សម្ដេច ហ៊ុន ម៉ាណែត៖ ការបញ្ជូនពលរដ្ឋទៅធ្វើការក្រៅប្រទេស ទទួលបានទាំងចំណូល និងជំនាញ ដើម្បីសេដ្ឋកិច្ចជាតិ

អញ្ជើញជួបសំណេះសំណាលជាមួយសហគមន៍ខ្មែររស់នៅកូរ៉េខាងត្បូង នារសៀលថ្ងៃទី១៨ ខែឧសភា ឆ្នាំ២០២នេះ សម្ដេចធិបតីនាយករដ្ឋមន្ត្រីកម្ពុជា បញ្ជាក់ថា ការបញ្ជូនពលរដ្ឋឱ្យទៅធ្វើការនៅក្រៅប្រទេស គឺជាការចល័តកម្លាំងពលកម្មដែលទទួលបានទាំងចំណូល និងជំនាញ ដើម្បីជួយជំរុញដល់សេដ្ឋកិច្ចជាតិ។

សម្ដេចធិបតី បានលើកឡើងថា ការបង្កើតការងារខាងក្នុងប្រទេស គឺជាអាទិភាពចម្បង ប៉ុន្តែយើងក៏ទទួលស្គាល់ថា ការរៀបចំ និងការបង្កើតការងារនៅក្រៅប្រទេស ក៏ជាការចាំបាច់មួយ ដើម្បីជាជម្រើសដល់ប្រជាពលរដ្ឋអាចជម្រើសការងារធ្វើតាមបណ្ដាប្រទេសដទៃ ជាអាទិ៍ដូចនៅប្រទេសកូរ៉េ ជាដើម។

ជុំវិញការចោទប្រកាន់ថា នាយករដ្ឋមន្ត្រីកម្ពុជាមកអួតតែពីការបញ្ជូនខ្មែរឱ្យមកធ្វើការស្រុកគេ ត្រូវបានសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឆ្លើយតបថា មានតែប្រទេសដែលហ៊ុមព័ទ្ធសេដ្ឋកិច្ចប៉ុណ្ណោះ ទើបមិនឱ្យប្រជាពលរដ្ឋចេញទៅក្រៅ។ សម្ដចធិបតី បញ្ជាក់ថា ការបញ្ជូនពលរដ្ឋឱ្យទៅធ្វើការនៅក្រៅប្រទេស គឺមិនមែនជារឿងមិនធម្មតានោះឡើយ ដែលគ្មានប្រជាជនចល័តនោះ ផ្ទុយទៅវិញ ប្រទេសនៅវិញពិភពលោកតែងមានការចល័តកម្លាំងពលកម្មទៅវិញទៅមក។

សម្ដេចធិបតី បានបន្ថែមថា ក្នុងដំណាក់កាលនៃសកលភាវូបនីយកម្ម ការចុះកិច្ចព្រមព្រៀងលើពាណិជ្ជកម្មសេរី មានគោលដៅធ្វើយ៉ាងណាឱ្យលំហូរនៃផលិតផល លំហូរនៃមូលធនមនុស្សឱ្យបានស្រួល ដើម្បីប្រទេសដែលខ្វះពលកម្ម អាចជ្រើសយកកម្លាំងពលកម្មពីប្រទេសផ្សេងទៀត។

សម្ដេចធិបតី បានលើកឡើងពីអត្ថប្រយោជន៍ដែលប្រទេសដែលបញ្ជូនពលករទទួលនោះ គឺការលើកកម្ពស់កម្រិតជីវភាព ប្រជាពលរដ្ឋ តាមរយៈការទទួលបានប្រាក់ខែខ្ពស់ ហើយថែមទាំងទទួលបានជំនាញ។

សម្ដេចធិបតីនាយករដ្ឋមន្ត្រី សង្កត់ធ្ងន់ថា ការបើកច្រក និងរកទីផ្សារការងារឱ្យពលរដ្ឋនៅក្រៅប្រទេស មិនមែនជាការយកពលករ ឬ យកប្រជាជនទៅធ្វើជាខ្ញុំគេ ហើយក៏មិនបានបង្ខំដែរ។ ជាក់ស្ដែង ការបញ្ជូនពលរដ្ឋឱ្យទៅធ្វើការនៅប្រទេស ក៏មិនមែនឱ្យទៅដាច់តែលតោលតែឯងដែរ គឺរាជរដ្ឋាភិបាល មានយន្តការគាំពារជាប់ជានិច្ច៕