ប្រឡងសិស្សពូកែ ឆ្នាំនេះ បេក្ខជនមកពីខេត្តជាប់ច្រើនលើសលប់ជាង​បេក្ខជននៅភ្នំពេញ

ការ​ប្រឡង​ជ្រើសរើស​សិស្ស​ពូកែ​ផ្នែក​អក្សរសិល្ប៍​ខ្មែរ គណិតវិទ្យា និង​រូបវិទ្យា ថ្នាក់​ទី ៩ និង​ថ្នាក់​ទី ១២ នៅ​ទូទាំង​ប្រទេស នា​ឆ្នាំ ២០២៤ នេះ បេក្ខជន​មកពី​ខេត្ត​ជាប់​ច្រើន​លើសលប់​ជាង​បេក្ខជន​នៅ​រាជធានី​ភ្នំពេញ ពិសេស​បេក្ខជន​ថ្នាក់​ទី ១២។

ក្រសួង​អប់រំ យុវជន និង​កីឡា បាន​រៀបចំ​ការ​ប្រឡង​សិស្ស​ពូកែ​ទូទាំង​ប្រទេស​រយៈពេល ៥ ថ្ងៃ ចាប់ពី​តាំងពី​ថ្ងៃ​ទី ១២ ដល់​ថ្ងៃ​ទី ១៦ ខែ​ឧសភា ឆ្នាំ ២០២៤ នៅ​វិទ្យាល័យ ជា ស៊ីម សន្ធរ​មុខ ដោយ​មាន​សិស្សានុសិស្ស​ចូលរួម​ចំនួន ២៤០ នាក់ ស្រី ១២៧ នាក់ ក្នុង​នោះ នឹង​ត្រូវ​បាន​ជ្រើសរើស​ជា​ជ័យលាភី​សរុប ៣០ នាក់ ដោយ​ថ្នាក់​ទី ៩ ចំនួន ១៥ នាក់ និង​ថ្នាក់​ទី ១២ ចំនួន ១៥ នាក់។

យោង​តាម​លទ្ធផល​ប្រឡង​សិស្ស​ពូកែ​ដែល​ក្រសួង​អប់រំ​បាន​ប្រកាស​ជា​ផ្លូវការ កាលពី​ថ្ងៃ​ទី ១៦ ឧសភា បាន​ឱ្យ​ដឹង​ថា នៅ​រាជធានី​ភ្នំពេញ​មាន​បេក្ខជន​ប្រឡង​ជាប់​សិស្ស​ពូកែ​ចំនួន ៥ នាក់ ក្នុង​នោះ​ថ្នាក់​ទី ៩ មាន ៤ នាក់ និង​ថ្នាក់​ទី ១២ មាន ១ នាក់ ក្នុង​ចំណោម​បេក្ខជន​ចូលរួម​ប្រឡង​មាន​ចំនួន ២៤ នាក់ ខណៈ​ខេត្ត​ព្រៃវែង​មាន​បេក្ខជន​ប្រឡង​ជាប់ ៦ នាក់ ថ្នាក់​ទី ៩ មាន ៣ នាក់ និង​ថ្នាក់​ទី ១២ មាន ៣ នាក់។ ខេត្ត​សៀមរាប ជាប់ ២ នាក់ គឺ ថ្នាក់​ទី ៩ ម្នាក់ និង ថ្នាក់​ទី ១២ ម្នាក់។ ខេត្ត​បាត់ដំបង ជាប់ ថ្នាក់​ទី ៩ ចំនួន ៣ នាក់។ ខេត្ត​កំពង់ឆ្នាំង ជាប់ ៣ នាក់ ថ្នាក់​ទី ៩ ម្នាក់ និង ថ្នាក់​ទី ១២ ចំនួន ២ នាក់។ ខេត្ត​កំពង់ចាម ជាប់ ២ នាក់ គឺ ថ្នាក់​ទី ៩ ម្នាក់ និង ថ្នាក់​ទី ១២ ម្នាក់។ ខេត្ត​ពោធិ៍សាត់ ជាប់ ២ នាក់ គឺ ថ្នាក់​ទី ៩ ម្នាក់ និង ថ្នាក់​ទី ១២ ម្នាក់។ ខេត្ត​បន្ទាយមានជ័យ ជាប់​ថ្នាក់​ទី ១២ ម្នាក់ ខេត្ត​មណ្ឌលគីរី ជាប់​ថ្នាក់​ទី ៩ ម្នាក់។ ខេត្ត​ត្បូងឃ្មុំ ជាប់​ថ្នាក់​ទី ១២ ម្នាក់។ ខេត្ត​កណ្ដាល ជាប់​ថ្នាក់​ទី ១២ ចំនួន ២ នាក់។ ខេត្ត​តាកែវ ជាប់​ថ្នាក់​ទី ១២ ម្នាក់ និង ខេត្ត​ស្វាយរៀង ជាប់​ថ្នាក់​ទី ១២ ម្នាក់។

លោក ហែម ស៊ីណារ៉េត ប្រធាន​មន្ទីរអប់រំ យុវជន និង​កីឡា បាន​មាន​ប្រសាសន៍​នៅ​ព្រឹក​ថ្ងៃ​ទី ១៧ ឧសភា នេះ​ថា ប្រឡង​សិស្ស​ពូកែ​ឆ្នាំនេះ រាជធានី​ភ្នំពេញ មាន​បេក្ខជន​ចូលរួម​ប្រឡង​ចំនួន ២៤ នាក់ ស្រី ១៥ នាក់។ ជា​លទ្ធផល​ទទួល​បាន​ជ័យលាភី​ចំនួន ៥ នាក់ ក្នុង​នោះ​ទទួល​បាន​មេដាយ​ប្រាក់​ចំនួន ១ នាក់ មេដាយ​សំរឹទ្ធ​ចំនួន ២ នាក់ និង​ជ័យលាភី​ចំណាត់ថ្នាក់​លេខ ៥ ចំនួន ២ នាក់ ស្រី ១ នាក់។

លោកស្រី ឃួន វិច្ឆិកា អ្នកនាំពាក្យ​ក្រសួង​អប់រំ យុវជន និង​កីឡា បាន​មាន​ប្រសាសន៍​នៅ​ព្រឹក​ថ្ងៃ​ទី ១៧ ឧសភា នេះ​ថា ការ​ប្រឡង​សិស្ស​ពូកែ​ឆ្នាំនេះ​អាច​មើល​ឃើញ​នូវ​ចំណុច​សំខាន់ៗ ចំនួន ៣ គឺ ទី១.បាន​ឃើញ​ពី​ការ​ខិតខំ​ប្រឹងប្រែង​របស់​សិស្សានុសិស្ស​នៅ​តាម​រាជធានី-ខេត្ត​នានា ,ទី២.​បាន​ឃើញ​ពី​គុណភាព​របស់​គ្រូបង្រៀន​ដែល​មាន​ភាព​ប្រសើរឡើង ពិសេស​បាន​បង្ហាញ​ថា គ្រូបង្រៀន​តាម​ខេត្ត​-ក្រុង​នានា​ក៏​មាន​សមត្ថភាព និង​គុណវុឌ្ឍិ​ដែល​អាច​មាន​ភាព​ប្រកួតប្រជែង​ខ្ពស់​ជាមួយ​នឹង​គ្រូ​នៅ​រាជធានី​ភ្នំពេញ​ផង​ដែរ និង​ទី៣.លទ្ធផល​សិស្ស​ពូកែ​នេះ​ជា​លទ្ធផល​មួយ​ដែល​ក្រសួង​អប់រំ យុវជន និង​កីឡា យក​មក​ប្រើប្រាស់​ជា​ឧត្តមានុវត្ត ក៏ដូចជា​ការ​សិក្សា​ស្វែងយល់​រក​ចំណុច​ដែល​ខ្លាំង និង​ចំណុច​ខ្វះខាត ដើម្បី​យក​មក​អភិវឌ្ឍន៍​បន្ថែម ឬ​បំពេញ​បន្ថែម​នូវ​ចំណុច​ខ្វះខាត​ផង​ដែរ។

ការ​ប្រឡង​ជ្រើសរើស​សិស្ស​ពូកែ​ផ្នែក​អក្សរសិល្ប៍​ខ្មែរ គណិតវិទ្យា និង​រូបវិទ្យា ថ្នាក់​ទី ៩ និង​ថ្នាក់​ទី ១២ នៅ​ទូទាំង​ប្រទេស នៅ​ឆ្នាំ ២០២៤ នេះ ក្រសួង​ជ្រើសរើស​យក​តែ​ចំណាត់ថ្នាក់​លេខ ១ ដល់​លេខ ៥ ប៉ុណ្ណោះ ខណៈ​ឆ្នាំ​មុនៗ ជ្រើសរើស​ពី​លេខ ១ ដល់​លេខ ១០។ ក្នុង​នោះ ចំណាត់ថ្នាក់​លេខ ១ ទទួល​បាន​ថវិកា ៣ លាន ៥ សែន​រៀល លេខ ២ បាន ៣ លាន ២ សែន​រៀល លេខ ៣ បាន ២ លាន ៩ សែន​រៀល លេខ ៤ បាន ២ លាន ៦ សែន​រៀល និង​លេខ ៥ បាន ២ លាន ៣ សែន​រៀល។ សិស្ស​ជ័យលាភី ក៏​អាច​នឹង​ទទួល​ប្រាក់​រង្វាន់ និង​វត្ថុ​ផ្សេងៗ ទៀត ពី​សប្បុរសជន​ផង​ដែរ។

លោកស្រី ឃួន វិច្ឆិកា បាន​ពន្យល់​ថា ការ​ជ្រើសរើស​ត្រឹម​ជ័យលាភី​ត្រឹម​ចំណាត់ថ្នាក់​លេខ ៥ នេះ ក្នុង​ទិសដៅ​ឱ្យ​បេក្ខជន​កាន់តែ​បង្កើន​ការ​ដុសខាត់​ចំណេះដឹង​ឱ្យ​កាន់តែ​មុត​ស្រួច​ស្រប​ពេល​ក្រសួង​កំពុង​ផ្តល់​អាទិភាព​លើ​ការ​អនុវត្ត​ស្តង់ដារ​សាលារៀន​គំរូ​នៅ​គ្រប់​រាជធានី​ខេត្ត​ក្រុង ដែល​ស្តង់ដារ​នេះ​នឹង​លើក​កម្ពស់​គុណភាព នៃ​ការ​អប់រំ​ឱ្យ​កាន់តែ​ប្រសើរ​ឡើង៕

អត្ថបទ ៖ សំអឿន