ព័ត៌មានជាតិ

ពលរដ្ឋស្រុកក្រូចឆ្មារនឹងទទួលបានផ្លូវ ៤ខ្សែ បន្ថែមទៀត ក្នុងពេលឆាប់ៗ

បានផុស

១១ ខែ មុន

នៅ

ថ្ងៃចន្ទ ៦ ឧសភា ២០២៤

ដោយ

ត្បូងឃ្មុំ ៖ គម្រោងដេញថ្លៃផ្លូវបេតុងអាមេ និងផ្លូវគ្រួសក្រហមចំនួន៤ខ្សែ នៅក្នុងសាលាឃុំកំពង់ទ្រាស ស្រុកក្រូចឆ្មារ ខេត្តត្បូងឃ្មុំ នាព្រឹកថ្ងៃទី៦ ខែឧសភា ឆ្នាំ២០២៤នេះ គេឃើញមានការរៀបចំដាក់ឲ្យដេញថ្លៃ ផ្លូវបេតុង និងផ្លូវគ្រួសក្រហម ទៅតាមនីតិវិធីយ៉ាងមានរបៀបវារៈ ក្នុងដំណើរការដូចសព្វមួយដង គ្មានភាពរញ៉េរញ៉ៃ តាមរយៈការរុញច្រានគ្នា គ្មានការឡាំប៉ា ខុសឯកតា គណនាកែទិន្នន័យខុសបច្ចេកទេសនោះទេ បរិយាកាសដ៏ស្អាតស្អំនេះ ប្រជាពលរដ្ឋគ្មានការសង្ស័យថា លទ្ធផលបានទៅក្រុមហ៊ុនដដែលៗ នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សឺង គិរីវ៉ាន់ឌី នាយកទីចាត់ការ ផែនការវិនិយោគខេត្ត បានបញ្ជាក់ថា ផ្លូវទាំង ៤គម្រោង ខាងលើរួមមាន. ឃុំកំពង់ទ្រាស ស្រុកក្រូចឆ្មារ គម្រោងទី ១ ជួសជុលផ្លូវគ្រួសក្រហមប្រវែង ២,០៥ គីឡូម៉ែត្រ ទទឹង ៥ ម៉ែត្រ តម្លៃដាក់ឲ្យដេញតម្លៃជិត១៧៤លានរៀល គម្រោងទី២ ផ្លូវបេតុងអាមេ ប្រវែង ០,២ គីឡូម៉ែត្រ ទទឹង ៤ ម៉ែត្រ តម្លៃដាក់ឲ្យដេញជិត ១១៩លានរៀល គម្រោងទី ៣ របស់ឃុំប៉ឺស១ សាងសង់ផ្លូវបេតុងអាមេប្រវែង ០,២៣៥ គីឡូម៉ែត្រ ទទឹងប្រវែង ៤ ម៉ែត្រ តម្លៃដាក់ឲ្យដេញ ជិត១២៧លានរៀល និងគម្រោងទី៤ របស់ឃុំប៉ឹស១ ដែរ សាងសង់ផ្លូវគ្រួសធម្មជាតិប្រវែង ១,៥ គីឡូម៉ែត្រ ទទឹង៥ ម៉ែត្រ តម្លៃដាក់ឲ្យដេញតម្លៃជិត ១៥២លានរៀល លទ្ធផលជោគជ័យទាំង ៤គម្រោង បានទៅក្រុមហ៊ុន លន់ រិទ្ធី ដេញបានទាំងអស់តែម្ដង។

លោកនាយទីចាត់ការ ផែនការវិនិយោគខេត្តបានឲ្យដឹងបន្ថែមទៀតថា ក្រុមហ៊ុនប្រកួតប្រជែងមានចំនួន ១៥ក្រុមហ៊ុន ក្រោយបើកសំណើបានទៅក្រុមហ៊ុន លន់ រិទ្ធី ទាំង៤គម្រោង ដែលទទួលបានសិទ្ធិក្នុងការសាងសង់ តម្លៃសរុបដេញបានទាំង៤គម្រោងចំនួនទឹកប្រាក់៥៣៨លានរៀល។

ប្រជាពលរដ្ឋក្នុងមូលដ្ឋាននោះសង្កេតឃើញថា ការដេញថ្លៃខាងលើនេះ ប្រកបដោយបរិយាកាសល្អ មានការប្រកួតប្រជែង ច្បាស់លាស់ សង្ឃឹមថា ក្រុមហ៊ុនដែលទទួលបានសិទ្ធិក្នុងការសាងសង់ផ្លូវនេះនឹងមានគុណភាពល្អពិតប្រាកដ ព្រោះពេលសាងសង់ផ្លូវ ពួកគាត់ចូលរួមពិនិត្យបើត្រូវស្តង់ដារទើបពួកគាត់ទទួលយក បើធ្វើខុសបច្ចេកទេសពួកគាត់មិនទទួលយកទេ៕

ដោយ ៖ សាន វិឡែម