សម្ដេចតេជោ តឿនឱ្យរដ្ឋាភិបាល ប្រញាប់បើកការដ្ឋានជីកព្រែកហ្វូណនតេជោ

សម្ដេចតេជោ ហ៊ុន សែន បានដាស់តឿនឱ្យរាជរដ្ឋាភិបាលកម្ពុជា ប្រញាប់ជីកព្រែកជីកហ្វូណនតេជោ ឱ្យបានឆាប់ៗ ដោយមិនត្រូវបានបង្អង់យូរឡើយ ព្រោះកម្ពុជា បានជូនដំណឹងទៅគណៈកម្មការទន្លេមេគង្គរួចរាល់ហើយ។ សម្ដេចតេជោ បានថ្លែងបែបនេះ នៅក្នុងសារពិសេសជូនជនរួមជាតិកម្ពុជា នាថ្ងៃទី១៦ ខែឧសភា ឆ្នាំ២០២៤ នេះ។

សម្ដេចតេជោ បានថ្លែងសង្កត់ធ្ងន់ដូច្នេះថា «រាជរដ្ឋាភិបាលគួរតែប្រញាប់ប្រញាប់បើកដ្ឋានទៅ កុំចាំបាច់ស្អីទៀត ការជូនដំណឹងវាជាការគ្រាប់គ្រាន់ហើយទៅគណៈការទន្លេមេគង្គ ព្រោះកិច្ចព្រមព្រៀងវាតម្រូវឱ្យយើងធ្វើប៉ុណ្ណឹង»។

ក្នុងករណីដែលប្រទេសណាមួដែលសួរមកកម្ពុជា លើគម្រោងព្រែកជីកហ្វូណនតេជោប្រកបដោយការគួរសម សម្ដេចតេជោ បានបញ្ជាឱ្យរដ្ឋាភិបាលកម្ពុជា​ ត្រូវឆ្លើយតបពន្យល់ដោយឥរិយាបថទន់ភ្លន់សមគួរ តែបើសួរមកកម្ពុជាខ្វះការគួរសមកម្ពុជាមិនមានភាពចាំបាច់អ្វីដែលត្រូវពន្យល់ទៅវិញឡើយ ដោយគ្រាន់តែប្រាប់ទៅវិញថា កម្ពុជាបានអនុលោមទៅតាមកិច្ចព្រមព្រៀមរបស់គណៈកម្មការទន្លេមេគង្គឆ្នាំ១៩៩៥រួចរាល់ចប់សព្វគ្រប់ហើយ។

គួររំលឹកជូនថា កាលពីថ្ងៃទី២៨ ខែមេសា កន្លងទៅ សម្ដេចធិបតី ប្រមុខរាជរដ្ឋាភិបាលកម្ពុជា បានព្រលយឱ្យដឹងថា ព្រែកជីកហ្វូណនតេជោប្រវែង១៨០គីឡូម៉ែត្រ តម្លៃ១ ៧០០លានដុល្លារ អាចនឹងបើកការដ្ឋានសាងសង់នៅចុងឆ្នាំ២០២៤នេះ ឬយ៉ាងយូរបំផុតត្រឹមដើមឆ្នាំ២០២៥។ សម្ដេចធិបតី ក៏បានអះអាងថា កម្ពុជា នឹងចុះហត្ថលេខាជាមួយក្រុមហ៊ុនម្ដងទៀត នៅរយៈពេលប៉ុន្មានខែឆាប់ៗខាងមុខនេះ ពោលគឺនៅអំឡុងខែកក្កដា ខែសីហា ឬខែកញ្ញា ឆាប់ៗនេះ៕