ក្រុមការងារបក្សចុះស្រុកកោះកុង ប្រាប់ឲ្យអង្គបោះឆ្នោតដណ្តើមយកជ័យជម្នះក្រុមប្រឹក្សាក្រុងស្រុក អាណត្តិទី៤

សមាជិកគណៈកម្មាធិការកណ្តាល និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកកោះកុង បានប្រាប់ដល់អង្គបោះឆ្នោតជ្រើសរើសក្រុមប្រឹក្សាក្រុងស្រុក ទាំង៤ឃុំ ត្រូវប្តេជ្ញាចិត្តដណ្តើមយកជ័យជម្នះអោយខានតែ។

លោក សឿន រឿត សមាជិកគណៈកម្មាធិការកណ្តាល និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកកោះកុង លើកឡើងក្នុងពិធីសំណេះសំណាលជាមួយអង្គបោះឆ្នោតក្នុងស្រុកកោះកុងថា ជាផែនការរបស់ថ្នាក់ដឹកនាំគណបក្សប្រជាជនកម្ពុជា ចង់អង្គបោះឆ្នោតបោះរក្សាតំណែងប្រធានក្រុមប្រឹក្សាខេត្តក្រុងស្រុក នៅថ្ងៃទី២៦ ខែឧសភា ដើម្បីគ្រប់គ្រងដឹកនាំបន្តទៀត។

លោក សឿន រឿត បានបន្តនៅថ្ងៃទី១៦ ខែឧសភា ឆ្នាំ២០២៤នេះថា ទោះបីជាការបោះឆ្នោតជ្រើសរើសក្រុមប្រឹក្សាខេត្តក្រុងស្រុក អាណត្តិទី៤ ជាការបោះឆ្នោតអសកលក៏ពិតមែន ក៏គណបក្សប្រជាជនកម្ពុជាបានរៀបចំផែនការយ៉ាងម៉ត់ចត់ពីចម្ងាយ ដើម្បីអនុវត្តលើកិច្ចការនយោបាយ តាមដានត្រួតពិនិត្យ និងវាយតម្លៃគ្រប់ដំណាក់កាលនានា។

លោក សឿន រឿត បានតម្រូវឱ្យក្រុមការងារគណបក្សស្រុកកោះកុង តាមដានពិនិត្យមើលអង្គបោះឆ្នោតដែលមានលំនៅដ្ឋានឆ្ងាយៗ ដោយធ្វើសម្រួលដោះស្រាយលិខិតបញ្ជាក់អត្តសញ្ញាណបម្រើដល់ការបោះឆ្នោតឱ្យបានគ្រប់ៗគ្នា បង្កើនសកម្មភាពឃោសនាតាមមូលដ្ឋាន ផ្សព្វផ្សាយខ្លឹមសាររបស់គណបក្ស ពង្រឹងភ្នាក់ងារគណបក្សលើការគូសសន្លឹក ពង្រឹងសាមគ្គីភាព ព្រមទាំងវាយបកទៅកាន់គណបក្សផ្សេងៗ ហើយគិតគូរថែរក្សាសុខភាពអង្គបោះឆ្នោតឱ្យល្អប្រសើរ។

បញ្ហានេះដែរ ត្រូវបានលោក ជា សូវី ប្រធានគណបក្សប្រជាជនកម្ពុជាស្រុកកោះកុង បង្ហាញថា ស្រុកកោះកុងមានឃុំចំនួន៤ ដែលមានអង្គបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សាខេត្ត និងក្រុមប្រឹក្សាស្រុកចំនួន២០នាក់ ស្រី៥នាក់។ ក្នុងនោះ គណបក្សប្រជាជនកម្ពុជាមានចំនួន១៩ ស្រី៥នាក់ គណបក្សភ្លើងទៀតចំនួន១នាក់។

លោក ជា សូវី អះអាងថា ស្ថានភាពគណបក្សផ្សេងៗពុំមានសកម្មភាពអ្វីគួរឱ្យកត់សម្គាល់ឡើយ។ ទន្ទឹមនោះគណបក្សប្រជាជនកម្ពុជាស្រុកកោះកុង បានរៀបចំផែនការសកម្មភាពធ្វើយុទ្ធនាការបោះឆ្នោតតាមបណ្តាឃុំទាំង៤ ភ្នាក់ងារអ្នកសង្កេត និងការចំណាយនានារបស់បក្ស ចាប់ពីថ្ងៃទី១៧ ដល់ថ្ងៃទី២៤ ខែឧសភា នេះ៕

អត្តបទ៖ សិរីវឌ្ឍនៈ