ព័ត៌មានជាតិ

១ សប្តាហ៍នេះ ខ្យល់កន្ត្រាក់ បានបំផ្លាញលំនៅឋានពលរដ្ឋជិត ១ ពាន់ខ្នង នៅទូទាំងប្រទេស

បានផុស

៨ ខែ មុន

នៅ

ថ្ងៃពុធ ៨ ឧសភា ២០២៤

ដោយ

ក្នុងរយៈពេល ១ សប្ដាហ៍នេះ ខ្យល់កន្ត្រាក់បានកើតឡើងទៅលើខេត្តប្រមាណជិត ២០ បណ្តាលឱ្យប៉ះពាល់ដល់ផ្ទះសម្បែងប្រជាពលរដ្ឋជិត ១ ០០០ ខ្នង នៅទូទាំងប្រទេស។

លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ០៨ ឧសភា នេះថា នៅដើមខែឧសភានេះ ប្រទេសកម្ពុជា មានភ្លៀងធ្លាក់ជាបន្តបន្ទាប់បានបណ្ដាលឱ្យមានខ្យល់កន្ត្រាក់ជាច្រើនលើក និងផ្គររន្ទះប៉ះពាល់ដល់លំនៅឋានប្រជាពលរដ្ឋ ក៏ដូចជាសត្វពាហនៈផងដែរ។ ជាក់ស្ដែងក្នុងរយៈពេល ១ សប្តាហ៍នេះ ខ្យល់កន្ត្រាក់បានប៉ះពាល់ដល់លំនៅឋានប្រជាពលរដ្ឋជិត ១ ០០០ ខ្នង រួមទាំងការខូចខាតផ្ទះទាំងស្រុង កម្រិតមធ្យម និងកម្រិតស្រាល នៅខេត្តឧត្តរមានជ័យ មណ្ឌលគិរី កំពង់ធំ កំពង់ឆ្នាំង ក្រចេះ បាត់ដំបង សៀមរាប រតនគិរី ត្បូងឃ្មុំ តាកែវ ព្រះវិហារ ស្វាយរៀង ព្រៃវែង ប៉ៃលិន កំពត កំពង់ចាម ស្ទឹងត្រែង និងពោធិ៍សាត់។

លោកបានបន្តទៀតថា សាខាកាកបាទក្រហមកម្ពុជា បានផ្តល់ជំនួយមនុស្សធម៌ដល់គ្រួសាររងគ្រោះដោយខ្យល់កន្ត្រាក់។ ចំណែកអាជ្ញាធរមូលដ្ឋាន សហការជាមួយកងកម្លាំងប្រដាប់អាវុធទាំង ៣ ប្រភេទ បានចុះជួយអន្តរាគមន៍ដល់ប្រជាពលរដ្ឋរងគ្រោះទាំងនោះបានទាន់ពេលវេលាដូចជាជួយជួសជុលលំនៅឋានរងការខូចខាតមធ្យម និងស្រាល ដើម្បីឱ្យពួកគាត់បានស្នាក់នៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក៏ដោយ លោក សុទ្ធគឹម កុលមុនី បានអំពាវនាវដល់ក្រសួង-ស្ថាប័នជំនាញតាមដានការព្យាករណ៍ស្ថានភាពអាកាសធាតុខ្យល់កន្ត្រាក់ជាប្រចាំ ដើម្បីឱ្យអាជ្ញាធរត្រៀមបង្ការ និងអន្តរាគមន៍ឆ្លើយតបឱ្យបានទាន់ពេលវេលា។ រីឯប្រជាពលរដ្ឋ ក៏ត្រូវតាមដានផងដែរ និងត្រៀមលក្ខណៈគ្រប់គ្រាន់ ដើម្បីកាត់បន្ថយនូវផលប៉ះពាល់ផ្សេងៗ ហើយមុននឹងសាងសង់លំនៅឋាន ត្រូវសិក្សាជាមួយអ្នកជំនាញឱ្យបានច្បាស់លាស់ ដើម្បីធន់ទៅនឹងខ្យល់កន្ត្រាក់ និងអាកាសធាតុ៕

អត្ថបទ ៖ សំអឿន