ព័ត៌មានជាតិ

រាជរដ្ឋាភិបាល បង្កើនថវិកាវិស័យសង្គមកិច្ច អប់រំ សុខាភិបាល ដើម្បីលើកស្ទួយជីវភាព និងសុខុមាលភាពពលរដ្ឋកាន់តែប្រសើរ

បានផុស

៩ ខែ មុន

នៅ

ថ្ងៃព្រហស្បតិ៍ ១៦ ឧសភា ២០២៤

ដោយ

លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានគណៈកម្មការជាតិពិគ្រោះយោបល់គោលនយោបាយចំពោះគ្រួសារ បានអះអាងថា រាជរដ្ឋាភិបាល បានបង្កើនថវិកាលើវិស័យសង្គមកិច្ច អប់រំ សុខាភិបាល សំដៅធ្វើយ៉ាងណាឱ្យប្រជាជនទទួលបានសេវាសង្គមកាន់តែច្រើន ពិសេសមានភាពងាយស្រួលស្របតាមកម្មវិធីនយោបាយរបស់រាជរដ្ឋាភិបាល ក្នុងការបង្ខិតការផ្តល់សេវាដល់ប្រជាជនឱ្យកាន់តែជិត និងប្រកបដោយប្រសិទ្ធភាពជូនប្រជាជនគ្រប់រូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីប្រារព្ធទិវាអន្តរជាតិស្តីពីគ្រួសារ ១៥ ឧសភា ឆ្នាំ ២០២៤ ក្រោមប្រធានបទ «គ្រួសារជាមូលដ្ឋានគ្រឹះដ៏រឹងមាំក្នុងការចូលរួមអភិវឌ្ឍសង្គម-សេដ្ឋកិច្ច» លោក ជា សុមេធី បានបន្តថា រាជរដ្ឋាភិបាល បានខិតខំយកចិត្តទុកដាក់ និងចាត់វិធានការជាច្រើន ដើម្បីលើកស្ទួយកម្រិតជីវភាពរស់នៅរបស់ប្រជាជន និងសុខុមាលភាពរបស់គ្រួសារកាន់តែប្រសើរ ក្នុងគោលដៅរួមចំណែកអភិវឌ្ឍន៍សង្គម និងធ្វើសុខដុមនីយកម្ម តាមរយៈការបង្កើតឱ្យមានច្បាប់ គោលនយោបាយ និងបទប្បញ្ញត្តិជាច្រើនពាក់ព័ន្ធនឹងការងារលើកកម្ពស់តម្លៃគ្រួសារ។

លោករដ្ឋមន្ត្រី បានបន្តទៀតថា ដើម្បីកសាងគ្រួសារឱ្យមានសុភមង្គល រាជរដ្ឋាភិបាល បានបន្តសហការជាមួយអង្គការមិនមែនរដ្ឋាភិបាលជាតិ អន្តរជាតិ និងដៃគូអភិវឌ្ឍន៍ ក្នុងការជួយដល់គ្រួសារក្រីក្រ រួមទាំងជនរងគ្រោះ និងងាយរងគ្រោះ ដូចជា ជនអនាថា ជនដែលត្រូវគេជួញដូរ ជនផ្ទុកមេរោគអេដស៍ និងជំងឺអេដស៍ជាដើម ដោយផ្តល់សេវាថែទាំ គាំទ្រផ្នែកអប់រំ សុខាភិបាល ស្តារនីតិសម្បទា និងសមាហរណកម្មទៅកាន់សហគមន៍វិញ។

គួរបញ្ជាក់ថា រាជរដ្ឋាភិបាលកម្ពុជា តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា បានដាក់ចេញនូវកម្មវិធីជាតិជំនួយសង្គមក្នុងកញ្ចប់គ្រួសារចំនួន ៤ បញ្ចូលគ្នា រួមមាន ៖ ១.កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ , ២.កម្មវិធីអាហារូបករណ៍សម្រាប់សិស្សក្រីក្រនៅបឋមសិក្សា និងមធ្យមសិក្សាចំណេះទូទៅ, ៣.កម្មវិធីឧបត្ថម្ភសាច់ប្រាក់ជូនជនមានពិការភាព, ៤.កម្មវិធីឧបត្ថម្ភសាច់ប្រាក់ជូនជនចាស់ជរា (អាយុ ៦០ ឆ្នាំឡើង) និងមានរួមបញ្ចូលការឧបត្ថម្ភគោលសម្រាប់គ្រួសារ និងឧបត្ថម្ភសមាជិកគ្រួសារអ្នកផ្ទុកមេរោគអេដស៍ និងជំងឺអេដស៍ ដែលចាប់ផ្ដើមអនុវត្តជាផ្លូវការនៅក្នុងអំឡុងខែមេសា ឆ្នាំ ២០២៤៕

អត្ថបទ ៖ សំអឿន