ព័ត៌មានជាតិ

អង្គភាពស្រាវជ្រាវម៉ាក្រូសេដ្ឋកិច្ច AMRO ព្យាករកំណើនវិជ្ជមានសេដ្ឋកិច្ចកម្ពុជាឆ្នាំ ២០២៤

បានផុស

៨ ខែ មុន

នៅ

ថ្ងៃពុធ ១៥ ឧសភា ២០២៤

ដោយ

ប្រធានសេដ្ឋវិទូអង្គភាពស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) បានរាយការណ៍អំពីលទ្ធផលនៃការវាយតម្លៃបឋមលើស្ថានភាពសេដ្ឋកិច្ចកម្ពុជា បន្ទាប់ពីបានមកបំពេញបេសកកម្មរយៈពេលពីរសប្តាហ៍នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Hoe EeKhor ក្នុងជំនួបពិភាក្សាការងារជាមួយលោកស្រី ជា សិរី ទេសាភិបាលធនគារជាតិកម្ពុជា

ក្រុមបេសកកម្មរបស់អង្គភាពស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ដឹកនាំដោយ លោក Hoe Ee Khor ប្រធានសេដ្ឋវិទូ បានបង្ហាញពីសុទិដ្ឋិនិយមចំពោះការងើបឡើងនៃសេដ្ឋកិច្ចកម្ពុជានៅឆ្នាំ ២០២៤ ដែលនឹងមានកំណើនខ្ពស់ជាងឆ្នាំ២០២៣ ហើយនឹងបន្តងើបឡើងខ្ពស់មួយកម្រិតទៀតក្នុងឆ្នាំ២០២៥ ខាងមុខ។

អតិផរណារំពឹងបន្តមានកម្រិតទាបត្រឹម ២,៥% នៅឆ្នាំ ២០២៤ និង២០២៥។ ទោះយ៉ាងណា ប្រធានសេដ្ឋវិទូរូបនេះក៏មើលឃើញសេដ្ឋកិច្ចកម្ពុជាក៏អាចប្រឈមនឹងហានិភ័យមួយចំនួនដូចជា ហានិភ័យនៃការថមថយនៃតម្រូវការខាងក្រៅ ប្រសិនបើសេដ្ឋកិច្ចនៃប្រទេសជាដៃគូពាណិជ្ជកម្មមានកំណើនទាបជាងការរំពឹងទុក ការបែងចែកភូមិសាស្រ្តសេដ្ឋកិច្ច និងការប្រែប្រួលអាកាសធាតុជាដើម។

ទាក់ទងស្ថានភាពសេដ្ឋកិច្ចកម្ពុជា ស្ថាប័នអន្តរជាតិធំៗក៏បានធ្វើការវាយតម្លៃដោយវិជ្ជមានទៅលើការងើបឡើងវិញនៃសេដ្ឋកិច្ចកម្ពុជាក្នុងឆ្នាំ ២០២៤។

សេដ្ឋកិច្ចកម្ពុជានឹងមានកំណើន ៥.៨% នៅឆ្នាំ ២០២៤។ នេះបើតាមការព្យាករពីអ្នកជំនាញរបស់ធនាគារពិភពលោក World Bank។

លោក Aaditya Mattoo ប្រធានផ្នែកសេដ្ឋកិច្ចនៃធនាគារពិភពលោកប្រចាំតំបន់អាស៊ី-ប៉ាស៊ីហ្វិកបានបញ្ជាក់ថា កម្ពុជាបានភ្ជាប់ខ្លួនយ៉ាងស៊ីជម្រៅទៅនឹងពាណិជ្ជកម្ម និងការវិនិយោគជាមួយប្រទសចិន តាមរយៈកិច្ចព្រមព្រៀងពាណិជ្ជកម្មសេរី និងការសម្រួលឲ្យមានលំហូរវិនិយោគដោយផ្ទាល់ពីចិនមកកម្ពុជា។

កម្ពុជានឹងមានទទួលបានកំណើនសេដ្ឋកិច្ច ៥.៨% នៅឆ្នាំ ២០២៤ ពោលលើសឆ្នាំ ២០២៣ ដែលមានត្រឹម ៥.៤% ប៉ុណ្ណោះ។ បន្ថែមពីនេះ ប្រធានផ្នែកសេដ្ឋកិច្ចនៃធនាគារពិភពលោកប្រចាំតំបន់អាស៊ី-ប៉ាស៊ីហ្វិកក៏រំពឹងថា សេដ្ឋកិច្ចកម្ពុជានឹងមានកំណើនខ្ពស់រហូតដល់ ៦.១% នៅឆ្នាំ ២០២៥។

ស្របគ្នានេះដែរ ស្ថាប័នមូលនិធិរូបិយវត្ថុអន្តរជាតិ (IMF) បានព្យាករថា សេដ្ឋកិច្ចកម្ពុជានៅក្នុងឆ្នាំ ២០២៤ នឹងមានកំណើនក្នុងអត្រា ៦,១ ភាគរយ ដែលជំរុញដោយការស្ទុះងើបឡើងវិញនៃសេដ្ឋកិច្ចក្នុងតំបន់ និងពិភពលោក។

ថ្លែងនៅក្នុងកម្មវិធីបិទអង្គសន្និបាតបូកសរុបលទ្ធផលការងារប្រចាំឆ្នាំ ២០២៣ ទេសាភិបាលធនាគារជាតិនៃកម្ពុជា លោកស្រី ជា សិរី បានលើកឡើងថា សេដ្ឋកិច្ចកម្ពុជានៅតែប្រឈមនឹងកត្តាខាងក្រៅ និងភាពមិនច្បាស់លាស់ និងហានិភ័យនៃការបែងចែកភូមិសាស្ត្រនយោបាយ ដែលនាំទៅរកការធ្លាក់ចុះលំហូរពាណិជ្ជកម្មអន្តរជាតិ ការវិនិយោគ និងទេសចរណ៍។

លោកស្រីថ្លែងថា ទោះបីបែបណាសេដ្ឋកិច្ចកម្ពុជា ត្រូវបានព្យាករដោយសុទិដ្ឋិនិយមថា នឹងកើនឡើងក្នុងរង្វង់ ៦,៤ ភាគរយនៅឆ្នាំ ២០២៤ ដែលរួមចំណែកជាចម្បងដោយការបន្តកើនឡើងនៃវិស័យសេវាកម្ម ពិសេសវិស័យទេសចរណ៍ និងការងើបឡើងនៃវិស័យកម្មន្តសាល ស្របពេលវិស័យកសិកម្ម សំណង់ និងអចលនទ្រព្យបន្តទទួលបានកំណើនទាប»។

ក្នុងពិធីបើកកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៤ រៀបចំឡើងកាលពីថ្ងៃទី២ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា សេដ្ឋកិច្ចកម្ពុជាបានឆ្លងកាត់ការផ្លាស់ប្តូរគួរឱ្យកត់សម្គាល់ដោយបានវិវត្តទៅជាសេដ្ឋកិច្ចទំនើប ដែលមានសមារណកម្មក្នុងសេដ្ឋកិច្ចសកល ហើយសេដ្ឋកិច្ចកម្ពុជាក៏បានបង្ហាញពីភាពធន់គួរឱ្យកត់សម្គាល់។

សម្តេចធិបតី ហ៊ុន ម៉ាណែត បានគូសបញ្ជាក់ថា មុនការឆ្លងរាលដាលនៃជំងឺកូវីដ-១៩ កម្ពុជារក្សាបាននូវអត្រាកំណើនសេដ្ឋកិច្ចជាមធ្យមលើសពី ៧% ក្នុងមួយឆ្នាំ សម្រាប់រយៈពេល ២ ទសវត្សរ៍។ ទោះបីមានការបន្ទច់បង្អាក់នាពេលថ្មីៗនេះក៏ដោយ សេដ្ឋកិច្ចកម្ពុជាក៏បានស្ទុះងើបឡើងវិញជាមួយអត្រាកំណើន ៥,៦% ក្នុងឆ្នាំ២០២៣ និងត្រូវបានព្យាករថា នឹងមានកំណើន៦,៦% ក្នុងឆ្នាំ២០២៤ ហើយនឹងអាចត្រលប់ទៅរកកំណើនមុនជំងឺរាតត្បាតក្នុងរង្វង់ ៧% ក្នុងឆ្នាំ២០២៨ ដែលនេះបង្ហាញអំពីអនាគតសេដ្ឋកិច្ចប្រកបដោយក្តីសង្ឃឹមរបស់កម្ពុជា៕