ព័ត៌មានជាតិ
ប្រឡងសិស្សពូកែឆ្នាំនេះ ជ្រើសរើសយកជយលាភីត្រឹមលេខ ១ ដល់លេខ ៥
លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជននិងកីឡាបានមានប្រសាសន៍នៅរសៀលថ្ងៃទី ១៤ ឧសភា នេះ ថាការប្រឡងជ្រើសរើសសិស្សពូកែផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី ៩ និងថ្នាក់ទី ១២ ទូទាំងប្រទេសនៅឆ្នាំ២០២៤ ក្រសួងជ្រើសរើសយកតែចំណាត់ថ្នាក់លេខ ១ ដល់លេខ ៥ ប៉ុណ្ណោះខណៈឆ្នាំមុនៗជ្រើសរើសពីលេខ ១ដល់លេខ ១០។
លោកស្រីបានឲ្យដឹងថា ក្នុងនោះចំណាត់ថ្នាក់លេខ ១ ទទួលបានថវិកា ៣ លាន ៥ សែនរៀល លេខ ២ បាន ៣ លាន ២ សែនរៀល លេខ ៣ បាន ២ លាន ៩ សែនរៀលលេខ ៤ បាន ២ លាន ៦ សែនរៀលនិងលេខ ៥ បាន ២ លាន ៣ សែនរៀល។ សិស្សជយលាភីក៏អាចនឹងទទួលប្រាក់រង្វាន់និងវត្ថុផ្សេងៗទៀតពីសប្បុរសជនផងដែរ។
លោកស្រីបានពន្យល់ថា ការជ្រើសរើសត្រឹមជយលាភីត្រឹមចំណាត់ថ្នាក់លេខ ៥ ក្នុងទិសដៅឱ្យបេក្ខជនកាន់តែបង្កើនការដុសខាត់ចំណេះដឹងឱ្យកាន់តែមុតស្រួច ស្របពេលដែលក្រសួងកំពុងផ្តល់អាទិភាពលើការអនុវត្តស្តង់ដារសាលារៀនគម្រូនៅគ្រប់រាជធានីខេត្តក្រុង ដែលស្តង់ដានេះនឹងលើកកម្ពស់គុណភាពនៃការអប់រំឱ្យកាន់តែប្រសើរឡើង។
នៅពេលសួរថា ហេតុអ្វីបានជាក្រសួងអប់រំតែងតែផ្លាស់ប្តូរមណ្ឌលប្រឡងសិស្សពូកែពីខេត្តមួយទៅខេត្តមួយ លោកស្រី ឃួន វិច្ឆិកា បានបញ្ជាក់ថា រយៈពេល ២០ ឆ្នាំមកហើយការប្រឡងសិស្សពូកែ តែងតែមានការផ្លាស់ប្តូរពីខេត្តមួយទៅខេត្តមួយ ដោយសារតែក្រសួងចង់ឱ្យសិស្សានុសិស្សក្រៅពីមកប្រឡងហើយអាចចងសម្ព័ន្ធភាពជាមួយមិត្តភក្តិមកពីខេត្តដទៃទៀត ក៏ដូចជាធ្វើទស្សនកិច្ចសិក្សានៅតាមបណ្តាខេត្តទាំងនោះ។
កន្លងមកខេត្តដែលបានជ្រើសរើសប្រឡងសិស្សពូកែជាតំបន់រមណីដ្ឋានទេសចរណ៍ ឬប្រវត្តិសាស្ត្រដែលអាចធ្វើឱ្យពួកគាត់សិក្សាពីប្រវត្តិសាស្ត្រនានា។ ជាក់ស្តែងនៅឆ្នាំនេះ ក្រសួងបានរៀបចំការប្រឡងសិស្សពូកែផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី ៩ និងថ្នាក់ទី ១២ នៅទូទាំងប្រទេស ចាប់ពីថ្ងៃទី ១២ ដល់ថ្ងៃទី ១៦ ខែឧសភាឆ្នាំ២០២៤ នៅរាជធានីភ្នំពេញនៅវិទ្យាល័យជាស៊ីមសន្ធរម៉ុក ដែលមានបេក្ខជនចូលរួមប្រឡងចំនួន ២៤០ នាក់។ ក្នុងនោះក្រសួងក៏បានរៀបចំដំណើរទស្សនកិច្ចសិក្សានៅវិមានឈ្នះឈ្នះ ដើម្បីឱ្យសិស្សពូកែបានសិក្សាបន្ថែមពីប្រវត្តិសាស្ត្រខ្មែរក៏ដូចជាបានមើលឃើញពីសមិទ្ធិផលរបស់រាជរដ្ឋាភិបាលផងដែរ។
ឆ្នាំមុនក្រសួងអប់រំយុវជននិងកីឡា បានរៀបចំការប្រឡងជ្រើសរើសសិស្សពូកែផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី ៩ និងថ្នាក់ទី ១២ នៅទូទាំងប្រទេសនៅថ្ងៃទី១២ ខែ មិថុនា ឆ្នាំ២០២៣ នៅវិទ្យាល័យនេតយ៉ង់ នៃទីរួមខេត្តបាត់ដំបង ដោយមានបេក្ខជនប្រឡងសរុបចំនួន ៤៨០ នាក់។ ក្នុងនោះក្រសួងជ្រើសរើសយក ៦០ នាក់ ថ្នាក់ទី៩ ចំនួន ៣០ នាក់ និង ថ្នាក់ទី១២ ចំនួន ៣០នាក់ ដោយមួយមុខវិជ្ជាៗជ្រើសរើសយក ១០ នាក់ចាប់ពីលេខ ១ ដល់លេខ ១០ ៕
អត្ថបទ៖ សំអឿន
-
ព័ត៌មានជាតិ១ សប្តាហ៍ ago
ព្យុះ ប៊ីប៊ីនកា បានវិវត្តន៍ទៅជាព្យុះសង្ឃរា បន្តជះឥទ្ធិពលលើកម្ពុជា
-
ព័ត៌មានជាតិ៥ ថ្ងៃ ago
ព្យុះ ពូលឡាសាន ជាមួយវិសម្ពាធទាប នឹងវិវត្តន៍ទៅជាព្យុះទី១៥ បង្កើនឥទ្ធិពលខ្លាំងដល់កម្ពុជា
-
ព័ត៌មានអន្ដរជាតិ៤ ថ្ងៃ ago
ឡាវ បើកទំនប់ទឹកនៅខេត្ត Savannakhet
-
ព័ត៌មានអន្ដរជាតិ១ សប្តាហ៍ ago
អឺរ៉ុបកណ្តាលនិងខាងកើត ក៏កំពុងរងគ្រោះធ្ងន់ធ្ងរ ដោយទឹកជំនន់ដែរ
-
ព័ត៌មានអន្ដរជាតិ១ សប្តាហ៍ ago
វៀតណាម ប្រាប់ឲ្យពលរដ្ឋត្រៀមខ្លួន ព្រោះព្យុះថែមទៀត នឹងវាយប្រហារ ចុងខែនេះ
-
ព័ត៌មានជាតិ៣ ថ្ងៃ ago
Breaking News! កម្ពុជា សម្រេចដកខ្លួនចេញពីគម្រោងCLV-DTA
-
ព័ត៌មានអន្ដរជាតិ៦ ថ្ងៃ ago
ព្យុះកំបុងត្បូង នឹងវាយប្រហារប្រទេសថៃ នៅថ្ងៃសុក្រនេះ
-
ព័ត៌មានជាតិ៧ ថ្ងៃ ago
ព្យុះចំនួន២ នឹងវាយប្រហារក្នុងពេលតែមួយដែលមានឥទ្ធិពលខ្លាំងជាងមុន ជះឥទ្ធិពលលើកម្ពុជា