រដ្ឋមន្ត្រីសុខាភិបាល ស្នើអភិបាលរាជធានី-ខេត្ត ជួយរក្សាសន្តិសុខសុវត្ថិភាព​មន្ត្រីបុគ្គលិកសុខាភិបាលនៅតំបន់ដាច់ស្រយាល

លោក​សាស្ត្រាចារ្យ ឈាង រ៉ា រដ្ឋមន្ត្រី​ក្រសួងសុខាភិបាល បាន​ស្នើ​គណៈ​អភិបាល​អភិបាល​រាជធានី​ខេត្ត ជួយ​រក្សា​សន្តិសុខ និង​សុវត្ថិភាព​មន្ត្រី​បុគ្គលិក​សុខាភិបាល​ដែល​បំពេញ​ការងារ​នៅ​តាម​ប៉ុស្តិ៍​សុខភាព ឬ​មណ្ឌល​សុខភាព​ដាច់ស្រយាល ដើម្បី​ឱ្យ​មន្ត្រី ក៏ដូចជា​អ្នកជំងឺ និង​ប្រជាពលរដ្ឋ កាន់តែ​មាន​ភាព​កក់ក្ដៅ។

នៅ​ក្នុង​លិខិត​ផ្ញើ​ជូន​គណៈ​អភិបាល​អភិបាល​រាជធានី​ខេត្ត កាលពី​ថ្ងៃ​ទី ១៤ ឧសភា លោក​រដ្ឋមន្ត្រី បាន​លើក​ឡើង​ថា ក្រសួងសុខាភិបាល បាន​និង​កំពុង​ជំរុញ​ការ​ផ្តល់​សេវា​សុខាភិបាល ២៤ ម៉ោង ក្នុង​មួយ​ថ្ងៃ ៧ ថ្ងៃ ក្នុង​មួយ​សប្ដាហ៍ នៅ​គ្រប់​មូលដ្ឋាន​សុខាភិបាល​ទាំងអស់ ជាពិសេស​ការ​ផ្តល់​សេវា​សុខាភិបាល​ជា​សារវ័ន្ត និង​ការ​ថែទាំ​សុខភាព​បឋម នៅ​មណ្ឌល​សុខភាព និង​ប៉ុស្តិ៍​សុខភាព ដែល​ជា​គ្រឹះ នៃ​ការ​ឈាន​ឆ្ពោះ​ទៅ​ការ​គ្របដណ្ដប់​សុខភាព​ជា​សកល​នា​ពេល​អនាគត ស្របតាម យុទ្ធសាស្ត្រ​បញ្ចកោណ​ដំណាក់កាល​ទី ១ របស់​រាជរដ្ឋាភិបាល នីតិកាល​ទី ៧ នៃ​រដ្ឋសភា ក្រោម​ការ​ដឹកនាំ​ប្រកប​ដោយ​គតិបណ្ឌិត​របស់ សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា។

លោក​រដ្ឋមន្ត្រី បាន​បន្ត​ថា «​ដើម្បី​អនុវត្ត​ឱ្យ​កាន់​តែ​មាន​ប្រសិទ្ធភាព​នូវ​គោលនយោបាយ “​ភូមិ​-​ឃុំ​-​សង្កាត់ មាន​សុវត្ថិភាព​” ក្រសួងសុខាភិបាល សូម ឯកឧត្ដម លោកជំទាវ មេត្តា​បន្ត​ណែនាំ​បន្ថែម​ទៀត​ដល់​អាជ្ញាធរ​មូលដ្ឋាន ជាពិសេស​កម្លាំង​សមត្ថកិច្ច តាម​ប៉ុស្តិ៍​នគរបាល​នៅ​គ្រប់​ឃុំ-សង្កាត់​ទូទាំង​ប្រទេស ឱ្យ​ចល័ត​ចុះ​ឃ្លាំមើល​ជាប់​ជាប្រចាំ​តាម​គ្រប់​មធ្យោបាយ ជំនាញ​នៅ​កន្លែង​សំខាន់ៗ ជុំវិញ​មូលដ្ឋាន​សុខាភិបាល ជាពិសេស មណ្ឌល​សុខភាព និង​ប៉ុស្តិ៍​សុខភាព ដែល​ស្ថិតនៅ​តំបន់​ដាច់ស្រយាល​ទាំងអស់ ដើម្បី​ឱ្យ​មន្ត្រី បុគ្គលិក​សុខាភិបាល អ្នកជំងឺ និង​ក្រុម​គ្រួសារ​ប្រជាពលរដ្ឋ កាន់​តែ​មាន​ភាព​កក់ក្ដៅ ទាំង​នៅ​ពេល​ថ្ងៃ និង​ពេលយប់ ប្រកប​ដោយ​សេចក្តីសុខ​សុវត្ថិភាព​»។

លោក​រដ្ឋមន្ត្រី បាន​បន្ថែម​ថា ក្រសួងសុខាភិបាល សូម​ថ្លែងអំណរគុណ​ជូន​ចំពោះ​ថ្នាក់ដឹកនាំ និង​មន្ត្រីរាជការ​គ្រប់​លំដាប់​ថ្នាក់ នៃ​រដ្ឋបាល​រាជធានី ខេត្ត និង​អាជ្ញាធរ​មូលដ្ឋាន​ទាំងអស់ ដែល​តែងតែ​យកចិត្តទុកដាក់​រក្សា សន្តិសុខ និង​សុវត្ថិភាព​ជូន​ប្រជាពលរដ្ឋ​នៅ​ក្នុង​មូលដ្ឋាន​របស់​ខ្លួន៕

អត្ថបទ ៖ សំអឿន