ព័ត៌មានជាតិ

ថ្នាក់ដឹកនាំក្រសួងកសិកម្ម ចុះទស្សនកិច្ចសហគមន៍កសិកម្មទំនើបស្រូវនាងអំ នៅឃុំកន្តួត

បានផុស

៩ ខែ មុន

នៅ

ថ្ងៃសុក្រ ១០ ឧសភា ២០២៤

ដោយ

គណៈប្រតិភូក្រសួងកសិកម្ម រុក្ខាប្រមាញ់ និងនេសាទ ដែលដឹកនាំដោយលោក ឌិត ទីណា រដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ បានធ្វើទស្សនកិច្ចនៅសហគមន៍កសិកម្មទំនើបស្រូវនាងអំ ស្ថិតនៅស្រុកស្វាយលើ នាថ្ងៃទី៩ ខែឧសភា ឆ្នាំ២០២៤ នៃខេត្តសៀមរាប។

លោកទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាបបានឲ្យដឹងនៅរសៀលថ្ងៃទី១០ ខែឧសភា ឆ្នាំ២០២៤នេះថា តំបន់ដែលធ្វើស្រូវនិងអំ ក្នុងភូមិសាស្ត្រនៃឃុំកន្ទួត ស្រុកស្វាយលើ នេះគឺប្រធានសហគមន៍ស្រូវនិងអំ បានស្នើសុំច្បាប់ទម្លាប់ត្រឹម។

លោកបន្តថា ប្រមុខនៃរាជរដ្ឋាភិបាលកម្ពុជានិងក្រសួងកសិកម្មរុក្ខាប្រមាញ់និងនេសាទ មានគោលបំណងរៀបចំគិតគូរធ្វើយ៉ាងណា ដើម្បីឲ្យប្រជាកសិករនៅតំបន់នោះមានការងារធ្វើជាពិសេស យើងត្រូវនាំគ្នាអភិរក្សពូជស្រូវនាងអំ នេះដើម្បីកុំឲ្យដាច់ពូជ។ លោកក៏បានសំណូមពរឲ្យសាធារណជនក៏ដូចជាអ្នកសារព័ត៌មានមេត្តាជ្រាបថា ដីនៅតំបន់នោះគឺសហគមន៍បានទិញពីពលរដ្ឋដែលមានប្លង់ត្រឹមត្រូវ។មិនមែនជាដីដែលជាប់ពាក់ព័ន្ធតំបន់ការពារឬគម្របព្រៃឈើអ្វីនោះទេ។

លោកបញ្ជាក់ទៀតថា គណៈប្រតិភូក្រសួងកសិកម្ម រុក្ខាប្រមាញ់ និងនេសាទ ដែលដឹកនាំដោយលោក ឌិត ទីណា រដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ គឺមានគោលបំណងសំខាន់នៃកម្មវិធីទស្សនកិច្ចរបស់ ដើម្បីពិនិត្យស្ថានភាពជាក់ស្តែង និងលើកទឹកចិត្តដល់ សហគមន៍កសិកម្មទំនើប ដែលជាសហគមន៍កសិកម្មទំនើបដំបូងនៅកម្ពុជា ដែលត្រូវបានក្រសួងកសិកម្ម រុក្ខាប្រមាញ់ និងនេសាទបានសម្របសម្រួលបង្កើតសហគមន៍កសិកម្មទំនើប ដើម្បីអនុវត្តកម្មវិធីគោលនយោបាយទី៦ របស់រាជរដ្ឋាភិបាលកម្ពុជានីតិកាលទី៧ នៃរដ្ឋសភា ស្តីពីការអភិវឌ្ឍសហគមន៍កសិកម្មទំនើប៕

ដោយ ៖ ជុន កុសល