ព័ត៌មានជាតិ

អភិបាលខេត្តបាត់ដំបងដឹកនាំមន្ត្រីរាជការនិងកម្លាំងនគរបាលជិត១០០នាក់ចាក់វ៉ាក់សាំងកូវីដ១៩លើកដំបូង

បានផុស

៤ years មុន

នៅ

ថ្ងៃព្រហស្បតិ៍ ២៥ កុម្ភៈ ២០២១

ដោយ

ការផ្តល់វ៉ាក់សាំងកូវីដ១៩លើកដំបូងក្នុងខេត្តបាត់ដំបងដល់មន្ត្រីរាជការកងកម្លាំងនគរបាលជាតិនិងនិស្សិតមធ្យមសិក្សាសុខាភិបាលភូមិភាគបាត់ដំបងនេះដោយសារមន្ត្រីខាងលើជាមុខសញ្ញាជួរមុខបម្រើសេវាសាធារណៈពិសេសបានបំពេញការងារចុះជួបនិងជួយជាមួយប្រជាពលរដ្ឋច្រើននាក់និងគ្រប់ទីកន្លែងព្រោះយើងមិនបានដឹងថា អ្នកណាមានផ្ទុកជំងឺអ្វីមួយឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើតាមការលើកឡើងរបស់លោក ងួន រតនៈ អភិបាលខេត្តខណៈដែលលោកបានចូលរួមក្នុងព្រឹត្តិការណ៍ផ្តល់វ៉ាក់សាំងកូវីដ១៩នៅថ្ងៃទី២៥ ខែកុម្ភៈ ឆ្នាំ២០២១នេះនៅមន្ទីរពេទ្យបង្អែកខេត្តបាត់ដំបង។

លោកបន្តថា ក្រោយពីការផ្តល់វ៉ាក់សាំងជំហានដំបូងដល់មន្ត្រីរាជការកងកម្លាំងនាពេលនេះ ស្ថាប័នឯទៀតក៏ដូចជាបងប្អូនប្រជាពលរដ្ឋផ្សេងៗ ក៏ត្រូវត្រៀមលក្ខណៈសម្រាប់ពេលវេលាបន្តបន្ទាប់ក្រោយៗទៀតផងដែរ។

លោកអភិបាលខេត្តក៏បានរម្លឹកដល់កងកម្លាំងពិសេសកងការពារគោលដៅនៅតាមបណ្តាតំបន់ព្រំដែនទាំងអស់ត្រូវចូលរួមចាក់វ៉ាក់សាំងឲ្យបានគ្រប់ៗគ្នាផងដែរ ព្រោះជាតំបន់ប្រឈមមួយត្រូវជួបប្រាស្រ័យទាក់ទងជាមួយពលករជាបន្តបន្ទាប់ដើម្បីការពារទុកជាមុនចំពោះការឆ្លងរីករាលដាលនៃជំងឺកូវីដ១៩។

ចំពោះមន្ត្រីរាជការដែលទទួលបានវ៉ាក់សាំងការពាររួចហើយ កុំភ្លេចវិលមកចាក់ជាលើកទី២ទៀតនិងគោរពតាមគោលការណ៍ណែនាំរបស់មន្ត្រីសុខាភិបាលឲ្យបានត្រឹមត្រូវផងដែរ។ សម្រាប់ខេត្តបាត់ដំបងមានមណ្ឌលចាក់វ៉ាក់សាំងកូវីដ១៩សរុបចំនួន៦កន្លែងក្នុងនោះមានដូចជា មន្ទីរពេទ្យបង្អែកខេត្តបាត់ដំបង, មន្ទីរពេទ្យបង្អែកស្រុកមោងឬស្សី,មន្ទីរពេទ្យបង្អែកស្រុកសំពៅលូន,មន្ទីរពេទ្យបង្អែកស្រុកថ្មគោល,មន្ទីរពេទ្យបង្អែកស្រុកបវេលនិងមន្ទីរពេទ្យបង្អែកស្រុកឯកភ្នំ៕

អត្ថបទ ៖ សៅ សារិទ្ធ