កម្ពុជាសម្រេច​បាន កាត់បន្ថយការ​ប្រើប្រាស់ថង់ប្លាស្ទិក ១ ថ្ងៃជាង ៣០ លាន​ថង់ប្លាស្ទិក

យុទ្ធនាការកាត់​បន្ថយថង់ប្លាស្ទិក​របស់កម្ពុជា​សម្រេច​បានលើសពីការរំពឹងទុក។ ជាក់ស្តែងត្រឹមតែរយៈពេល​ជិត​ ៩ ខែ (៨ខែ និង២៣ថ្ងៃ) ប៉ុណ្ណោះ កម្ពុជា​អាច​កាត់បន្ថយការប្រើប្រាស់​ថង់ប្លាស្ទិកបានយ៉ាងច្រើនសន្ធឹកសន្ធាប់ តាមរយៈការចូលរួមពី​សំណាក់ប្រជាពលរដ្ឋ អាជ្ញាធរមូលដ្ឋាន ព្រះសង្ឃ កម្មករ កម្មការនី លោកគ្រូ អ្នកគ្រូ និងសិស្សានុសិស្ស។

ក្នុងពិធីប្រកាសបើកយុទ្ធនាការ «កម្ពុជាស្អាត ខ្មែរធ្វើបាន» នាថ្ងៃទី១៥ ខែឧសភា ឆ្នាំ២០២៤ រដ្ឋមន្ត្រី​ក្រសួង​បរិស្ថាន លោក អ៊ាង សុផល្លែត បាន​មាន​ប្រសាសន៍​ថា ប្រជាពលរដ្ឋកម្ពុជា និងសិស្សានុសិស្សជាង ៨ លាននាក់ ដែល​ស្មើនឹងជាង​ពាក់​កណ្តាល​នៃចំនួនប្រជាពលរដ្ឋសរុប បានចូលរួមកាត់បន្ថយការប្រើប្រាស់ថង់ប្លាស្ទិកក្នុង ១ ថ្ងៃប្រមាណជាង ៣០ លាន​ថង់ប្លាស្ទិក ដែល​នេះ​ជា​លទ្ធផល​មួយ​លើស​ពី​ការ​រំពឹង​ទុក​របស់​ក្រសួង​។

ការ​សម្រេច​បាន​លើស​ពីការរំពឹងទុកនេះ លោករដ្ឋមន្រ្តី​បាន​អះអាងថា បានមកពីកត្តាចំនួន ៣ ក្នុង​នោះ​រួម​មាន ផ្ទៃក្នុង​របស់​ក្រសួងបរិស្ថាន​ដែលមានថ្នាក់ដឹកនាំ និង​មន្រ្តីរាជការ​ទាំងអស់។ ចំណែកខាងក្រៅវិញគឺបាន​មកពីការយកចិត្តទុក​ដាក់ និងរួម​ចំណែក​ពីស្ថាប័នពាក់ព័ន្ធ​គ្រប់លំដាប់ថ្នាក់ ជាពិសេសសិស្សានុសិស្សនិង​ប្រជាពលរដ្ឋ​កម្ពុជា។

លោក អ៊ាង សុផល្លែត​បាន​បន្ត​ថា ដើម្បីសម្រេចបានជោគជ័យជាបន្តបន្ទាប់ទៀត ចាំបាច់​ត្រូវតែ​មាន​សុទិដ្ឋិនិយម​ជានិច្ច ហើយសុទិដ្ឋនិយមនេះ គឺជាមាគ៌ាឆ្ពោះទៅកាន់ភាពជោគជ័យស្របតាមយុទ្ធសាស្រ្តចក្រា ដែលមានភាពសាមញ្ញ ងាយយល់ ងាយធ្វើ និងអាចពង្រីកទៅមុខបានយូរង្វែង។

លោក អ៊ាង សុផល្លែត បន្ថែម​ថា បទពិសោធន៍​ជោគជ័យ​នៃយុទ្ធនាការ «ថ្ងៃនេះ ខ្ញុំមិនប្រើប្រាស់ថង់ប្លាស្ទិកទេ» ដែលបានកាត់បន្ថយប្លាស្ទិកក្នុង ១ ថ្ងៃជាង ៣០លានថង់នេះ បានរំលេចចេញនូវយុទ្ធនាការជាបន្តបន្ទាប់ដូចជា យុទ្ធនាការ ដាំដើមឈើយ៉ាងតិច ១ លានដើម នៅថ្ងៃទី ១០ តុលា ឆ្នាំ២០២៣ យុទ្ធនាការផ្ទៃមេឃពណ៌ខៀវ ១៥ វិច្ឆិកា ឆ្នាំ២០២៣ យុទ្ធនាការសំអាតបឹងទន្លេសាប នៅថ្ងៃទី០១ ខែមីនា ឆ្នាំ២០២៤ និងយុទ្ធនាការ «កម្ពុជាស្អាត ខ្មែរធ្វើបាន» ដើម្បីឆ្ពោះទៅយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា ដែល​មាន​យុទ្ធសាស្រ្ត​ចក្រា​វិស័យ​បរិស្ថានជា​ត្រីវិស័យ​តម្រង់​ទិស​៕