ផ្សារសណ្តែកកកស្ទះរាល់ថ្ងៃ ផ្លូវបេតុងជុំវិញ​ផ្សារ​ក្លាយជា​ចំណត​ផ្ញើម៉ូតូ

ផ្លូវបេតុងជុំវិញផ្សារសណ្តែកត្រូវបានថៅកែវិនិយោគផ្សារប្រើអំណាចចាត់ចែងស្រេចតែចិត្ត ដោយផ្តល់ឲ្យអាជីវករយកចំណី​ថ្នល់ធ្វើអាជីវកម្ម មានការផ្ញើម៉ូតូ លក់អីវ៉ាន់ចាប់ហួយគ្រុប់មុខ ត្រី សាច់ជ្រូក មាន់ ទា បន្លែ ផ្លែឈើ បណ្តាលឲ្យផ្លូវមានការស្ទះចង្អៀត ពិបាកធ្វើដំណើររាល់ថ្ងៃ។

អាជីវករមួយចំនួនបានលក់នៅលើលូរទឹកស្អុយ ខ្មៅក្រខ្វក់ លាយឡំដោយសត្វដង្កូវ កាកសំណល់ និងក្លិនអសោចរាប់សិបខែឆ្នាំមកហើយ។ ការស៊ូទ្រាំលក់ដូរដើម្បីចិញ្ចឹមជីវិតយ៉ាងវេទនា ក្នុងគ្រាអន្តរកាលដ៏លំបាកប្រកបដោយធំក្លិនស្អុយនេះ ពួកគាត់បានស្នើ​ឲ្យថៅកែផ្សារ អាជ្ញាធរស្រុក និងជំនាញពាក់ព័ន្ធជួយដោះស្រាយ មេត្តាបូមទឹកស្អុយចេញផង ព្រោះពួកគាត់អាចប្រឈមនឹងសុខភាពយ៉ាងធ្ងន់ធ្ងរ ។

ក្រុមអាជីវករផ្សារសណ្តែកបានលើកឡើងថា ការតស៊ូលក់ដូរនៅលើលូរបែបនេះ​ជាយូរឆ្នាំ ដោយសារគ្មានកន្លែងលក់ ចេះតែនាំគ្នាទ្រាំលក់ទៅ។ ពួកគាត់តែងស្មើសុំឲ្យថៅកែវិនិយោគផ្សារមេត្តាជួយបូមទឹកស្អុយចេញពីលូរ និងរកទីតាំងលក់ឲ្យបានសមរម្យផង តែម្ចាស់ផ្សារបានត្រឹមតែថា ចាំដោះស្រាយបូមជូនជាច្រើនដងតែឥតប្រយោជន៍។

អាជ្ញាធរស្រុក និង​បរិស្ថានខេត្ត ក៏មិនបានចុះត្រួតពិនិត្យបញ្ហាក្លិនស្អុយសាយភាយចូលក្នុងផ្សារ ចូលវត្តគួរឲ្យរអើមបំផុត ពិសេសទៀតការប្រមូលភាស៉ី យកលើសសៀវភៅបន្ទុក ដូចជាម៉ូតូ ១ គ្រឿង គឺយក ១ ពាន់រៀលឯណោះ។

ទាក់ទង​នឹងបញ្ហានេះ ភ្នាក់ងារ​កម្ពុជាថ្មី​បានទាក់ទងទៅ លោក អំ រឹម ថៅកែវិនិយោគផ្សារសណ្តែកបានបញ្ជាក់ថា ការងារហ្នឹង​លោកបានឲ្យទៅខាងភាស៉ីគេម៉ៅការបន្ត។ ការចង្អៀតមានមែន ហើយចំពោះក្លិនស្អុយ និងការ​យក​ភាស៉ីលើសសៀវភៅបន្ទុកចាំគាត់សួរទៅខាងភាស៉ីសិន។

លោក ផេន សុផល អភិបាលនៃគណៈអភិបាលស្រុកបាធាយបានបញ្ជាក់ថា រឿងកកស្ទះធម្មតាទេទីផ្សារ ហើយក្លិនទឹកស្អុយក្នុងលូរទាល់តែយើងរួមគ្នាធ្វើ ទីផ្សារត្រីស្អុយអីចឹងហើយគ្រប់តែផ្សារនឹង លើកលែងតែផ្សារទំនើបទេ ដែលមិនស្អុយនោះ រឿងភាស៉ីយកលើសសៀវភៅបន្ទុកនោះចាំស្រុកសួរទៅខាងភាស៉ីសិន៕