ៩ កន្លែង (នៅលើផ្លូវខេត្តលេខ៣៧៧)។

ផ្លូវជាតិលេខ ៧១ សេ

ផ្លូវជាតិលេខ ៧១ សេ សាងសង់ឡើងចាប់ផ្តើមពីស្រុកចំការលើឆ្លងកាត់ស្ពានស្ទឹងត្រង់ក្រូចឆ្មារតភ្ជាប់ទៅដល់តំបន់រដ្ឋបាលខេត្តត្បូងឃ្មុំ។

ផ្លូវជាតិលេខ ៧១C ដែលមានប្រវែងសរុប ១១៤,៩៩២ គីឡូម៉ែត្រ បានបើកការដ្ឋានសាងសង់កាលពីថ្ងៃទី២១ ខែមេសា ឆ្នាំ២០២១ ជាប្រភេទផ្លូវក្រាលកៅស៊ូបេតុង (AC) កម្រាស់ ៧ សង់ទីម៉ែត្រ ដែលប្រើប្រាស់រយៈពេលសាងសង់ ៤២ ខែ ចំណាយថវិកាប្រមាណ ១២៩,៩៨ លានដុល្លារអាមេរិក។

ផ្លូវជាតិលេខ ២៣

កំណាត់ផ្លូវជាតិលេខ២៣ គឺជាខ្សែផ្លូវដ៏មានសក្តានុពល និងមានភាពប្រទាក់ក្រឡាតភ្ជាប់ជាមួយផ្លូវជាតិលេខ ២១B និងផ្លូវជាតិលេខ ២១ ឆ្ពោះទៅកាន់ទិសដៅរាជធានីភ្នំពេញ និងព្រំដែនកម្ពុជា-វៀតណាម (ជ្រៃធំ-ឡុងប៊ិញ) និងតភ្ជាប់ជាមួយផ្លូវជាតិលេខ ១៤ ទិសដៅអ្នកលឿង ខេត្តព្រៃវែង និងព្រំដែនកម្ពុជា-វៀតណាម (ក្អមសំណ-វិញសឿង) និងតភ្ជាប់ជាមួយបណ្តាញខ្សែផ្លូវផ្សេងៗដទៃទៀតនៅក្នុងតំបន់នេះ។

ចំណុចចាប់ផ្តើមផ្លូវនេះ ចាប់ពីឃុំជ្រោយតាកែវឆ្លងកាត់ឃុំលើកដែក ស្រុកកោះធំ (ចាប់ពីគល់ស្ពានកោះធំ) រហូតដល់ឃុំពាមរាំង ស្រុកលើកដែក (តភ្ជាប់ជាមួយផ្លូវខេត្តលេខ១៤) នៃភូមិសាស្រ្តខេត្តកណ្តាល។

គម្រោងត្រូវស្ថាបនាជា ២ គន្លងទៅ និង ២ គន្លងមក ដោយពង្រីកទទឹងតួផ្លូវប្រវែង ១១ ម៉ែត្រ និងក្រាលកៅស៊ូ AC កម្រាស់ ៨ សង់ទីម៉ែត្រ លើទទឹងតួផ្លូវប្រវែង ១០ម៉ែត្រ រយៈពេលសាងសង់ចំនួន ២៤ ខែ និងប្រើប្រាស់ថវិកាដែលជាឥណទានសម្បទានរបស់ធនាគារអភិវឌ្ឍន៍អាស៊ីសរុបប្រមាណ ២១,៦៨ លានដុល្លារអាមេរិក។

ផ្លូវខេត្តលេខ ៣១២

ផ្លូវខេត្តលេខ៣១២ គឺជាខ្សែផ្លូវយុទ្ធសាស្ត្រដ៏សំខាន់ដែលសាងសង់ឆ្លងកាត់ឃុំចំនួន ៤ ក្នុងភូមិសាស្ត្រនៃស្រុកព្រះស្តេច ខេត្តព្រៃវែងរួមមាន៖ ឃុំល្វា ឃុំជ័យកំពក ឃុំអង្គររាជ និងឃុំបន្ទាយចក្រី។

ខ្សែផ្លូវនេះមានភាពប្រទាក់ក្រឡាគ្នាជាមួយនឹងផ្លូវជាតិលេខ ១ ផ្លូវខេត្តលេខ ៣១២A និងផ្លូវក្រវាត់ព្រំដែន ដែលបានតភ្ជាប់តំបន់ទីប្រជុំជនទៅកាន់តំបន់ព្រំដែន (កម្ពុជា-វៀតណាម)។

គម្រោងផ្លូវនេះត្រូវស្ដារពង្រីកទទឹងតួផ្លូវពី ៤ ទៅ ៥ ម៉ែត្រ ទៅទទឹងតួផ្លូវប្រវែង ១២ ម៉ែត្រ និងលើកកម្រិតគុណភាពពីប្រភេទផ្លូវក្រាលកៅស៊ូពីរស្រទាប់ (DBST) ទៅជាប្រភេទផ្លូវក្រាលកៅស៊ូ AC មានកម្រាស់ ៦ សង់ទីម៉ែត្រ និង ៨ សង់ទីម៉ែត្រ។ ផ្លូវនេះក្រាលបេតុងសរសៃដែកកម្រាស់ ២៥ សង់ទីម៉ែត្រ ដែលមានទទឹងរួម ១១ ម៉ែត្រ និងមានគន្លងសម្រាប់រថយន្ត និងគន្លងសម្រាប់ទោចក្រយានធ្វើចរាចរណ៍ ២ គន្លងទៅមក៕