ក្នុង១ឆ្នាំ កសិករនៅភាគនិរតីអាចធ្វើស្រែពី ២ទៅ៣ដង ក្រោយជីកព្រែកហ្វូណនតេជោរួច

សម្ដេចតេជោ ហ៊ុន​ សែន បានបញ្ជាក់ថា ក្រោយគម្រោងព្រែកជីកហ្វូណតេជោ សាងសង់រួចរាល់ទាំងស្រុង កសិករនៅភាគនិរតីនៃកម្ពុជា នឹងអាចធ្វើស្រែបានចាប់ពី២ទៅ៣ដងក្នុងមួយឆ្នាំ។ សម្ដេចតេជោ បានគូសបញ្ជាក់បែបនេះ តាមរយៈសារពិសេសជូនប្រជាជនកម្ពុជា នៅថ្ងៃទី១៦ ខែឧសភា ឆ្នាំ២០២៤នេះ។

សម្ដេចតេជោ បានបន្ថែមថា ពលរដ្ឋនៅខេត្តជាប់ព្រែកជីកហ្វូណនតេជោ អាចដាំដំណាំបានដោយមិនខ្វះទឹកប្រើប្រាស់ឡើយ។ ក្រៅពីជួយដល់វិស័យកសិកម្ម សម្ដេចតេជោ​ បានអះអាងថា ព្រែកជីកនេះ ក៏នឹងជួយលែងឱ្យមានទឹកជំនន់ នៅក្នុងខេត្តជាប់នឹងដងព្រែក ជាពិសេសខេត្តកំពង់ស្ពឺ តាមរយៈការបង្ហូរទឹកដែលជន់លិចចូលទៅក្នុងព្រែកជីកតាមប្រព័ន្ធធារាសាស្ត្រ។

តាមសម្ដេចតេជោ ព្រែកជីកនេះ នឹងបង្កើននូវទិន្នផលត្រីបន្ថែមទៀត ហើយពលរដ្ឋអាចចូលនេសាទ ដើម្បីលក់ដូរ ចិញ្ចឹមជីវិតបាន។ ក្រៅពីនេះ ពលរដ្ឋក៏អាចទាញយកប្រយោជន៍ពីព្រែកជីកនេះ តាមរយៈប្រកបរបររកស៊ីលើវិស័យទេសចរណ៍បានទៀតផង។

ជាការកត់សម្គាល់គម្រោងព្រែកជីកហ្វូណនតេជោ ទទួលបានការគាំទ្រយ៉ាងច្រើនសន្ធឹកសណ្ធាប់ ពីសំណាក់ពលរដ្ឋនៅគ្រប់ស្រទាប់វណ្ណៈនៅក្នុងសង្គមកម្ពុជា ដែលការគាំទ្រយ៉ាងច្រើនសន្ធឹកនេះ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានចាត់ទុកថាជាចលនាជាតិនិយមមួយដែលគុណតម្លៃមិនអាចកាត់ថ្លៃបាន៕