ព័ត៌មានជាតិ

នាយករងវិទ្យាស្ថានជាតិវិជ្ជាជីវៈបាត់ដំបងអះអាង ចុះឈ្មោះរៀនជំនាញ បានទាំងចំណេះ និងថវិកា

បានផុស

៨ ខែ មុន

នៅ

ថ្ងៃព្រហស្បតិ៍ ១៦ ឧសភា ២០២៤

ដោយ

ស្របពេលដែលសិស្សវគ្គទី១ បាននឹងកំពុងចុះអនុវត្តជាក់ស្ដែង តាមជំនាញផ្សេងៗគ្នានៅតាមបណ្ដាក្រុមហ៊ុនសហគ្រាសឯកជននឹងត្រូវបានបិទបញ្ចប់វគ្គបណ្ដុះបណ្ដាលនៅពេលខាងមុខឆាប់នេះ លោក នាង លីវុឌ្ឍន៍ នាយករងនៃវិទ្យាស្ថានជាតិវិជ្ជាជីវៈបាត់ដំបង បានអំពាវនាវដល់យុវជនយុវនារី ដែលចង់ស្វែងរៀនមុខជំនាញដើម្បីរកការងារធ្វើ ឬក៏ចង់បង្កើតមុខរបរផ្សេងៗដោយផ្ទាល់ខ្លួន ដើម្បីរកចំណូលទ្រទ្រង់គ្រួសារ ជាពិសេសយុវជនដែលមកពីក្រុមគ្រួសារក្រីក្រ និងគ្រួសារដែលងាយរងហានិភ័យ ឲ្យនាំគ្នាមកចុះឈ្មោះចូលរៀនជំនាញបច្ចេកទេសវិជ្ជាជីវៈ(វគ្គទី២) ឲ្យបានច្រើនកុះករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក នាង លីវុឌ្ឍន៍ បានលើកឡើងថា ជំហានទី១ បានបណ្ដុះបណ្ដាលសិស្សចូលរៀនជាង ៦០០ នាក់ ជំហានទី១ វេណទី២ មានចំនួន ១៨១ នាក់បន្ថែមទៀត ហើយបច្ចុប្បន្នកំពុងចុះអនុវត្តការងារតាមជំនាញរៀងៗខ្លួន នៅតាមបណ្តាក្រុមហ៊ុន និងសហគ្រាសឯកជន ដែលខាងសាលាជាអ្នកណែនាំនិងរកការងារដល់សិស្សដើម្បីអាចទទួលបានកម្រៃ។

លោកបន្តថា ការចូលមកសិក្សាយកជំនាញនេះ ត្រូវបានរដ្ឋាភិបាលអាណត្តិទី៧ បានបន្តការយកចិត្តទុកដាក់ទៅលើយុវជន យុវនារី ដែលនៅក្នុងគ្រួសារក្រីក្រ និងគ្រួសារងាយរងហានីភ័យ ឲ្យមានចំណេះជំនាញផ្ទាល់ខ្លួនច្បាស់លាស់ ដើម្បីធ្វើអាជីវកម្មរកកម្រៃទ្រទ្រង់គ្រួសារ។

នាយករងនៃវិទ្យាស្ថានជាតិវិជ្ជាជីវៈបាត់ដំបង បានសង្កត់ធ្ងន់ថា «ការចូលមកសិក្សាយកជំនាញនៅវិទ្យាស្ថានជាតិវិជ្ជាជីវៈបាត់ដំបងនេះ មិនយកកម្រៃនោះទេ ហើយថែមទាំងជួយឧប្បត្ថមប្រចាំខែដល់យុវជនយុវនារីទៀតផង។ ដូចនេះសូមយុវជនយុវនារីក្នុងគ្រួសារក្រីក្រនិងគ្រួសារងាយរងហានីភ័យ ត្រូវនាំគ្នាមកចុះឈ្មោះឲ្យបានច្រើននៅវិទ្យាស្ថានជាតិវិជ្ជាជីវៈបាត់ដំបង»។

លោកបញ្ជាក់ថា ជំនាញដែលត្រូវបានបណ្តុះបណ្តាលមានដូចជា ការថែទាំ និងជួសជុលរថយន្ត ដំឡើងបណ្តាញអគ្គិសនីយតាមអគារ ការងារកំបោរ ការងារដំឡើងសសៃដែក តបណ្តាញទឹក ការរចនាក្រាហ្វិកក្នុងកុំព្យូទ័រ ការកែច្នៃផ្លែឈើ ផលិតនំជាដើម។ ទៀតសោត ជំនាញទាំងនេះសុទ្ធតែមានទីផ្សារល្អ ហើយបច្ចុប្បន្នសិស្សដែលបានចូលសិក្សាវគ្គទី១ ខាងសាលាបានឲ្យចុះអនុវត្តន៍តាមជំនាញរៀងៗខ្លួនដែលខាងសាលាជាអ្នកជួយរកការងារទាំងនោះជូនពួកគេផងដែរ៕

អត្ថបទ៖ សៅ សារិទ្ធ