ក្រុមការងារជំនាញកោះកុង បង្ខិតសេវាត្រួតពិនិត្យចុះបញ្ជីជលយានយន្តជូនប្រជានេសាទ

ក្រុមការងារជំនាញរបស់រដ្ឋបាលខេត្តកោះកុង កំពុងបន្តចុះត្រួតពិនិត្យបែបបទរដ្ឋបាល និងបច្ចេកទេសលើយន្តការចុះបញ្ជីជលយានយន្ត ជូនប្រជាពលរដ្ឋនៅ ឃុំប៉ាក់ខ្លង ស្រុកមណ្ឌលសីមា ដើម្បីសម្រេចតាមផែនការធ្វើបច្ចុប្បន្នភាពស្ថិតិជលយានយន្ត។

គ្មានការប្រែប្រួលទេ ចាប់ពីថ្ងៃទី៦ ដល់ថ្ងៃទី១៧ ខែឧសភា ឆ្នាំ២០២៤ ជាដំណើការបន្តផ្តល់សេវាកម្មចុះបញ្ជីជលយានយន្ត និងផ្តល់លិខិតអនុញ្ញាតលើអាជីវកម្មនេសាទក្នុងខេត្តកោះកុង ក្នុងមូលដ្ឋាន ស្រុកមណ្ឌលសីមា។ បន្ទាប់ពី ក្រុងខេមរភូមិន្ទ បានបញ្ចប់ការងារបែបបទនេះរួចរាល់ នៅថ្ងៃទី៣ ខែឧសភា កន្លងទៅ។

លោកស្រី អ៊ី នារីនេត អភិបាលរងខេត្តកោះកុង លើកឡើងថា ក្រុមការងាររបស់រដ្ឋបាល មន្ទីរជំនាញ និងអាជ្ញាធរមូលដ្ឋាន បានសហការគ្នាយ៉ាងសកម្ម ដើម្បីធ្វើយ៉ាងណាសម្របសម្រួលផ្តល់សេវាកម្មចុះបញ្ជីជលយានយន្តជូនប្រជាពលរដ្ឋល្អប្រសើរ។ ហើយថែមទាំងបង្ខិតសេវានេះឱ្យគៀកនឹងសហគមន៍រស់នៅពលរដ្ឋតែម្តង មិនឱ្យចំណាយពេលវេលា ឬថវិកាច្រើនឡើយ។

លោកស្រីអភិបាលរងខេត្ត អះអាងថា តាមបទពិសោធន៍កន្លងទៅ នៅក្រុងខេមរភូមិន្ទ ឃើញថា ពលរដ្ឋជាម្ចាស់ជលយានយន្តទាំងអស់ បានការយល់ដឹងពីកាតព្វកិច្ចរបស់ខ្លួនច្រើនចំពោះមុខច្បាប់ ដោយនាំគ្នាមកទទួលសេវាដោយទំនួលខុសត្រូវខ្ពស់។ កន្លងទៅ ក្រុមការងារបានផ្តល់សេវាកម្មចុះបញ្ជីជលយានយន្ត និងផ្តល់លិខិតអនុញ្ញាតធ្វើអាជីវកម្មនេសាទនៅក្នុងក្រុងខេមរភូមិន្ទ បានសរុបប្រមាណ ៦៤ ជលយានយន្ត។

លោក ខាត់ ឃួន និង លោក យិន លីសេង តំណាងម្ចាស់ទូកនេសាទនៅក្នុង ឃុំប៉ាក់ខ្លង ស្រុកមណ្ឌលសីមា យល់ថា ការណ៍មានក្រុមការងារជំនាញចុះមកពិនិត្យផ្តល់សេវាចុះបញ្ជីជលយានយន្តដល់សហគមន៍នេះ បានផ្តល់ផលចំណេញថវិកា និងពេលវេលាច្រើនជាងពេលមុន ពិសេសកាត់បន្ថយអំពើពុករលួយតែម្តង។

តំណាងក្រុមម្ចាស់ទូកនេសាទ អះអាងទៀតថា ការចុះបញ្ជីជលយានយន្ត និងផ្តល់លិខិតអនុញ្ញាតធ្វើអាជីវកម្មនេសាទ ជាយន្តផ្តល់ភាពស្របច្បាប់មួយចំពោះ ពួកគាត់ គ្រាកន្លងទៅមិនធ្លាប់ទទួលបាន និងងាយជួបបញ្ហាប្រឈមនានាក្នុងលើផ្ទៃសមុទ្រអំឡុងពេលនេសាទ។ ពួកគាត់នឹងបន្តផ្សព្វផ្សាយជូនប្រជាពលរដ្ឋដទៃទៀត ដើម្បីចូលរួមបំពេញកាតព្វកិច្ច និងសហការជាមួយអាជ្ញាធរមន្រ្តីជំនាញ។

គួរបញ្ជាក់ថា យុទ្ធការចុះបញ្ជីជលយានយន្តនៅពេលនេះ គឺធ្វើឡើងក្នុងគោលបំណង ធ្វើបច្ចុប្បន្នភាពចំនួនជលយានគ្រប់ប្រភេទត្រឹមត្រូវ បង្ការបាត់ទូកអាចកំនត់អត្តសញ្ញាណរកឃើញភ្លាមៗ និងកាត់បន្ថយអត្រាគ្រោះថ្នាក់ផ្នែកបច្ចេកទេសផ្សេងៗធ្វើចេញចរាចរណ៍នៅលំហសមុទ្រ ពិសេសកាត់បន្ថយការនេសាទហួសកម្រិតជាដើម៕

អត្ថបទ៖ សិរីវឌ្ឍនៈ