ព័ត៌មានជាតិ

ស្ពានឆ្លងកាត់ទន្លេមេគង្គនៅខេត្តក្រចេះ សាងសង់សម្រេចបានជិត ៥០%

បានផុស

៩ ខែ មុន

នៅ

ថ្ងៃពុធ ៨ ឧសភា ២០២៤

ដោយ

គម្រោងស្ពានឆ្លងកាត់ទន្លេមេគង្គខេត្តក្រចេះដែលមានប្រវែង ១ ៧៦១ ម៉ែត្រ ស្ថិតនៅស្រុកចិត្របុរី និងស្រុកព្រែកប្រសព្វ សម្រេចការសាងសង់បាន ៤៩,១៨% គិតត្រឹមដើមខែឧសភា ឆ្នាំ២០២៤ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយការដ្ឋានស្ពានកំពុងដំណើរការសាងសង់ ដោយឡែកផ្លូវនិងផ្លូវខ្នែងតភ្ជាប់ជាមួយគម្រោងស្ពានមានប្រវែងសរុប ៣៣,៤៥៩ គីឡូម៉ែត្រ ជាលទ្ធផលក៏សម្រេចបាន ៣៦,២៤%។

ស្ពានឆ្លងទន្លេមេគង្គខេត្តក្រចេះ បានបើកការដ្ឋានសាងសង់កាលពីថ្ងៃទី ២ ខែមករា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងលោក វ៉ាង វិនធៀន ឯកអគ្គរដ្ឋទូតចិនប្រចាំនៅព្រះរាជាណាចក្រកម្ពុជា។

ដោយប្រើប្រាស់ឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន ស្ពានឆ្លងទន្លេខេត្តក្រចេះគ្រោងនឹងបញ្ចប់ការសាងសង់ឱ្យបានមុនខែកញ្ញា ឆ្នាំ២០២៦។ នេះបើតាមមន្រ្តីក្រសួងសាធារណការនិងដឹកជញ្ជូន។

យ៉ាងណាមិញ បើតាមមេការចិនដែលទទួលខុសត្រូវការដ្ឋានស្ពានឆ្លងទន្លេខេត្តក្រចេះបានប្រាប់កម្ពុជាថ្មីកាលពីពេលថ្មីៗនេះថា គម្រោងស្ពានខេត្តក្រចេះអាចសាងសង់សម្រេចមុនផែនការ ហើយយ៉ាងយូរត្រឹមឆ្នាំក្រោយនឹងរួចរាល់។

មេការចិនរូបនេះអះអាងថា បច្ចុប្បន្នក្រុមការងារកំពុងសម្រុកធ្វើគ្រឹះសសរស្ពានដែលសម្រេចបានជាច្រើនភាគរយ។

បើតាមមេការចិនដែលអាចនិយាយខ្មែរបានតិចៗផងនោះ ក្រៅពីស្ពានក្នុងគម្រោងក៏ត្រូវស្ថាបនាផ្លូវតភ្ជាប់ចេញពីរង្វង់មូលគល់ស្ពានទាំងសងខាងមានប្រវែងជាង ១០ គីឡូម៉ែត្រថែមទៀត៕